Yohane 11 - Chipangano Chabwangu

Yesu abusha Lasalo kubafwa

¹ Kwali umwalalume umo uwalikulwala, uwalikwitwa Lasalo. Alikwikala mumushi wa Betaniya. Wali emushi uwalikwikalamo Maliya nenkashi inakwe Malita. (

² Ngu Maliya engulya uwayitulwile amafuta anunkila pamakasa aaku Bashikulu nokusumuna nemishishi yakwe. Ndume yakwe Lasalo alilwele.)

³ Echo inkashi shakwe shatumine amashiwi kuli Yesu ati, “Bashikulu, chibusa wenu mulwele.”

⁴ Ulo Yesu aumfwile, asosele ati, “Ukulwalapo nku takuli kwamfwa iyowo. Nchi chachitika ukuti chilete ubuleme kuli Lesa. Pamulandu wabulwele mbu Umwana waku Lesa akupokelelamo ubuleme.”

⁵ Yesu atemenwe Malita nenkashi inakwe pamo na Lasalo.

⁶ Ulo aumfwile amashiwi akulwala kwakwa Lasalo, aayikele pali nchilya chifulo inshiku shibili.

⁷ Kumupwilo wanshiku nshi, Yesu asosele kubakusambila bakwe ati, “Katulokuya ku Yudeya.”

⁸ Nomba abakusambila bakwe balimwasukile ati, “We musambishi, papita bwaka inshita inini, abantu nkulya bafwayile ukukulasa amabwe. Kanshi nakambi mukofwaya ukubwelelako?”

⁹ Yesu abasukile ati, “Kanshi mukasuba tamwaba maoola ikumi na abili? Umuntu onse uwenda mukasuba tekuti ayitutulepo, pantu akasuba kakosanika.

¹⁰ Nomba ukoyenda mubushiku kuti ayitutula, pakuti ali mumfinshi.”

¹¹ Panuma yaku mfi, Yesu asosele kubakusambila bakwe ati, “Chibusa wesu Lasalo alilele, kuntu nkoya kumubusha.”

¹² Abakusambila balimwasukile ati, “Bashikulu, kati alele bwaka utulo, akupola.”

¹³ Nomba Yesu alikweba ati Lasalo alifwile. Lelo bena balangulukile ifyakulala utulo bwaka.

¹⁴ Epo Yesu alibebele apatubile ati, “Lasalo alifwile.

¹⁵ Nomba pamulandu waku mwebo natemwa pakuba nebo tanshalipo nakwe, epo mwakuchetekela. Katulokuya.”

¹⁶ Tomasi, (uwalikwitwa Mpundu,) asosele kubakusambila banakwe ati, “Katulokuya pamo nomusambishi, tukafwile pamo nakwe!”

Yesu ekubuka nobumi

¹⁷ Ulo Yesu afikile, asangile ukuti Lasalo alindako munshinshi inshiku shine.

¹⁸ Ukufuma kumushi wa Betaniya ukuya ku Yelusalemu, tayakumenepo imilundu itatu.

¹⁹ Abena Yudeya abenji balishile mukubona Malita na Maliya, mukubashinshita pamulandu wamfwa yakwa ndume yabo.

²⁰ Ulo Malita aumfwile ati Yesu akoyisa munshila, alile mukumuchinsha, kuntu Maliya ashele ekele munanda.

²¹ Elo Malita asosele kuli Yesu ati, “Bashikulu, nga mwali nkuno indume yanji nga tayafwilepo!

²² Nomba ndishibile ukwebati nangu ninduno Lesa kuti amupela chonse icho mukolomba.”

²³ Yesu alimwebele ati, “Indume yobe yakubuka kubumi.”

²⁴ Malita aasukile ati, “Ndishibile ukwebati akwisa kubuka nakambi mukubuka kwabafwa mukasuba kakumupwilo.”

²⁵ Yesu asosele kuli ye ati, “Nine ukubuka nobumi. Uyo onse uuchetekela muli nebo, akuba nobumi nangu aafwa.

²⁶ Na uyo uwakwikala nokuchetekela muli nebo, tayise kufwa iyowo. Napo ukochetekela mfi?”

²⁷ Malita aasukile ati, “Ina, Bashikulu. Nkochetekela ukuti mwebo nimwe Uwasubwa, Umwana waku Lesa, uyo uwakwisa panonshi.”

Yesu alilile umusowa

²⁸ Panuma ulo Malita ashilile ukusosa mfi, alibwelelemo mukwita nkashi inakwe Maliya. Mubumfishi alimwebele ati, “Umusambishi afika ali nkuno, akokwita.”

²⁹ Ulo Maliya aumfwile mfi, bwangu-bwangu alimine ukuya kuli Yesu mukumukumanya. (

³⁰ Yesu aali talafika kumushi, kuntu alipenka mpalya apo Malita amukumenye.)

³¹ Abantu abali munanda pamo na Maliya abali kumushinshita, ulo babwene ayima mukasaku ukuya panse, balimukonkele, bakolanguluka ati nangula aya kunshinshi mukulila.

³² Ulo Maliya afikile kuchifulo ukwali Yesu, ulo amubwene, bwangu-bwangu awile pamakasa akwe nokusosa ati, “Bashikulu, nga mwali nkuno indume yanji nga tayafwilepo iyowo.”

³³ Yesu ulo amubwene akolila, nakambi nokubona abantu mbalya abali pamo nakwe bakolila imisowa, umutima wakwe wayiketwe ichikonko.

³⁴ Elo afumbile ati, “Nikwisa mwamushika?” Bamwasukile ati, “Bashikulu iseni mubone.”

³⁵ Yesu alililile.

³⁶ Abantu basosele ati, “Boneni ifyo amutemenwe!”

³⁷ Nomba bambi basosele ati, “Ngu muntu ewaposeshe mpofu. Napo nga takenyepo Lasalo ukuti efwa?”

Lasalo abuka kubafwa

³⁸ Yesu ayiketwe nakambi ichinkonko ichikulu. Ayile kunshinshi, lwali luchengo napamwinshi bashinkilepo ibwe.

³⁹ Yesu abebele ati, “Fumyenipo ibwe.” Elo Malita, nkashi yakwe uwafwile, ayasukile Yesu ati, “Bashikulu, ino nshita akonunka pakuti nomba papita inshiku shine ukufuma apo bamushikile!”

⁴⁰ Yesu amwasukile ati, “Napo nshikwebelepo kale ati wakubona ubuleme bwaku Lesa nga wanchetekela?”

⁴¹ Elo abantu bafumishepo ibwe. Nomba Yesu aloleshe kumulu nokusosa ati, “Nkomutota Bata pakuti mulang’umfwa.

⁴² Nalishiba ukuti mulang’umfwa inshiku shonse, kuntu nasosa mfi pamulandu wabantu mba abali mpano, ukwebati bachetekele ukuti nimwe mwantumine.”

⁴³ Panuma yakusosa mfi, alibilikishe neshiwi ilikulu ati, “Lasalo, fuma!”

⁴⁴ Elo uwafwile alifumine, alipombelwe kumolu nakumaboko nensalu isho bamushikilemo, pamo nechitambala icho bamupombele kumenso. Elo Yesu abebele ati, “Mukakuleni alokwenda.”

Bapinga ukwipaya Yesu

⁴⁵ Abantu abenji abayishile mukubona Malita balibwene ifyo Yesu achitile, echo balimuchetekele.

⁴⁶ Nomba bambi nabo bayile ku Bafalisi nokubeba ifyo Yesu achitile.

⁴⁷ Elo Abafalisi nentungulushi shabachipupila nabakulu ba Bayuda balikumene nokusosa ati, “Twakuchita shani? Lolesheni pafyafiso ifikulu fyonse ifyo ngu muntu akochita!

⁴⁸ Kati atwamuleka ukuti apitilile ukubomba muli nji nshila, abantu bonse bakumuchetekela. Elo ababuteko bwabena Loma bakwisa muchifulo chabuta nokonaula inanda yaku Lesa nomutundu wesu!”

⁴⁹ Umo uwaku bo, uwali kwitwa Kayafasi, uwali chipupila mukulu muli ngulya mwaka, aebele ati, “Mwebo findo mwishibile!

⁵⁰ Kanshi tamwayishiba ukuti chiweme umuntu umo ukufwila abantu muchifulo chakonaula umutundu onse?”

⁵¹ Ukuba tayisosele umwine enka, pantu ewali chipupila mukulu muli ngulya mwaka, aloseshe ukuti Yesu akufwila umutundu wa Bayuda.

⁵² Tekufwilapo Bayuda benka iyowo, kuntu nokulonganya abana baku Lesa bonse abo abapalangana.

⁵³ Ukufuma pali nkalaya kasuba, abakulu ba Bayuda bapingile ukwipaya Yesu.

⁵⁴ Pamulandu ngu, Yesu talikwendapo ichende-ende muchalo cha Yudeya, kuntu alifumineko nokuya kuchifulo ichali mupepi namuchiswebebe, kumushi wa Efulaimu, uko ayikele nabakusambila bakwe.

⁵⁵ Ukulya kwa Bayuda ukwa Chakulya Chakuchilila kwalipalamine. Abantu abenji abafumine mumishi yonse iyapusana-pusana bayile ku Yelusalemu mukuyiwamya ukulya kutalafika.

⁵⁶ Abantu balikufwaya Yesu ulo balongene munanda yaku Lesa. Bafumbene umo nomunakwe ati, “Mba mukolangulukapo shani? Napo nachine tayisepo kuli nku kulya?”

⁵⁷ Intungulushi shabachipupila na Bafalisi bapele abantu amafunde aakuti nga kwakuba umuntu uwakwishiba uko Yesu ali, alingile ayisa mukusosela ukwebati bamwikate.