Ukufisulula 16 - Chipangano Chabwangu

Imbale shabukali bwaku Lesa

¹ Elo nalyumfwile ishiwi ilikulu ilyafumine munanda yaku Lesa lyalikweba abangelo basano na babili mbalya ati, “Kamuya muketulwile ubukali bwaku Lesa pachalo ubo ubuli mumbale shisano nashibili!”

² Umungelo wakwamba alitulwile ifyamumbale yakwe pachalo. Elo ifibenga ifibipile nokufinya ukwinekantu fyalibukile pabantu bonse abapokelele ichishibilo chachiswango nchilya nokulomba ichimpasho chachiko.

³ Panuma yakwe, umungelo wabubili alitulwile imbale yakwe naye pali bemba. Penkapo amenshi alyalukile kubati mulopa wamuntu uwafwa. Elo ifyabumi fyonse ifyamuli bemba fyalifwile.

⁴ Elo umungelo wabutatu alitulwile imbale yakwe panika napatumfuku-mfuku utwamenshi. Penkapo amenshi yalyalukile umulopa.

⁵ Elo nalyumfwile umungelo umukulu wamenshi akososa ati, “Ina, walungamika mukupingula kwako, we Wabuta, uwaliko nakambi uwakubako!

⁶ Pakuti mba balitulwile umulopa wabantu baku Lesa, elo nomulopa wabasoseshi. Echo mwabapela umulopa ukuti banwe, fyenka mfi efibalingile.”

⁷ Nakambi nalyumfwile ishiwi ilyalikufuma kuchipupililo lyalikusosa ati, “Ina, Bashikulu Lesa Uwafiso fyonse, ubupingushi bwenu bonse, bwachine nakambi bwalilungama.”

⁸ Panuma umungelo walenga bane alitulwile ifyamumbale yakwe pakasuba. Elo akasuba kalipelwe insambu ishakocha abantu nomulilo wakako.

⁹ Elo abantu balipile nokukaba ukwakasuba. Elo balikusalula ishina lyaku Lesa uwali insambu ishakuleta ifinkunka mfi. Nomba bo tabalapilepo nokutondayisha Lesa.

¹⁰ Umungelo walenga basano alitulwile ifyamumbale yakwe pamupando wabufumu ubwachiswango nchilya. Epo imfinshi yalifimbile umo chalikutungulula. Elo abantu balikusumaula indimi shabo pamulandu wakufinya uko balikumfwa.

¹¹ Echo balikusalula ishina lyaku Lesa wakumulu pamulandu wakufinya nefibenga fyabo. Nomba tabalapilepo nokuleka imilimo yabo iibi.

¹² Panuma yakwe umungelo walenga basano na umo alitulwile ifyamumbale yakwe panika iikulu iya Yufuletisi. Epo amenshi yakwe yalikamine, ukuti imfumu ishakumutule-suba shisange apakupita.

¹³ Nomba nalibwene imipashi iibi itatu iyali kuboneka kubati babombwe. Imipashi nji yalikufuma mukanwa kachisoka, kachiswango, elo namukanwa kamusoseshi uwabufi.

¹⁴ Nji emipashi iibi ilokuchita ifintu ifikulu. Ilaya kushamfumu shonse ishapanonshi ukuti balongane pamo ukuti bakapumane pakasuba akakulu akaku Lesa Uwafiso fyonse.

¹⁵ “Umfweni! Nkoyisa kubati mung’o. Alishuka umuntu uyo uukolola nokulama ifyakufwala fyakwe, ukutina ukuti engenda umunkulusu nokuba nensoni.”

¹⁶ Elo imipashi nji yalilongenye ishamfumu nshilya kuchifulo beta mu Chihebele ati Amagedoni.

¹⁷ Panuma yakwe umungelo walenga basano na babili alitulwile ifyali mumbale yakwe mulwelele. Kwaumfwikilwe ishiwi ilikulu ukufuma pamupando wabufumu uwali munanda yaku Lesa ati, “Kwashila!”

¹⁸ Nomba pali ukubyata kwatumpeshi, ukubuluma, ukupata nechikukumo ichabipisha. Takwalipo ichikukumo kubati ninchi ukufumapo abantu bayikalila panonshi.

¹⁹ Umushi ukulu ngulya waliyakene patatu, elo nemishi yonse yachalo yalionayikile. Lesa alilangulukile umushi ukulu uwa Babiloni nokuunwesha ulukombo lwawaini ulwabukali bwakwe.

²⁰ Elo ifishi fyonse fyalilubile nempili tashabonekelepo.

²¹ Abantu baponenwe ichifula-mabwe ichikulu, chimo chalikulema kubati lisaka lyamataba. Elo abantu balikusalula Lesa pamulandu wamachushi ayachifula-mabwe nchilya pakuti ichinkunka nchilya chalikulishe ukwinekantu.