Ukufisulula 4 - Chipangano Chabwangu

Ifyo balomba kumulu

¹ Elo nabwene umulyango uwisukile kumulu. Penkapo nalyumfwile ishiwi ndilya naumfwile pakutatika ilyo ilyali kusosa kuli ne kubati kulila kwalupenga, likoti, “Isa nkuno, nina nkuno, ukuti njise nkulange ifyakwisa kuchitika panuma yaku mfi.”

² Penkapo, naliwile no Mupashi Wabuta. Kumulu nkulya nalibwene umupando wabufumu, elo nomuntu umo alikelepo.

³ Umuntu ngu uwayikele pamupando ngulya, ichinso chakwe chalikuboneka kubati libwe ilikobeka nelibwe iliswetele chee. Elo umupando washingulukilwe nenkongolo iyalikuboneka katapa-katapa.

⁴ Ukushinguluka umupando ngu uwabufumu, pali mipando nayimbi iyabufumu amakumi abili na ine. Elo pamipando njilya palikele bachilolo amakumi abili nabane abafwite ifyakufwala ifitubile. Kumitwi yabo balifwite ingala shagolide.

⁵ Mumipando nji mwalikubyata kampeshi-mpeshi, nokululuma nechiwunda. Pantanshi yamupando ngu pali kusanika kwanyali isano na ibili. Nji emipashi yaku Lesa isano na ibili.

⁶ Elo pantanshi yamupando ngu wenka, pali ichalikuboneka kubati menshi ayamuli bemba ayakoboneka kubati libwe ilikobeka. Elo kwali ifyabumi fine ifyayimakene mumbali shine shonse ishamupando wabufumu ngulya. Fyalikwete amenso ayenji, kuntanshi nakunuma.

⁷ Ichabumi ichakutatika chalikuboneka kubati ninkalamo, ichachibili chalikuboneka kubati mulume wang’ombe, ichabutatu chakwete ichinso ichalikuboneka kubati chamuntu, nechalenga chine chalikuboneka kubati lukoshi ulukopalala.

⁸ Ichabumi chonse chakwete amapindo asano na limo ayayiwile namenso konse-konse, mukati nakunse. Akasuba nobushiku fyalikwimba ukwambula ukutusha ati, “Uwabuta, Uwabuta, Uwabuta, Shikulu Lesa Uwafiso fyonse, Uwalipo, Ulipo nakambi Uwakubako.”

⁹ Ulo ifyabumi fine mfilya fyalikupela ubuleme, umuchinshi nokutota kuli ngulya uwayikele pamupando wabufumu, uwabumi umuyayaya,

¹⁰ bachilolo amakumi abili na bane mbalya balafukama pamenso yawayikala pamupando wabufumu nokulomba. Ngu ewaba nobumi ubutapwapo. Elo balaposa ingala shabo pantanshi yamupando ngu nokusosa ati,

¹¹ “Bashikulu Lesa wesu, nimwebo mulingile ukupelwa ubuleme, umuchinshi nefiso, pakuti nimwe mwabumbile ifintu fyonse. Pamulandu wakufwaya kwenu, fyonse fyalilengwa nakambi epo fichili.”