Yohane 10 - Chipangano Chabwangu

Chembela uuweme

¹ Yesu asosele ati, “Nachine nkomweba ati, umuntu uutenjilila pamulyango wechinka lyambelele, kuntu akoyinjilila pambi, emung’o nowakufumpula.

² Nomba uyo uwinjilila pamulyango, echembela wambelele.

³ Eye mulonda wapamulyango eswilako, nembelele shilomfwa ishiwi lyakwe ulo ashita amashina ashiko. Elo alashitanjilila kumwemfu.

⁴ Ulo ashifumya panse alashitanjilila, nembelele shilamukonka pakuti shalishiba ishiwi lyakwe.

⁵ Tashikonkapo umulwendo, kuntu shilamutina nokumubutuka pantu tashayishibapo ishiwi lyakwe.”

⁶ Yesu abebele nchi chelusho, kuntu bena tabaumfwilepo umo chalolele.

Yesu echembela uuweme

⁷ Nakambi Yesu asosele kuli bo ati, “Nachine nkomweba ati, nine mulyango wambelele.

⁸ Bonse abayishile pantanshi yanji bang’o nabakufumpula. Echo nembelele tashabomfwilepo.

⁹ Nine mulyango. Umuntu onse uwinjilila pali nebo akwisa kupuluka. Akwisa kwinjila mukati nakambi nokufuma nokusanga ichakulya.

¹⁰ Umung’o ena eshila ukwiba, ukwipaya nokonaula. Nomba nebo nalisa ukuti mwise mube nobumi, ubumi ubwinenene.

¹¹ “Nine chembela uuweme. Chembela uuweme apela ubumi bwakwe pamulandu wambelele.

¹² Umuntu uwamilimo, uutali chembela uuweme nakambi tashilipo nimbelele shakwe, ulo abona umumbulu akoyisa, alashisha imbelele nokubutuka. Echo umumbulu ulashisumaula nokushipalanganya.

¹³ Umuntu uwamilimo alabutuka pantu ye wanchito bwaka, tasakamanako naku mbelele.

¹⁴ Nomba nebo nine chembela uwawama. Nalishiba imbelele shanji, nasho shalinjishiba.

¹⁵ Ukubati nimfilya Bata banjishiba, nandibo nalibeshiba Bata. Pamulandu ngu nalipela ubumi bwanji pamulandu wambelele.

¹⁶ Eko shaba imbelele nashimbi ishanji, ishitali pali ngu mukuni. Nasho nakushileta pamo, shakumfwa ishiwi lyanji, elo shakwisa kuba mumukuni umo nachembela umo.

¹⁷ “Bata balintemwa pakuti nalitula ubumi bwanji, ukuti njise mbutole nakambi.

¹⁸ Takupo umuntu uwingafumya ubumi bwanji kuli nebo, kuntu ndabutula nemwine. Ndikwete ifiso fyakubutula, nakambi nokubutola nemwine. Nchi echo Bata bansambisha ukuti nchite.”

¹⁹ Elo mwali ukulekana mukati kabantu pamulandu waku nga mashiwi.

²⁰ Abenji abaku bo balikweba ati, “Ngu muntu ali nomupashi uubi, alifuntile! Mba nindo mukokutikilako?”

²¹ Nomba bambi balikusosa ati, “Umuntu uukwete umupashi uubi tekuti asosepo ifili nga mfi. Mba chibanda kuti chaposha shani impofu?”

Abayuda bakana Yesu

²² Yali ninshita yapamwela, nenshita ya Kulya kwa Kuwamya inanda yaku Lesa, yalifikile mu Yelusalemu.

²³ Nomba Yesu alikwenda-enda munanda yaku Lesa mulukolo lwakwa Solomoni.

²⁴ Elo abantu bamushingulukile nokumufumba ati, “Mba ninshita ndo wakuyifisulula wemwine ukuti ewe Wasubwa waku Lesa? Twebeko apabuta tuutu ukuti twilokukayika-kayikapo.”

²⁵ Yesu alibasukile ati, “Ndimubushishe kale, kuntu tamukochetekelapo. Imilimo iyo nchita mwishina lyaku Bata, eyimfisulula.

²⁶ Nangu chibe mfi tamukochetekelapo pantu tamuli bamwichinka lyambelele shanji.

²⁷ Mbelele shanji shilomfwa ishiwi lyanji, nandibo nalishishiba, nasho shilankonka.

²⁸ Elo ndashipela ubumi butashila. Tashakafwepo nakambi takupo uwingashipokolola kuli ne.

²⁹ Pantu Bata abampela bakulu ukuchila pali bonse, epo takuli umuntu nangu umo uwingashifumpula muminwe yaku Bata.

³⁰ Bata nandibo twaba umo bwaka.”

³¹ Abayuda mbalya batolele amabwe ukuti bamulase.

³² Elo Yesu asosele ati, “Nebo nchitile imilimo iinji iyawama pamenso enu iyo Bata bampele ukuchita. Pali nji yonse, mba niwisa uwo mukofwayilapo ukundashilapo amabwe?”

³³ Abayuda balyasukile ati, “Tatukofwayapo ukukulasa amabwe pamulandu wamilimo iyawama iyo uchitile, kuntu nipamulandu wakusalula Lesa. Pantu webo uli muntu bwaka, kuntu ukoyilinga ukuba Lesa.”

³⁴ Elo Yesu abasukile ati, “Chalilembwa mu Mafunde enu ukuti Lesa akoti, ‘Mwebo muli balesa’

³⁵ Lesa ayitile abo abaletele amashiwi akwe ukuti nibalesa. Ekuti Malembo Apatulika aaba akwebesha lonse.

³⁶ Nebo, Bata ba nsalile nokuntuma muno chalo. Mba nindo nomba mukonjebela ukuti nkosalula Lesa ulo nsosa ati nine Mwana waku Lesa?

³⁷ Kati nshibomba milimo yaku Bata, mwinchetekelapo iyowo.

³⁸ Nomba nga nkoyichita, nangu kati tamukonchetekelapo, chetekeleni milimo iyo nkobomba. Elo mwakwishiba ukuti Bata baba muli nebo, nandibo naba muli Bata.”

³⁹ Apa nakambi bafwayile ukumwikata, kuntu alifumpumukile muminwe yabo.

⁴⁰ Elo Yesu alibwelelemo nakambi kwishilya lyamulonga wa Yodani, apo Yohane alikubatishisha pakwamba. Eko ayile kwikala.

⁴¹ Abantu abenji bayishile kuli Ye nokusosa ati, “Yohane tachitilepo imilimo iyafiso ifikulu. Nomba ifintu fyonse ifyo asosele ifyaku ngu fyakwebesha.”

⁴² Elo abantu abenji bachetekele muli Yesu.