Ukufisulula 9 - Chipangano Chabwangu

¹ Umungelo uwachisano alilishishe ulupenga lwakwe. Elo nabwene ulutandala lwaliwile panshi. Lwapelwe ulufungulo lwachilindi ichitapela.

² Elo ulutandala lwayiswile ichilindi. Palifulikile ichushi kubati chushi ichikofuma mwilungu lyamulilo. Elo akasuba neulu fyalifitile pamulandu wachushi ichalikufuma muchilindi.

³ Muchushi mulya mwalifumine inshe nokwisa ikala panshi. Elo fyalipelwe ifiso kubati fyatumini.

⁴ Elo shalikanishiwe ukuonaula isani, ifiti nangula ichimena ichili chonse. Shalisuminishiwe bwaka ukuchusha abantu abatakwetepo ichishibilo chaku Lesa pampumi shabo.

⁵ Tashaebelwepo ukubepaya iyowo, kuntu ukubachusha ukwinekantu imyeshi isano. Ubukali bwashiko bwalilingene nobulembe bwakamini akasuma umuntu.

⁶ Elo munshiku shisano nshilya, abantu bakufwaya-fwaya imfwa, kuntu tabakayisangepo. Bakufwayisha ukufwa, kuntu imfwa yakubabutuka.

⁷ Inshe nshilya shalikuboneka kubati nibakabalwe abayipekanya kunkondo. Pamitwi yashiko pali ifyalikuboneka kubati ningala shagolide. Pafinso fyashiko fyalikuboneka kubati bantu.

⁸ Imishishi yasho yalilepele kubati yabanakashi. Elo ameno yashiko yali kubati yankalamo.

⁹ Pafibuba fyashiko pali amalaya ayakuchingilila kubati fyela. Elo ukupapala kwamapindo yashiko kwali kubati machelete ayenji ayakotintwa nabakabalwe ukuya kunkondo.

¹⁰ Inshe nshilya shakwete imichila iyalikuluma kubati kamini. Mumichila nji, emwali ifiso fyashiko ifyakuchusha abantu kwamyeshi isano.

¹¹ Shalikwete imfumu iyakushiteka. Nji mfumu mungelo ulolekesha pachilindi. Ishina lyakwe mu Chihebele ni Abadoni, elo mu Chigiliki ni Apoliyoni (ekwebati, “Wabonaushi.”)

¹² Ichinkunka chakutatika chilipitile, kuntu ichabubili chili apepi nokwisa.

¹³ Umungelo wachisano na umo alilishishe indibu yakwe. Elo naumfwile ishiwi ilikofuma mufifuntu fine ifyachakupupilila ichagolide ichaba pachinso chaku Lesa.

¹⁴ Ishiwi ndi lyasosele kumungelo wachisano na umo uyo uwakwete ulupenga ati, “Kakula abangelo bane abo abakakilwe panika ikulu iya Yufuletisi!”

¹⁵ Abangelo bane mbalya abayipekenye pali njilya nshita, akasuba, umweshi nomwaka balibakakwile ukwebati balofye ichiputulwa chalenga butatu ichabantu.

¹⁶ Elo banjebele ukuti impendwa yabashilikali ababomfya bakabalwe yali imitapendwa imyanda ibili.

¹⁷ Muchimonwa nchi nalibwene bakabalwe nabakwelelepo. Balikwete ingabo ishaswetele chee kubati mulilo, nakambi shalikuboneka kubati libwe ilifitulukile nokubati libwe lyasilubale ilyatufi twalucheche. Imitwi yabakalwe yalikuboneka kubati yankalamo. Elo mutumwa twabo mwalikufuma mulilo, ichushi namabwe asilubale.

¹⁸ Ichiputulwa chimo ichalenga fitatu ichabantu chalipayilwe kumachushi nga atatu: umulilo, ichushi namabwe ayasilubale ayalikufuma kutunwa twabakabalwe mbalya.

¹⁹ Ifiso fyabakabalwe fyali mutunwa namumichila yabo. Imichila yabo yalikuboneka kubati ninsoka, yalikwete nemitwi iyo balikubomfya ukuchena abantu.

²⁰ Elo kwashele abantu bambi abatayipelwe kufinkunka mfilya. Nangu chali mfi, tabalapilepo nokuleka ifyo bayipangile abene. Tabalekelepo ukulambila imipashi iibi, tungosa wakubasa utwagolide, silubale, umukuba, amabwe nefiti, ifyo ifitabona, ifitomfwa nokutenda.

²¹ Abantu mbalya tabalapilepo nokuleka ukwipaya, ubuloshi, ubulale-lale, elo nabung’o.