Ukufisulula 7 - Chipangano Chabwangu

Abena Isilaeli 144,000

¹ Panuma yaku mfi nabwene abangelo balimakene mufifuntu fine ifyapanonshi. Balikete imyela shine ukuti yipupila panshi nangula muli bemba nangula pachiti ichili chonse.

² Elo nabwenepo umungelo naumbi uwafumine kumutule-suba, ali nechishibilo chaku Lesa uwabumi. Abilikishe neshiwi ilikulu kubangelo bane mbalya abo apele ifiso fyakonaula ichalo namenshi amuli bemba.

³ Umungelo ngu asosele ati, “Mwionaula chalo, bemba nangula ifiti ukufikila ulo nakulemba ifishibilo pampumi shabapyungi baku Lesa wesu.”

⁴ Elo naebelwe ukuti impendwa yabantu mbalya abalembelwepo ichishibilo chaku Lesa pampumi shabo bali 144,000. Mba bafumine kumitundu yabena Isilaeli, ikumi na babili.

⁵ Abalembelwepo ichishibilo nimba: Abamutundu wakwa Yuda bali amakana ikumi na abili. Abamutundu wakwa Lubeni bali amakana ikumi na abili. Abamutundu wakwa Gadi bali amakana ikumi na abili.

⁶ Abamutundu wakwa Asha bali amakana ikumi na abili. Abamutundu wakwa Nafutali bali amakana ikumi na abili. Abamutundu wakwa Manase bali amakana ikumi na abili.

⁷ Abamutundu wakwa Simoni bali amakana ikumi na abili. Abamutundu wakwa Lefi bali amakana ikumi na abili. Abamutundu wakwa Isaka bali amakana ikumi na abili.

⁸ Abamutundu wakwa Sebuloni bali amakana ikumi na abili. Abamutundu wakwa Yosefe bali amakana ikumi na abili. Abamutundu wakwa Benjameni bali amakana ikumi na abili.

Ibumba ilikulu lyabantu mushitapendwa

⁹ Panuma yaku mfi nabwene ibumba ilikulu ilyabantu ilitangapendwapo. Abantu mba bafumine kumitundu yonse iyabantu, kumishobo yonse, kufyalo fyonse, elo nakumilaka yonse. Bayimakene pantanshi yamupando wabufumu napa Mwana wambelele. Balikwete notunchindu mumaboko yabo.

¹⁰ Balibilikishe neshiwi ilikulu ati, “Lesa echipulusho chesu uwayikala pamupando naku Mwana wambelele!”

¹¹ Elo abangelo bonse balimakene ukushinguluka umupando wabufumu nabachilolo pamo nefyabumi fine mfilya. Abangelo mbalya baliwile ubukupeme pantanshi yamupando nokulomba Lesa,

¹² ati, “Ameni! Tutondayishe Lesa wesu nokumupela ubuleme, umulangwe, ukutotela, umuchinshi, ifiso namaka umuyayaya. Ameni!”

¹³ Penkapo umo uwabachilolo mbalya alimfumbile ati, “Nga mba abafwite imingila iitubile nibani? Elo bafuma kwisa?”

¹⁴ Nebo nayaswike ati, “Bashikulu mwe mwishibe nimwebo.” Elo anjebele ati, “Mba ebali mumachushi aakulu ngalya. Balichapa iminjila yabo nokuyitubisha mumulopa wa Mwana wambelele.

¹⁵ Echo bali pantanshi yamupando wabufumu bwaku Lesa, balamulomba akasuba nobushiku munanda yakwe. Ngulya uwayikala pamupando wabufumu bakuba nakwe nokubachingilila.

¹⁶ Mba tabakomfwepo insala nangula ichilaka. Tabakachulepo kukasuba nangula ukupya nechikabilila ichili chonse.

¹⁷ Pakuti Umwana wambelele uuli pakati kamupando wabufumu, akuba chembela wabo nokubatungulula kutumfuku-mfuku twamenshi ayapela ubumi. Lesa akubasumuna iminsoshi yonse kumenso yabo.”