Ukufisulula 2 - Chipangano Chabwangu

Kalata balembele abena Efeso

¹ “Uutangilila ichilonganino chakubena Efeso umulembele: “Nga mashiwi afuma kuli uyo uwakwata intandala shisano na shibili mukuboko kwakwe ukwamulyo nokwenda pakati kafyakutekapo inyali ishagolide shisano na shibili.

² Ye akoti, Imilimo yobe yonse nalishiba. Nalishiba nokupyunga kobe konse nokushipikisha. Nakambi nalishiba ukuti taukutikapo kubantu ababi iyowo. Mbalya abayitunganya ukuba abatumwa, walibesha nokubasanga ababufi.

³ Nalishiba ukuti walitekanya, walichula pamulandu wakunebo, elo tawanenukapo.

⁴ Nomba ndikwete umulandu umo nawebo uwakuti tawantemwapo kubati nimfilya chali pakutatika.

⁵ Languluka nomba ifyo wawa! Ulingile ukulapila nokupyunga imilimo iyo walikuchita pakutatika. Nga taulapilepo, nakwisa kufumya ichakutekapo inyali yobe pachifulo chachiko.

⁶ Nomba ichikonsansamusha ninchi ichakuti walipata imibelo yabena Nikolayi iyo nandibo napata.

⁷ “Uyo uuli namatwi, omfwe ifyo Mupashi Wabuta ukososa kufilonganino! “Kuli onse uwakuchimfya nakumusuminisha ukulyako kufitwalo ifyakuchiti ichabumi ichaba mukati kachifulo ichakusekelela.

Kalata balembele abena Simuna

⁸ “Uutangilila ichilonganino chaku Simuna umulembele: “Nga mashiwi aafuma kuli uyo uuli ekutatika nokulekelesha, uyo uwafwile nomba ali nobumi.

⁹ Ye akoti, Nalishiba ifikuchusha nobupina bobe, nangu ichine-chine uli mukankala. Nalishiba nakambi ifyo bakufyenga bo abasosa ukuti Bayuda, kuntu bachilonganino chakwa Satana.

¹⁰ Wilatinapo ubuchushi ubwakwisa kukuponena. Boneni! Satana akuposa bambi pali mwebo muchifungo ukumwesha. Echo panshiku ikumi mwakuba mumachushi aakulu. Ube uwachetekela ukufika nakumfwa, elo nakukupela ingala yabumi.

¹¹ “Uyo uuli namatwi, omfwe ifyo Mupashi Wabuta ukososa kufilonganino! “Onse uwakuchimfya, tayakamukumyeko imfwa yachibili.

Kalata balembele abena Pegamamu

¹² “Uutangilila ichilonganino chaku Pegamamu umulembele: “Nga mashiwi aafuma kuli uyo ukwete umwele utwile konse-konse.

¹³ Ye akoti, Nalishiba uko wayikala. Wayikala nkulya ukwaba ichipuna chakwa Satana. Webo waliba uwachetekela kuli nebo, nakambi tawaposapo ichichetekelo icho ukwete muli nebo nangu mpanshita yakwa Antipasi, kamboni wanji uwachishinka. Ngu bamwipayile nkulya ukwikala Satana.

¹⁴ Nomba kuli ifintu fimbi ifyo nkokukalipilapo. Kwaliba abantu bambi abakonka ukusambisha kwakwa Balaamu, uyo uwasambishe Balaki ukutungulula abena Isilaeli ukubifya ulo abebele ukuti balye ifyapupilwe kuli tungosa wakubasa nokuchita ubulale-lale.

¹⁵ Pamo penka nawebo uli nabantu abakonka ukusambisha kwaba Nikolayi.

¹⁶ Nomba lapileni. Nga tawachitepo mfi, nakwisako bwangu mukulwa nabo nomwele uufuma mukanwa kanji.

¹⁷ “Uyo uuli namatwi, omfwe ifyo Mupashi Wabuta ukososa kufilonganino! “Onse uwakuchimfya, nakumupela mana aatabonekapo ukuti alye. Nakambi nakumupela ibwe ilitubile apalembwa ishina lyabwangu ilyayishibikwa bwaka kumwine uwakupokelela epela.

Kalata balembele abena Tayatila

¹⁸ “Uutangilila ichilonganino chaku Tayatila umulembele: “Nga mashiwi aafuma ku Mwana waku Lesa uwakwata amenso aabeka kubati lubingu lwamulilo. Amakasa akwe abengeshima kubati ninshimbi bafuma mukusubako muti.

¹⁹ Ye akoti, Imilimo yobe yonse nalishiba. Nalishiba nokutemwa kobe, ukuchetekela kobe, ukupyunga kobe nokushipikisha kobe. Nalishiba ukuti ukupyunga kobe nomba kwachila ifyo walikupyunga pakutatika.

²⁰ Nomba ndikwete umulandu umo nawebo uwakuti ulalekelela umwanakashi Yesebelo usosa ati musoseshi waku Lesa. Ye alabepa abapyungi banji ukuti bachite ubulale-lale nokulya ifyakulya bapupila tungosa wakubasa.

²¹ Nalimupele inshita yakuti alapile, nomba tafwayapo ukulapila nokusha ubulale-lale bwakwe.

²² Nomba nakumuposa mumalwele, elo nambalya bonse achitile nabo ifyabulale-lale nakubabika mumachushi aakulu nga tabalapilepo nokuleka ububi balikuchita naye.

²³ Nakulofya abana bakwe. Elo ifilonganino fyonse fyakwishiba ukuti ninebo uwayishiba ifyamumitima namalangulushi yabantu. Echo nkalambula umuntu nomuntu pamilimo yakwe.

²⁴ “Nomba mwebo bambi bonse ababa mu Tiyatila, mwe batakonkelepo ukusambisha nku ukubi, mwe batasambililepo ifyo basosa ati, ‘Ubumfishi ubwachine ubwakwa Satana,’ tanshalundepo amafunde nayambi.

²⁵ Nomba mwebo mulokulamisha icho mukwete ukufikila ulo nakubwela.

²⁶ Onse uwakuchimfya nokulama imilimo yanji ukufikila nakumupwilo, nakumupela ubuleme ubwakuteka imishobo yonse iyabantu.

²⁷ Echo akuteka nenkonto iyanshimbi. Akubatobaula kubati ninongo.

²⁸ Nakumupela ubufumu kubati nimbulya napelwe kuli Bata. Nakumupela nentandala yaluchelo.

²⁹ “Uyo uuli namatwi, omfwe ifyo Mupashi Wabuta ukososa kufilonganino!