Yemusi 2 - Chipangano Chabwangu

Ukubachenjeshako kukapatulula

¹ Mwe bawesu, pakuti mulachetekela muli Bashikulu Yesu Klistu ababuleme, mwikwatapo akapatulula.

² Kwati: nga umuntu umo ayinjila uufwite akalinda-munwe akagolide nefyakufwala ifiweme. Elo nomuchushi ayinjila, uufwite insamu.

³ Ulo mupela umuchinshi kuufwite bwino nokumweba ati, “Kabekale mpa pamupando apaweme bamfumu.” Nomba uwachula mwamweba ati, “Kemakane mpalya.” Nangula, “Ikala mpa kumolu yanji,”

⁴ napo pakuchita mfi tamwishibilepo ukwebati mukoyikwatila akapatulula mwenka nokwipingula namalangulushi aabi?

⁵ Umfweni mwe bawesu abatemwekwa! Napo Lesa tasalilepo abo ababoneka abachushi kubantu ukuti bakabe abasambashi muchichetekelo chabo? Napo tabasalilepo ukuti bapokelele ishuko ilyo alayile ukupela abamutemwa?

⁶ Nomba mwebo mulasula abachula! Napo tebasambashipo abamubutausha nokumutwala munanda yabupingushi?

⁷ Napo temba benka abasuula Ishina lyachindama ilyo mwayinikwe?

⁸ Elo nga mwalama ifunde lyaku Bashikulu ilyalembwa mu Malembo ati, “Ulokutemwa umunobe kubati nimfilya wayitemwa wemwine,” mwachita ichiweme.

⁹ Nomba nga mwakwata akapatulula ekwabati mwalufyanya. Elo Amafunde aku Lesa akumupingula ukuba bampula-mafunde.

¹⁰ Pakuti nga umuntu aalama onse, kuntu atobapo limo, epela ali nomulandu wakutoba onse.

¹¹ Pakuba Lesa uwasosele ati, “Wichitapo ubuchende,” eye uwasosele nakambi ati, “Wiyipayapo.” Nomba nga tauchitilepo ubuchende, kuntu wayipaya, ekwebati watoba amafunde onse.

¹² Echo musose nokuchita ifintu ukubati bantu abo Lesa akupingula namafunde ayo ayamupela ubwanalale.

¹³ Pakuti umuntu uupingula ukwambula inkumbu, Lesa naye akumupingula ukwambula inkumbu. Nomba Ye uukwatila inkumbu, tapapo umulandu wakuti engatinapo ukupingula kwaku Lesa.

Ichichetekelo nemilimo

¹⁴ Mwe bawesu, nindo chikoyafwilisha nga umuntu akososa ati, “Ndi nechichetekelo,” kuntu tapapo imilimo achita? Napo ichitekelo chamfi kuti chamupulusha?

¹⁵ Kwati: nga muwesu umo nangula inkashi yesu tayikwetepo ifyakufwala nangula ifyakulya,

¹⁶ elo umo uwaku mwebo amweba ati, “Kabiye umutende! Mukayifwite nokulya,” ukwambula ukubapela ifyo bakokabila. Nindo chikoyafwilisha?

¹⁷ Echo, ichichetekelo ichambula imilimo iiweme, chalifwa.

¹⁸ Nalimo umbi kuti asosa ati, “Webo ulikwete ichichetekelo, elo nebo ndi nemilimo iiweme.” Nebo kuti nasosa ati, “Nangako ichichetekelo chobe ichambula imilimo, kuntu nebo nemilimo yanji nkokulanga ichichetekelo chanji.”

¹⁹ Mwebo muchetekela ukwebati Lesa umo bwaka. Chiweme! Nayo imipashi iibi ilachetekela nokututuma kumwenso.

²⁰ We kapepetoyi! Napo ukofwaya ichakubwenako ukuti ichichetekelo ichambula imilimo chabwaka?

²¹ Napo Abulahamu ichikolwe chesu tasekeshepo Lesa pamulandu wamulimo achitile ulo aapele umwana wakwe Isake ngepupo?

²² Boneni ukuti ichichetekelo chakwe nemilimo fyalibombele pamo. Ukupitila mumulimo wakwe, ichichetekelo chakwe chalifikilepo.

²³ Echo fyalifikilishiwe ifyo Amalembo asosele ati, “Abulahamu alichetekele muli Lesa, elo Lesa amulungamikile.” Elo Lesa ayitile Abulahamu ukuti nichibusa wakwe.

²⁴ Nomba mwabona ukuti umuntu alasekesha Lesa kufyo achita, tepachichetekelopo chenka iyowo.

²⁵ Munshila imo yenka, naye Lahabu uwabuchende ngulya asekeshe Lesa pamulandu wamilimo yakwe ulo apokelele inengu nshilya nokushipisha inshila imbi.

²⁶ Echo kubati mubili uwambula umupashi waba uwafwa, efyo nechichetekelo ichambula imilimo chili ichafwa.