Ukufisulula 3 - Chipangano Chabwangu

Kalata balembele abena Sadisi

¹ “Uutangilila ichilonganino chaku Sadisi umulembele: “Nga mashiwi aafuma kuli uyo uwakwata Imipashi yaku Lesa isano na ibili nentandala shisano na shibili. Ye akoti, Nalishiba imilimo yobe. Elo walishibikwa ukuba wabumi, kuntu walifwa kale.

² Echo buka, ikatisha icho wakwata ulo tachilapwililika ukufwa. Ndibwene ukuti imilimo yobe tayilipo iiweme pachinso chaku Lesa wanji.

³ Nomba languluka ifyo wasambilile nokumfwa. Ufiikatishe nakambi ulapile. Nga tawabuke nakwisa kubati mung’o nakambi tawakeshibepo inshita iyo nakwisa kuli webo.

⁴ Nomba epo bali abanini mu Sadisi abatafitishapo ifyakufwala fyabo. Bakwenda nandibo pamo balifwite ifitubile tuutu, pakuti balilingile ukuchita mfi.

⁵ Bonse abakuchimfya, bakufwala mfi ifibutile tuutu, amashina abo nshakafutepo mwibuku lyabumi. Nakubilisha amashina abo kuli Bata nabangelo bakwe.

⁶ “Uyo uuli namatwi, omfwe ifyo Mupashi Wabuta ukososa kufilonganino!

Kalata balembele abena Filadelufiya

⁷ “Uutangilila ichilonganino chaku Filadelufiya umulembele: “Nga mashiwi aafuma kuli uyo Uwabuta nowachine. Alikwete ulufungulo lwakwa Davide. Engulya uwakuti nga ayisula, tapapo uwakwisala, nakambi nga ayisala, tapapo uwakwisula.

⁸ Ye akoti, Nalishiba imilimo yobe. Nayisula ichiibi pamenso obe icho umuntu nangu umo tangesalapo iyowo. Nalishiba ukuti taukwetepo ifiso ifikulu. Nangu chili mfi, walikulama amashiwi anji, elo tawankanapo iyowo.

⁹ Boneni! Ekobali abantu bakwa Satana, bo abakososa ukuti Bayuda, kuntu iyowo. Nakubalenga ukuti bakese kufukama kumolu obe mukuyichefya. Elo bakwishiba ukuti nalikutemwa.

¹⁰ Pakuti walilama amashiwi anji nokushipikisha, nandibo nakukusunga panshita iyamafya ayo ayakwisa pabantu bonse pachalo ukuti beshekwe.

¹¹ Nkoyisa bwangu-bwangu. Ikatisha icho ukwete ukuti kwibapo uwakukupokolola ingala yabumi.

¹² Onse uwakuchimfya, nakumupanga ukuba ichitebe munanda yaku Lesa wanji, takafumemo iyowo. Pali ye nakulembapo ishina lyaku Lesa wanji nelyamusumba wanji, ekuti Yelusalemu wabwangu, ukafuma kumulu kuli Lesa wanji. Pali ye nakulembapo nakambi ishina lyanji ilyabwangu.

¹³ “Uyo uuli namatwi, omfwe ifyo Mupashi Wabuta ukososa kufilonganino!

Kalata balembele abena Lawodisiya

¹⁴ “Uutangilila ichilonganino chaku Lawodisiya umulembele: “Nga mashiwi aafuma kuli Ameni, kamboni uwabuchetekelo nechine. Entulo iyafibumbwa fyonse ifyaku Lesa.

¹⁵ Ye akoti, Nalishiba imilimo yobe yonse. Nalishiba ukuti tawatalala nangula ukukaba. Nga chakuti wali uwatalala nangula ukabile nga chiweme.

¹⁶ Pakuti uli uwachifwe bwaka, tawatalala nangula ukukaba, nakukushipila panshi.

¹⁷ Webo ulasosa ukuti uli nobuboni ubwinji, taukabilapo nakantu iyowo, kuntu tawayishiba ukuti uli umuchushi, uwabwamba nakambi uli mpofu.

¹⁸ Nkokuchenjeshako ukuti ushite kuli nebo golide yawamikwa mumulilo ukuti ube uwabuboni wine-wine. Elo ushite ifyakufwala ifitubile ukuti ufwale nokufisa umubili obe uleta insoni. Ushite nomuti wamenso ukuti ulokubona bwino.

¹⁹ Bonse natemwa ndabakalipila nokubachusha. Nomba uchinchile nokulapila.

²⁰ Boneni ndimakene pamulyango nokukonkosha. Nga umuntu aumfwa ishiwi lyanji nokwisulako ichiibi, nakwinjila munanda yakwe, elo nebo naye twakulila pamo.

²¹ Onse uwakuchimfya nakumusuminisha ukwikala nandibo pamupando wanji uwabufumu, kubati nimfilya nachimfishe nokwikala na Bata pamupando wabufumu.

²² “Uyo uuli namatwi, omfwe ifyo Mupashi Wabuta ukososa kufilonganino!”