Yemusi 3 - Chipangano Chabwangu

Ifyalulimi

¹ Mwe bawesu, tatulingilepo bonse ukuba abasambishi iyowo. Mwalishiba ukuti fwe basambishi akutupela umulandu ukuchila abantu bambi.

² Pakuti bonse tulabifya mufintu ifinji. Nga umuntu tabifyapo mukusosa kwakwe, ekwebati ali uwalungama ukufikapo. Elo kuti asunga umubili wakwe onse.

³ Tulabika inkobelo mukanwa kakabalwe ukuti atuumfwile, elo tumwalule umubili wakwe onse.

⁴ Nga mwalanguluka ifyaba ingalaba! Nangu chikulu mfilya nokwenda kuchipupu, kuntu akakwalulilako konse uko uwakuyensha akofwaya kanini bwaka.

⁵ Efyo nolulimi lunini bwaka, kuntu lulayitakisha ukuchita ifintu ifikulu. Boneni ifyo akamulilo akanini efyo kangocha ichamushitu ichikulu.

⁶ Nalo ululimi lwaba kubati mulilo. Chalo ichayiwulamo nobubi. Luli pakati kafilewa ifyamubili wesu. Elo lulambukisha ububi bwaluko kumubili onse. Lulocha imikalile yesu yonse nomulilo uwisa kuli lo ukufuma kuchifulo chamulilo uutashimapo.

⁷ Umuntu kuti ateka imitundu iyanama yonse, ifyuni, ifikula panshi nefyamumenshi. Elo akufiteka nachine.

⁸ Nomba tapapo umuntu nangu umo uwatekapo ululimi. Luubi, elo talwikatika. Lwaliwula ubusungu.

⁹ Nikululimi kwenka eko tulumbanishishako Bashikulu na Bata. Elo nolulimi lwenka, tulatipwilako abantu abo Lesa abumbile muchimpasho chakwe.

¹⁰ Amashiwi akutotela namashiwi akutipwila afuma mukanwa kamo kenka. Bawesu, mfi tafilingilepo ukuchitika iyowo.

¹¹ Napo pakamfuku-mfuku kamo kuti pafuma amenshi aatalele nayamuchele?

¹² Bawesu, napo umukunyu kuti watwala ama Olife, nempesha ukutwala umukunyu? Munshila imo yenka, napo akamfuku-mfuku akamuchele kuti kafumya amenshi ayaweme?

Ifyamulangwe uufuma kumulu

¹³ Ninani pali mwe uuli nomulangwe nokumfwikisha? Ayilange enka ukupitila mumikalile yakwe iiweme, namuli mfilya achita ifyamulangwe mukuyichefya.

¹⁴ Nomba kati muli nomutima uwabufuba nokuyitemwa, mwilokuyitakishapo nangula ukutalikishanya pafyachine mukubepa ubufi.

¹⁵ Umulangwe wamusango ngu tawufumapo kumulu iyowo, kuntu wapanonshi, wabuntunse uufumu kumupashi uubi.

¹⁶ Pantu apali ubufuba nokuyitemwa, pali ifimfulunganya nemilimo yonse iibi.

¹⁷ Nomba umulangwe uufuma kumulu waba uwalungama ukufikapo, elo wamutende, uwafuuka, tautalikishanya, uwayiwula nenkumbu, elo nemilimo iiweme. Taukwetepo akapatulula nangu ukutumpayika.

¹⁸ Elo ubulungami ebulobololo bwabantu ababyala mumutende.