Ukufisulula 5 - Chipangano Chabwangu

Ibuku no Mwana wambelele

¹ Nalibwene ibuku mukuboko kwamulyo kwaku ngulya uwayikala pamupando wabufumu. Ibuku ndi lyalembelwepo mukati nakunse, nakambi lyakambikilwe nefishibilo fisano na fibili.

² Penkapo nalibwene umungelo wafiso uwali kusosa neshiwi ilikulu ati, “Ninani uungakambatula ifishibilo mfi ukuti akupule ibuku ndi?”

³ Nomba tapalipo nangu umo kumulu, nangula panonshi, nangula panshi yachalo uwakukupukula ibuku ndi nokubona ifyalimo.

⁴ Nalililile ukwinekantu pakuti tapalipo nangu umo uwalingile ukukupukula ibuku ndilya nangula ukubonamo mukati.

⁵ Elo umo uwabachilolo mbalya alinjebele ati, “Wililapo! Bona! Inkalamo iyafuma kumushobo wakwa Yuda, uwakumukowa wakwa Davide ewachimfya. Echo ye kuti akupukula ibuku nokukambatula ifishibilo fyaliko fisano na fibili.”

⁶ Panuma yaku mfi, nabwene Umwana wambelele uwayimakene pakati kamupando wabufumu nefyabumi fine mfilya filimushingulukile, pamo nabafilolo amakumi abili na bane. Umwana wambelele ngulya alikuboneka kubati balimwipeye. Alikwete insengo shisano na shibili nakambi amenso asano na abili yali mipashi yaku Lesa isano na ibili iyatuminwe muchalo chonse.

⁷ Umwana wambelele ngulya alimakene nokupoka ibuku mukuboko ukwamulyo ukwaku ngulya uwabufumu.

⁸ Ulo ashilile ukupoka ibuku, ifyabumi fine mfilya nabachilolo amakumi abili nabane, balifukeme pantanshi ya Mwana wambelele. Umo pali bo alikwete isese nembakuli ishagolide ishayiwilemo notwanunkilila bwino. Ukununkila nkulya kwali kulomba kwabantu baku Lesa.

⁹ Balikwimba nolwimbo ulwabwangu ati, “Niwebo uulingile ukupoka ibuku ndi, nokukambatula ifishibilo fyaliko. Pakuti niwebo bayipeye, mumfwa yenu mwashitile abantu, ukuti babe abantu baku Lesa abafuma kumishobo yonse, kundimi shonse, kumutundu wonse, elo nakuchalo chonse.

¹⁰ Mwalibaalula ukuba imfumu, nabachipupila abakubombela Lesa wesu. Echo bakutungulula panonshi.”

¹¹ Panuma nalibwene umunshipendwa wabangelo. Balimakene ukushinguluka ichipuna ichabufumu. Elo ifyabumi fine mfilya nabachilolo mbalya,

¹² nalibomfwile bakoyimba nokubilikisha amashiwi ati, “Umwana wambelele uyo bayipeye, ewulingile ukupokelela ifiso, ububoni, umulangwe, amaka umuchinshi, ubuleme nokutondayisha.”

¹³ Nakambi nalyumfwile ifibumbwa fyonse mumulu, panonshi, napanshi yachalo, muli bemba nefintu fyonse ifyaba mumulenga-lenga fikoyimba ati, “Kuli uyo uwayikala pamupando wabufumu, naku Mwana wambelele bamutondayishe nokupela umuchinshi, ubuleme, elo nefiso umuyayaya!”

¹⁴ Ifyabumi fine fyalyasukile ati, “Ameni.” Penkapo bachilolo balifukeme panshi nokulambila.