Yohane 1 - Chipangano Chabwangu

Ishiwi lyaaluka muntu

¹ Pakutatika, uyo uwitwa Ishiwi eko ali kale. Ali pamo na Lesa nakambi ni Lesa.

² Ukufuma bwaka pakutatika, Ishiwi ali pamo na Lesa.

³ Ukupitila muli Ye Lesa atalile ifintu fyonse. Takupo nangu chimo ichatalilwe ukwambula Ye.

⁴ Muli Ye mwali ubumi. Elo mbu bumi bwaletele kusanika kubantu.

⁵ Nku Kusanika kusanikila mumfinshi, epo nemfinshi tekuti ikushimyepo.

⁶ Lesa atumine umuntu umo, ishina lyakwe ni Yohane.

⁷ Ye ayishile ukupela bukamboni bwanku Kusanika, ukuti abantu bonse bomfwe mbu ubutumi nokuchetekela.

⁸ Yohane umwine talipo kusanika, ayishile bwaka mukupela bukamboni bwanku Kusanika.

⁹ Nku kwali ekusanika ukwinenene, ukwayisa muchalo nokusanikila abantu bonse.

¹⁰ Ishiwi ndilya lyali muchalo, nangu Lesa atalile ichalo ukupitila muli Ye, kuntu abantu tabamwishibilepo.

¹¹ Ayishile kuchalo chakumwabo, kuntu abantu tabamupokelelepo.

¹² Nomba abo abamupokelele nokumuchetekela, alibapele ifiso ifyakuba abana baku Lesa.

¹³ Ukuba abana baku Lesa takwafuminepo kubafyashi babo, nangula mukufwaya kwamuntu iyowo, kuntu bafyelwe mufiso fyaku Lesa.

¹⁴ Elo Ishiwi lyaalukile umuntu, ayishile kwikala mukati kesu uwayiwulamo ubwanshi nokwebesha. Nafwebo twabwene umuchinshi wakwe, umuchinshi wachana chimo chaku Wishi.

¹⁵ Elo Yohane amuchitile bukamboni. Alibilikishe ati, “Ngu eye nalikumweba ati, ‘Ukoyisa panuma yanji alinchilile ifiso pakuti Ye eko ali ulo ntalafyalwa.’”

¹⁶ Mubwanshi bwakwe ubukulu fwebo tulapokelela ishuko mufinji.

¹⁷ Lesa apele Amafunde ukupitila muli Mosesi, kuntu ubwanshi nokwebesha fyayishile muli Yesu Klistu.

¹⁸ Takupo umuntu nangu umo uwabona Lesa, kuntu Umwana uwafyalwa enka uwatemwekwa, uuli ni Lesa, ewatwishibishe ifyaku Lesa.

Ukubilisha kwakwa Yohane Mubatishi

¹⁹ Elo bachilolo ba Bayuda abamu Yelusalemu batumine bachipupila naba Lefi mukumufumba Yohane ati, “Kanshi webo niwe nani?”

²⁰ Yohane takenepo ukubasuka, kuntu abebele apabuta ati, “Nebo tanshilipo Uwasubwa waku Lesa.”

²¹ Bamufumbile ati. “Mba niwe nani? Napo niwe Eliya?” Yohane ayasukile ati, “Iyowo, tenepo.” Bamufumbile ati, “Napo niwe umusoseshi?” Ayasukile ati, “Iyowo.”

²² Bamufumbile ati, “Tubusheko, mba niwe nani? Twebeko ukwebati tutwale ukwasuka kuli bo abatutumine. Mba we wemwine ukoti niwe nani?”

²³ Elo Yohane abasukile ati, “Nine uwo Esaya musoseshi alembele ati, ‘Umuntu akobilikisha muchiswebebe: Wamyeni musebo waku Bashikulu, Lungamikeni inshila yabo bwino, ukuti bese bendemo Bashikulu!’”

²⁴ Abo bantu balikumufumba batuminwe na Bafalisi.

²⁵ Elo bafumbile Yohane Mubatishi ati, “Kati tewepo Uwasubwa uwaku Lesa nangula Eliya nangula umusoseshi, mba nindo ubatishisha?”

²⁶ Yohane alyasukile ati, “Nebo nkobatisha namenshi bwaka, kuntu mukati kenu emo ali umo uwimakene uwo muteshibilepo.

²⁷ Uyo uwakwisa panuma yanji, nebo tanshilingilepo nokukakula ulushinga lwankwabilo shakwe.”

²⁸ Mfi fyonse fyachitikile mumushi wa Betaniya kwitala lyamulonga wa Yodani, uko Yohane alikubatishisha.

Umwana Wambelele waku Lesa

²⁹ Pakasuba kakonkelepo, Yohane Mubatishi abwene Yesu akoyisa kuli Ye. Elo asosele ati, “Boneni, ngulya e Mwana Wambelele waku Lesa uupinta amabifyo abantu bonse!

³⁰ Ngu eye nalikumweba ati, ‘Ukoyisa panuma yanji, alinchilile ifiso pakuti Ye eko ali ulo ntalafyalwa!’

³¹ Nebo tanshamwishibilepo, kuntu nayisa mukubatisha namenshi ukuti eshibikwe kubena Isilaeli.”

³² Yohane apele bumwanamboni ati, “Nabwene Mupashi Wabuta ukoyisa ukufuma kumulu, uwapalile inkunda nokwikala pali Ye.

³³ Nangu chali mfi, nebo nshamwishibilepo ati eye. Nomba Lesa, uwantumine ukubatisha namenshi, ewasosele kuli nebo ati, ‘Ulo wakwisa kubona Mupashi Wabuta ukufuma kumulu nokwikala pamuntu, ngu eye uwakwisa mukubatisha no Mupashi Wabuta.’

³⁴ Lelo nayibwena nemwine, nakambi nkomweba ati, ngu e Mwana waku Lesa.”

Abakusambila baku Yesu abakubalilapo

³⁵ Pakasuba kakonkelepo, Yohane Mubatishi ayimakene penka pali nchilya chifulo nabakusambila bakwe babili.

³⁶ Ulo abwene Yesu akoenda, asosele ati, “Boneni Umwana wa Mbelele waku Lesa!”

³⁷ Ulo abakusambila babili baumfwile mfilya, bakonkele Yesu.

³⁸ Yesu alyalukile nokubona bakomukonka, alibafumbile ati, “Mba findo mukofwaya?” Balimwasukile ati, “Rabbi, nikwisa mwikala?” “Rabbi” (ekweba ati, “Musambishi.”)

³⁹ Yesu asosele ati, “Iseni mubone.” Nabo balile nokubona uko alikwikala. (Bayikele nakwe nkalya kasuba pakuti chali ichungulo.)

⁴⁰ Umo uwaku bo babili ni Andileya, wabo wakwa Simoni Petulo.

⁴¹ Bwangu-bwangu asangile wabo Simoni, nokumweba ati, “Twamusanga Uwasubwa waku Lesa.” (Ndi shina lyaalula ati Klistu.)

⁴² Elo bayile pamo kuli Yesu. Yesu alimuloleshe nokuti, “Ishina lyobe niwe Simoni mwana Yohane, kuntu nomba wakwitwa Kefasi.” (Ndi shina elimo na Petulo lyaalula ukuti, “Ibwe.”)

Yesu ayita Filipo na Natanayeli

⁴³ Akasuba kakonkelepo Yesu alangulukile ukuya kuchalo cha Galili. Elo asangile umwalalume uwitwa Filipo nokuti kuli Ye, “Nkonka!” (

⁴⁴ Filipo afumine ku Betesaida, mumushi mwalikwikala Andileya na Petulo.)

⁴⁵ Filipo naye asangile Natanayeli nokumweba ati, “Twamusanga uwo Mosesi alembele mwibuku lya Mafunde, nabasoseshi nabo balimulembele. Ni Yesu waku Nasaleti, mwana Yosefe.”

⁴⁶ Natanayeli alimufumbile ati, “Napo ku Nasaleti nkulya kuti kwafumapo ichintu ichiweme?” Filipo alimwasukile ati, “Isa uyibwene wemwine.”

⁴⁷ Ulo Yesu abwene Natanayeli akoyisa kuli Ye, asosele nefya kungulya ati, “Ngu mwina Isilaeli mwinenene, muli ye tamupo ubuchenjeshi!”

⁴⁸ Natanayeli alimufumbile ati, “Mba mwanjishiba shani?” Yesu amwasukile ati, “Nebo nakubwene kale ulo wayikele munshi yamukunyu ulo Filipo atalakwita.”

⁴⁹ Natanayeli alimwasukile ati, “We musambishi, niwe Mwana waku Lesa! Niwe Mfumu yaba Isilaeli!”

⁵⁰ Yesu asosele ati, “Kanshi wachetekela pakuti nakweba ati, ‘Nakubwene kale ulo wayikele munshi yamukunyu?’ Wakwisa kubona ifintu ifikulu ukuchila pali nchi!”

⁵¹ Epo asosele nakambi kuli bo ati, “Nachine, mwakwisa kubona umulu wayisuka nabangelo baku Lesa bakonina nokwikila pa Mwana wa Muntu.”