Yemusi 4 - Chipangano Chabwangu

Buchibusa nechalo chapanonshi

¹ Kanshi inkondo nokutalikana pakati kenu fifuma kwisa? Napo tafifumapo kulunkumbwa ulwabuntunse bwenu ulukochita inkondo muli mwe?

² Mulafwaya ifintu, kuntu tamufisangapo iyowo, elo mulepaya. Mulafimbila ukukwata ifintu, kuntu tamufisangapo iyowo. Elo mulachita inkondo nokulaka. Mulafilwa ukukwata ifyo mufwaya, pantu tamulombapo kuli Lesa.

³ Nangu amwalomba tamupokelapo, pantu tamulombapo bwino. Ifyo mulomba mufwaya ukuposa bwaka pafintu ifingamusangalasha epela.

⁴ Mwe bantu abatachetekelwapo! Napo tamwishibilepo ukwebati buchibusa nefintu ifyapanonshi kupatana na Lesa? Echo umuntu uufwaya ifyabuntunse kapondo kaku Lesa.

⁵ Napo mukolanguluka ukwebati Amalembo asosa ifyabwaka ulo ati, “Lesa afwayisha nobufuba umupashi uwo abikile ukuti wikale muli fwebo?”

⁶ Nomba alatukwatila ubwanshi ukwinekantu. Echo Amalembo asosa ati, “Lesa alatalika abayikusha, kuntu alakwatila ubwanshi abafuuka.”

⁷ Nomba mube abachumfwila kuli Lesa. Mukaneni Satana, elo akumubutuka.

⁸ Palamineni kuli Lesa, elo naye akupalamina kuli mwebo. Lekeni ububi mwe mbifi. Wamyeni imitima yenu, mwe bamitima iibi.

⁹ Umfweni ichikonko ichabulanda, mwikale nkumba-bulili nokulila. Ukuseka kwenu nako kwaluke ukulila, ukusangalala kwenu kwaluke ubulanda.

¹⁰ Mube abafuuka kuli Bashikulu, elo akumusumbula.

Belokupingulana

¹¹ Bawesu, mwilokulengululapo abanenu. Onse uulengulula umunakwe nangula ukumupingula, ekwebati alengulula nokupingula ifunde lyaku Lesa. Nomba nga wapingula ifunde lyaku Lesa, ekwebati taukolilamapo iyowo, kuntu ukolipingula bwaka.

¹² Lesa enka ewupela amafunde nokuyapingula. Ewingapulusha nokonaula. Nomba we, mba niwebo nani uukopingula umunobe?

Belokwikushapo nefyamailo

¹³ Nomba umfweni kuli ne mwe basosa ati, “Lelo nangula mailo twakuya kumusumba wakuti, tukekaleko umwaka umo. Elo tukachiteko amakwebo nokunonka ifyuma ifinji.”

¹⁴ Mwebo tamwishibilepo nefyamailo. Nga ubumi bwenu chindo? Buli ukubati chushi ichiboneka panshita nokupalangana chapalangana.

¹⁵ Ifyo mulingile ukusosa nimfi, “Nga kufwaya kwaku Bashikulu, twakwisa kuchita mfi namfi.”

¹⁶ Kubati ifyo chili nomba, mulayikusha nokwitakisha. Ukuyikusha konse ukwa mfi kubi.

¹⁷ Echo umuntu onse uwishibile ifyo alingile ukuchita, elo tafichitapo, alabifya.