Ukufisulula 18 - Chipangano Chabwangu

Ukuwa kwa Babiloni

¹ Panuma ya mfi, nalibwene umungelo umbi akoyika ukufuma kumulu. Alikwete insambu ishikulu, elo nechalo chalibutile pamulandu wakusanika kwakwe.

² Alibilikishe neshiwi ilikulu ati, “Wawa, wawa Babiloni we wayishibikwa! Wayaluka ichifulo chakwikalamo imipashi iibi, ichakusungilamo nefyoni fyonse ifibipile ifyabusali.

³ Pakuti alimwesha imitundu yonse yabantu, waini wabwikashi bwakwe ubwabulale-lale. Ishamfumu shonse ishapanonshi, shachitile naye ubulale-lale, elo bashimakwebo bapanonshi bonse, balisambalile pamulandu walunkumbwa lwakwe ulukulu.”

⁴ Elo nalyumfwile amashiwi nayambi ukufuma kumulu alikusosa ati, “Mwebo mwe bantu banji, fumenimo mumushi ngu, ukuti mwibifyapo pamo na ye, elo ifinkunka fyauko kuti fyamuponena.

⁵ Pakuti amabifyo akwe alitentekanye ukufika nakumulu, elo Lesa ayibukisha imilandu yakwe.

⁶ Mubwekesheni kubati nimfilya amuchitile, mubwekesheni kubili kufyo achitile bambi, Mulukombo anwishishemo bambi, mwiwishemo ichakunwa ichikali ukuchila icho amunwishishe.

⁷ Mumuchushe nokumumfwisha insoni ukwinekantu, kubati nimulya alitondayishe nokwisekesha. Pakuti mumutima wakwe alayisosha ati, ‘Epondi nebo namfumu. Tenepo mukamfwilwa, elo takupo akasuba nakwikala nkumba-bulili iyowo.’

⁸ Pamulandu wamfi, ifinkunka fyakumuponena akasuba kamo: Amalwele, ukwikala nkumba-bulili nensala. Elo bakumocha namumulilo, pakuti Bashikulu Lesa abamupingula, balikwete ifiso.”

⁹ Ulo ishamfumu ishapanonshi ishachitile ubulale-lale nokwisekesha nakwe shakubona ichushi chakupya kwakwe, shakwisa kulila nokumfwa insoni apakulu.

¹⁰ Elo bakwimakana akatalamukila ukutina amachushi akwe nokusosa ati, “Obe, ubulanda kuli webo Babiloni! Umushi ukulu nakambi uwafiso, pakuti panshita imo bwaka, ubupingushi bobe bwakuwila!”

¹¹ Abantu bamakwebo pano chalo nabo bakwilishanya nokuma imisowa pali ye pakuti takupo abakushita ifintu fyabo.

¹² Tapapo nangu umo ukoshita golide, silubale, amabwe ayaweme ayamutengo uukulu ayapusene-pusene, insalu ishibutile, ishakashika, ishiswetele, neshamilangali, ifiti ifipusene-pusene ifintu ifyamitundu-mitundu ifyapangilwa nameno yansofu, nakambi nefyafiti ifyamutengo uukulu, ifintu ifyapangilwe nomukuba, ifyela, namabwe ayaweme.

¹³ Utwanunkila utwakusuba notununkilo utwayibela, mule nefinyamuti fimbi namafuta, ubunga neng’ano, ing’ombe nembelele, kabalwe namacheleta, abasha nobumi bwine ubwabantu.

¹⁴ Bashimakwebo balikumweba ati, “Ifiweme ifyo mutima obe walikukumbwako, fyakutaluka. Ububoni bonse nefintu ifiweme, filishilile tawakafisangepo iyowo!”

¹⁵ Bashimakwebo abo abanonkele pamulandu wakushita nokushitisha muli ngu mushi, nabo bakwimakana akatalamukila pamulandu wakutina ukuti nalimo bakuchushiwa kumo. Bakwisa kulila nokulosha ukwinekantu,

¹⁶ nokusosa ati, “Obe, obe kumushi uukulu! Walikufwala insalu shibutile, ishiswetulukile, nefiswetele chee. Walikuyiwamya nagolide, namabwe ayaweme ayamutengo uukulu ayapusene-pusene!

¹⁷ Elo pakanshita kanini bwaka, ububoni bobe bonse bulyonayikile.” Bonse abakulu bamato, abenda mumato, abesha amato pamo nabo abachita amakwebo namato balimakene akatalamukila.

¹⁸ Pakubona ichushi ichalikufulumuka mumushi uwalikupya, balilile nokusosa ati, “Napo kwalipo umushi uukulu kubati niingu?”

¹⁹ Elo mba bantu balitilile ulukungu pamitwi. Balililile nokulosha ukwinekantu bati, “Obe, obe, kumushi uukulu! Bayishile kwata ububoni. Nomba pakanshita kanini bwaka, ububoni bonse bulyonayikile!”

²⁰ Ulokusekelela wemulu pamulandu wakonaulwa kwauko! Sekeleni mwe bantu baku Lesa, abatumwa nabasoseshi bonse pakuti Lesa nomba awonaula ngu mushi pamulandu wamfilya wachitile kuli mwebo!

²¹ Penkapo umungelo umbi uwafiso alipintile ibwe ilikulu kubati lyakupelako nokuliposa muli bemba. Elo asosele ati, “Mfi efyo Babiloni wakuposwa panshi, elo tawakabonekepo nakambi iyowo.

²² Muli mwebo tamwakomfwikepo konse ishiwi lyabamasese, abamitolilo nabambata. Abachenjela mumilimo iipusene-pusene tabakasangwemo muli webo. Tamwakabepo ukupela nakambi muli webo.

²³ Elo tamwakabonekepo ukusanika kwanyali namashiwi ayabashibwinga tayakomfwikepo muli webo. Elo amashiwi yakwa shibwinga na nabwinga taakomfwikepo muli we nakambi iyowo. Bashimakwebo bobe bali abachindami ukuchila ichalo chonse. Nomba ukusosa ifyabuchenjeshi bobe nobufi, walibepele imishobo yonse.”

²⁴ Babiloni alikandilwe pamulandu wakuti umulopa wabasoseshi nabantu baku Lesa walisangilwe muli ye. Ina, umulopa wabantu bonse abayipayilwe panonshi.