Ukufisulula 6 - Chipangano Chabwangu

Umwana wambelele akambatula ifishibilo

¹ Elo nabwene Umwana wambelele akokambatula ifishibilo chimo-chimo ichakumfilya fisano na fibili. Bwangu-bwangu naumfwile chimo mufyabumi chikososa neshiwi ilikulu kubati kubuluma kwamfula likoti, “Isa!”

² Ulo naloleseshe, nabwene kabalwe wabuta. Uwakwelelepo ali utubile. Elo alipelwe ingala iyabufumu. Ayishile kuboneka nikachimfya uwakuchimfya bambi.

³ Ulo Umwana wambelele ashilile ukukambatula ichishibilo ichabubili, naumfwile ichabumi ichakulenga fibili chikoti, “Isa!”

⁴ Penkapo kwalishile kabalwe umbi, uswetelele. Uwakwelelepo apokelele ifiso ifyakuleta inkondo panonshi, ukuti abantu balokwipayana benka. Alipelwe nomwele uukulu.

⁵ Ulo Umwana wambelele ashilile ukukambatula ichishibilo ichabutatu, naumfwile ichabumi ichalenga butatu chikoti, “Isa!” Elo naliloleseshe nokubona kabalwe uufitile. Uwakwelelepo akwete ichakupiminako muminwe yakwe.

⁶ Elo naumfwile kubati lishiwi ukufuma kufyabumi fine mfilya ilikoti, “Ichipimo chatiligu ichikumanina umuntu umo pabushiku, umutengo wakwe malipilo yamuntu pabushiku bumo. Elo ifipimo fitatu ifyamale, umutengo umo wenka. Nomba mwikonaulapo amafuta nangula waini.”

⁷ Ulo Mwana wambelele ashilile ukukambatula ichishibilo chabune, naumfwile ichabumi ichachine chikoti, “Isa!”

⁸ Elo naliloleseshe nokubona kabalwe uwatubulukile. Uwakwelelepo alikwitwa Imfwa, elo imanda yabafwa yalikukonka panuma. Mba balipelwe ifiso ifyakwipaya muchiputulwa chimo ichafiputulwa fine ifyachalo, ukupitila mukuleta inkondo, insala, amalwele nefiswango.

⁹ Ulo Umwana wambelele ashilile ukukambatula ichishibilo ichachisano, kunshi yachakupupila nabwene imipashi yabantu abayipayilwe pamulandu wakusambisha Amashiwi aku Lesa pakuba abachetekela palibukamboni bwabo.

¹⁰ Babilikishe neshiwi ilikulu bati, “Bashikulu abachine, mwakubalekelela ukushinta lwisa ukubapingula nokubakanda abantu abekala panonshi abo abatwipeye?”

¹¹ Penkapo umo-umo waku bo alipelwe umwingila uwabuta. Elo alibebele ukuti balokutushako panini ukufikila ulo abapyungi banabo nabawabo bepayikwe kubati nibo.

¹² Ulo Umwana wambelele ashilile ukukambatula ichishibilo ichashisano na chimo, palichitikilepo ichikukumo ichikulu. Akasuba kalifitile fititi kubati ninsalu yakafifi, nomweshi nawo waliswetele chee kubati mulopa.

¹³ Intandala shaliponene panshi kubati kulukuta kwamapompomena nga kuli ichipupu ichikulu.

¹⁴ Umulu nawo walilubile kubati nimpasa bapomba. Elo ulupili ululi lonse nechishi ichili chonse fyatelele mufifulo fyafiko.

¹⁵ Penkapo bakalonga abapanonshi nentungulushi, abakulu babashilikali bonse, ababuboni nabafiso, abasha nababwanalale bayile fisama munchengo namumabwe ayamumpili.

¹⁶ Elo baebele impili namabwe ati, “Tuponeneni nokutufisa ukufuma kuli Ye uwikele pamupando uwabufumu nokutupulusha kubukali bwa Mwana wambelele!

¹⁷ Echo akasuba kabukali bwabo kalifikile, mba ninani uwingalwishanya nako?”