Ukufisulula 14 - Chipangano ChabwanguUmwana wambelele nabantu bakwe 1 Ulo nalolekeshe, nalibwene Umwana wambelele alimakene pamulu wa Lupili lwa Siyoni. Pamo nakwe pali abantu 144,000 abo abalembelwepo ishina lyakwe nelya Bawishi pampumi shabo. 2 Elo nalyumfwile ishiwi ilyali kubuluma ukufuma kumulu kubati menshi ayenji, nangula ukubuluma kwatupato. Ishiwi ndi lyalikumfwika kubati kulila kwamasase. 3 Abantu bo balikwimba ulwimbo ulwabwangu pantanshi yachipuna chabufumu napamenso yafyabumi fine, nabachilolo. Tapalipo nangu umo uwakulusambilila ndu ulwimbo ukufumyako bwaka abantu mbalya abali 144,000 abo abapulushiwe ukufuma pano chalo. 4 Mba ebayilamine, abatayibifishepo nabanakashi, abatayishibapo umwalalume. Balakonka Umwana wambelele konse aya. Mba balipulushiwa pakati kabantu ukuti babe abakwamba ukupelwa kuli Lesa naku Mwana wambelele. 5 Elo tababepelepo ubufi nangu panini iyowo. Echo tabakwetepo akabi. Abangelo batatu 6 Panuma nalibwene umungelo umbi akopupuka mulwelele. Alikwete Ubutumi Bwawama ubutapwa ukuti abilishe kubekala chalo, kubantu abamutundu onse, abamikowa yonse, abamilaka yonse, nabamishobo yonse. 7 Umungelo ngu alibilikishe neshiwi ilikulu ati, “Chinshikeni Lesa nokumutondayisha pakuti inshita iyakupingula abantu ilifikile! Mumulombe uwalengele umulu, ichalo, bemba notumfuku-mfuku twamenshi.” 8 Umungelo uwabubili alikonkele uwakwamba kumbi alikusosa ati, “Wawa, wawa Babiloni we uwayishibikwa! Alengele ukuti abantu bonse banweko waini wakwe uwabulale-lale.” 9 Elo umungelo uwabutatu, alikonkele abangelo banakwe bo babili kumbi alikubilikisha neshiwi ilikulu ati, “Nga kuli uulomba ichiswango nechipasho chachiko nokupokelela ichishibilo pampumi yakwe nangula pakuboko kwakwe, 10 ye akunwako kuli waini uwabukali bwaku Lesa ubo akupongolwela mulukombo lwakwe nefiso fyonse. Bonse abakochita mfi bakuchushiwa kumulilo nakusilubale pachinso chabangelo ababuta no Mwana wambelele. 11 Ichushi ichamulilo chakubachusha ukwamuyayaya. Bonse abalomba ichiswango nechipasho chachiko tabakatushepo ukupya nku akasuba nobushiku pamo nabo abakwete ichishibilo cheshina lyakwe.” 12 Echo abantu baku Lesa balingile ukushipikisha, bo abalama amafunde yaku Lesa nechichetekelo icho bakwete muli Yesu. 13 Elo naumfwile ishiwi ukufuma kumulu ilikoti, “Lemba ukuti, Balishuka abantu abakwisa fwa mukupyungila Bashikulu ukufuma nomba!” Umupashi Wabuta walyaswike ati, “Ina, bamfumu! Bakutusha kumilimo yabo pakuti imilimo iyo bapyungile yakubakonka.” Inshita yakusombola yafika 14 Ulo nalolekeshe nalibwene ikumbi ilibutile. Pekumbi palikele uwalikuboneka kubati Mwana wa Muntu. Kumutwi alifwite ingala yagolide. Alikwete nechikwakwa ichatwa muminwe. 15 Umungelo umbi alifumine munanda yaku Lesa nokubilikisha neshiwi ilikulu kuli uyo uwayikele pekumbi ati, “Pinta ichikwakwa chobe utatike nokusepa pantu inshita yabulobololo ilifikile. Ichalo chafikapo ukuti chilobololwe.” 16 Penkapo ngulya uwayikele pekumbi atatikile umulimo nechikwakwa chakwe panonshi. Alisepele ifintu fyonse ifyapanonshi. 17 Elo nalibwene umungelo naumbi alifumine munanda yaku Lesa kumulu. Naye alikwete ichikwakwa ichatwa. 18 Kwali umungelo naumbi uwalikusunga umulilo, alishile ukufuma pachipupilo. Alibilikishe neshiwi ilikulu kuli ngulya uwakwete ichikwakwa ichitwile ati, “Pinta ichikwakwa chobe nokusepa mpesha ishaba mwibala ilyapano chalo pakuti ifitwalo mfi filipile!” 19 Penkapo umungelo ngulya apintile ichikwakwa chakwe nokukwapaula impesha shonse ishapanonshi nokufiponya muchakukaminamo ifitwalo fyabukali bwaku Lesa. 20 Impesha nshi shalikaminwepo umwakukamina impesha kunse yamushi. Elo muchikamino ichafitwalo mwalifumine umulopa kubati ninika ubutali bwakwe imilundu imyanda ibili, elo ubutali ukuya panshi chali ichitali, umo kabalwe engebila. |
Chilala New Testament © Bible Society of Zambia, 1998.
Bible Society of Zambia