Yemusi 5 - Chipangano Chabwangu

Ukuchenjeshako abasambashi

¹ Nomba umfweni mwebo mwe basambashi! Lileni nokuma imisowa pamulandu yamachunshi ayakwisa kumuwila.

² Ububoni bwenu bwabola, nefyakufwala fyenu fyaliwa nefishishi.

³ Golide na silubale wenu fyalikwa kundalawa. Elo indalawa nshi shakupela bukamboni ubwakumupingula mwebo. Shakonaula umubili wenu kubati mulilo. Mwalonganya ububoni bwenu munshiku nshino ishakupelako.

⁴ Boneni tamulipilepo abanchito abapyungile mumabala yenu. Umfweni ukulilishika kwabo. Nachine Lesa aumfwa kulila ukwababomfi bakwe, Bashikulu Abafiso fyonse.

⁵ Mwalila pano chalo. Mwayina mukuyipekanishisha akasuba akakwipayikwa.

⁶ Mwapingula umulandu nokwipaya abantu abatakwetepo umulandu, abatamutalikilepo iyowo.

Ukutekanya pakulomba

⁷ Mwe bawesu, tekenipo imitima ukufika pakasuba ulo Bashikulu bakabwela. Boneni ifyo umulimi achita! Alalindila ukuti imbuto shiboneke mulibala lyakwe. Alateka umutima ukufikila apo yamashula-nyense neyankunta-nsoke yaloka.

⁸ Namwebo tekeni imitima yenu, koseni pakuti Bashikulu bali mupepi nokwisa.

⁹ Mwe bawesu, mwilokuyilishanyapo umo nomunakwe ukwebati mwikapingulwa. Boneni, uwakupingula alimakene pamulyango.

¹⁰ Mwe bawesu, ibukisheni ifyabasoseshi abasosele mwishina lyaku Bashikulu. Nangu balikuchushiwa, batekele imitima.

¹¹ Tubeta ati, “Abashuka,” pantu bashipikishe. Mwalyumfwa ukushipikisha kwakwa Yobe, nakambi mwalibona ifyo Bashikulu bamuchitile kumupwilo! Pakuti Bashikulu bachisa nenkumbu.

¹² Nomba ukuchilapo muli fyonse, mwe bawesu, mwilokulapapo iyowo. Mwilokulapapo ati, “Nakumulu!” Nangula ati, “Napanonshi!” Nomba musose bwaka ati, “Ina,” mukusuminisha, nangula, “Iyowo,” mukukana ukwebati Lesa emupelapo umulandu.

¹³ Napo umbi pali mwebo akochula? Kalombe. Napo umbi akosekelela? Kayimbe inyimbo ishakulumbanya.

¹⁴ Napo umbi pali mwebo akolwala? Eteko abakulu bachilonganino abakwisa kumulombela nokumusuba amafuta mwishina lyaku Bashikulu.

¹⁵ Nga balomba nechichetekelo, umulwele akupola. Bashikulu bakumwimya. Nga achitile ifibi, fyonse fyakunakililwa.

¹⁶ Echo fisululeni amabifyo enu onse kuli bawenu nokulombela umo nomunakwe. Ukulomba kwamuntu uwakaele kwalikwata ifiso ifikulu.

¹⁷ Eliya ali umuntu ukubati nifwebo. Alombele ukwebati imfula iiwa. Nachine imfula tayawilepo pamyaka itatu nemyeshi isano naumo.

¹⁸ Elo panuma alilombele, nemfula yalilokele. Umushili watatikile ukumesha ifilimwa fyonse.

¹⁹ Mwe bawesu, nga uwakumwebo aluba nokusha ifyachine, umunakwe amubweshe.

²⁰ Mwishibe nchi: onse ubwesha umuntu uwaluba munshila yakwe iibi akupulusha ubumi bwamuntu ngulya kumfwa, elo nefibi fyakwe ifinji fyakunakililwa.