Ukufisulula 8 - Chipangano Chabwangu

Ichishibilo chalenga fisano na fibili

¹ Ulo Umwana wambelele ashilile ukukambatula ichishibilo chalenga fisano na fibili, kumulu kwatalalile chelele panshita iilingile.

² Elo nalibwene abangelo basano na babili abaimakene pachinso chaku Lesa, balikupelwa amapenga asano na abili.

³ Umungelo umo alishile nokwimakana pambali yachipupilo. Alikwete ichakubikilapo utwanunkila ichagolide. Alipelwe notwanunkila utwinji ukuti apupile pamo nokulomba kwabantu bakwe bonse pachipupililo chagolide pantanshi yamupando waku Lesa.

⁴ Elo ichushi ichatwanunkila utwaochelwe chayile kumulu pamo nokulomba kwabantu bakwe ukufuma mukuboko kwamungelo uyo uwayimakene pantanshi yamupando waku Lesa.

⁵ Penkapo umungelo ngulya alipintile ichakubikilapo utwanunkila ntulya, achiwile namafyanga ayamulilo ayafuma pachipupilo nokuyaposa panshi. Bwangu-bwangu, kwali ukubuluma, ukubulukuta, inkuba, elo nechikukumo.

Ifyandibu

⁶ Penkapo abangelo mbalya basano na babili bakwete amapenga asano na abili balipekenye ukulisha.

⁷ Umungelo uwakutatika alilishishe indibu yakwe. Elo kwayishile imfula-mabwe nomulilo ifyasankanishiwa nomulopa. Mfi fyaliposelwe panonshi. Elo ichiputulwa chimo ichalenga fitatu ichachalo chalipile, nechiputulwa chimo ichalenga fitatu ichafiti nacho chalipile pamo nesani lonse ilibishi.

⁸ Umungelo wabubili alilishishe indibu yakwe. Elo ichintu ichiboneka kubati lupili ulukoyaka umulilo chaliposelwe muli bemba. Elo ichiputulwa chalenga fitatu chaalukile umulopa.

⁹ Ichiputulwa chalenga fitatu ichafyabumi fyamumenshi chalifile. Elo nechiputulwa chalenga fitatu ichamato chalyonayikilwe.

¹⁰ Umungelo wabutatu alilishishe indibu yakwe. Elo ulutandala ulukosanika kubati mwenje lwaliwile ukufuma kumulu. Lwaliwile pachiputulwa chimo ichalenga fitatu ichanika, elo namutumfuku-mfuku.

¹¹ Ulutandala ndulya lwalikwitwa “Kulula.” Elo ichiputulwa chimo ichamenshi ichalenga fitatu ichanika chasangukile ichalula. Echo abantu abenji balifwile pamulandu wakunwa amenshi ngalya pakuti aali ayalula.

¹² Umungelo wachine alilishishe indibu yakwe. Elo ichiputulwa chimo ichalenga fitatu icha kasuba, umweshi nentandala balifipamine. Ulo fyachitikile mfi, ichiputulwa chimo-chimo ichafintu mfi, chalifitile. Elo tapalipo ukusanika pachiputulwa chimo ichalenga fitatu ichakasuba, nechiputulwa chimo ichalenga fitatu ichabushiku.

¹³ Nalilolekeshe nokubona ulukoshi lukopapala nakambi lukobilikisha ati, “Obe! Obe! Obe kubantu abapanonshi. Chakubabipila ukwinekantu ulo abangelo batatu mbalya abashala bakwisa kulisha amapenga abo!”