Ukufisulula 20 - Chipangano Chabwangu

Ifyamyaka ikana limo

¹ Panuma yakumfi nalibwene umungelo akoyika ukufuma kumulu. Mumaboko akwe ali nolufungulo lwachilindi ichitapela nomunyololo uukulu.

² Elo alikwete ichinsoka nchilya, insoka yakale njilya, e Kachenjeleka, Satana, nokumukaka imyaka ikana limo.

³ Umungelo alichiposele muchilindi ichitapelapo. Alichisalila mwenkamo, alishinkile nokubikapo ichishibilo ukuti chilokubepapo abantu ukufikila imyaka ikana limo ikashile. Panuma akwisa kukakulwa pakanshita kanini.

⁴ Elo nalibwene imipando yabufumu apayikele abo abapelwe ifiso ifyakupingula. Nalibwene nakambi imipashi yabantu abo baputawileko imitwi pamulandu wakupela Yesu bukamboni namashiwi aku Lesa. Mba tabalombelepo ichiswango nechipasho chachiko. Nakambi balikene ukulembwapo ichishibilo pampumi shabo nangula pamaboko abo. Abantu mba bayishileba abomi. Elo balikutungulula pamo na Klistu pamyaka ikana limo. (

⁵ Abafwa bonse abashele tababukilepo ukufikila ulo imyaka ikana limo yashilile.) Nku ekubuka kwakwamba.

⁶ Balishuka nakambi balibuta abo abakubuka pakubuka kwakwamba nku. Imfwa yachibili tayikwetepo ifiso pali bo, kuntu bakuba bachipupila baku Lesa nabaku Yesu Klistu. Elo bakutungulula nakwe imyaka ikana limo.

Satana bamuchimfya

⁷ Nga yashila imyaka ikana limo, Satana akukakulwa ukufuma muchifungo.

⁸ Elo akuya mukubepa abantu mufiputulwa fyonse ifyachalo, emukuti Gogi na Magogi. Elo akubalonganya pamo ukuti balwe nakwe. Bakuba abenji kubati misenga yamuli bemba.

⁹ Balipalangene ichalo chonse nokushinguluka umusasawa wabantu bakwe nomusumba uwatemwekwa. Nomba umulilo waliwile ukufuma kumulu nokubocha lokoto.

¹⁰ Elo Kachenjeleka uwababepele, aliposelwe muli bemba wamulilo uwaka namabwe asilubale, umo umwali kale ichiswango nomusoseshi wabufi. Echo bakuchula umuyayaya akasuba nobushiku.

Ubupingushi bwakupelako

¹¹ Panuma yaku mfi nalibwene umupando wabufumu ukulu uwabuta, nangulya uwayikalapo. Ichalo nomulu fyalimubutukile, elo tafyabonekelepo nakambi.

¹² Penkapo nalibwene abafwa, abakulu nabayiche, balimakene pantanshi yamupando wabufumu ngulya. Elo amabuku aliswilwe. Kwalipo nalimbi ibuku ilyayiswilwe, ibuku ilyabumi. Abafwa mbalya balipingwilwe ukulingana nefyo bachitile, kubati nimfilya chalembelwe mwibuku ndilya.

¹³ Penkapo bemba alifumishemo bonse abafwililemo. Imfwa nechifulo chabafwa shalifumishemo abafwa babo. Elo bonse balipingwile ukulingana nemilimo yabo bachitile.

¹⁴ Penkapo imfwa nechifulo chabafwa fyaposelwe muli bemba wamulilo. (Bemba wamulilo ngu emfwa yachibili.)

¹⁵ Elo bonse abatasangilwemo mwibuku lyabumi, baliposelwe muli bemba wamulilo.