Ukufisulula 13 - Chipangano Chabwangu

Ifiswango fibili

¹ Panuma nalibwene ichiswango chikoyabuka muli bemba. Chalikwete insengo ikumi nemitwi isano na ibili. Palusengo lumo-lumo pali ingala elo napamutwi umo-umo pali ishina lyakusalula Lesa.

² Ichiswango nchilya nabwene chali kubati nimbalali. Amakasa yakwe ali kubati makasa yachimbole nakanwa kakwe kubati kankalamo. Elo ichisoka nchilya chalipele ichiswango ifiso fyachiko, umupando nensambu shachiko.

³ Umo mumitwi yachiko walikuboneka kubati ulikwete chibenga chape, nomba ichibenga nchilya chalipolele. Abantu bonse abalikukonka ichiswango nchi balikushimbwa ukwinekantu.

⁴ Elo balilombele ichisoka pamulandu wakuti chalipele insambu shachiko kuchiswango. Panuma balilombele ichiswango nchi ati, “Mba wingapalana nechiswango nchi ninani? Elo ninani engalwa nacho?”

⁵ Ichiswango nchi chalisuminishiwe ukubilisha amashiwi ayakusalula Lesa. Chalipelwe nakambi ifiso fyakutungulula imyeshi amakumi ane na ibili.

⁶ Elo chalitatikile ukusosa amashiwi ayakusalula Lesa, ishiwi lyakwe nechifulo icho ekalamo nabonse abekala kumulu.

⁷ Elo chalisuminishiwe ukulwa inkondo nabantu baku Lesa nokubachimfya. Chalipelwe nakambi insambu ishakutungulula imikowa yonse, ichalo chonse, imilaka yonse, elo nemishobo yonse.

⁸ Abantu bonse abekala pano chalo bakuchilomba, bonse mbalya abatalembelwepo ichalo tachilatatika mwibuku lyabumi lya Mwana wambelele uyo bayipeye.

⁹ “Uyo uuli namatwi, omfwe!

¹⁰ Onse uulingile ukupintwa mubwankole, nachine mubwankole bakumupinta. Na onse uulingile ukwipayiwa kumwele, nachine kumwele bakumwipaya. Echo abantu bakwe balingile ukushipikisha nokwikalilila muchichetekelo.”

¹¹ Panuma yaku mfi nalibwene nachimbi ichiswango chalikushukuka panshi. Chalikwete amasengo abili kubati lusengo lwamwana wambelele, kuntu chalikusosa kubati chisoka.

¹² Insambu shonse ishachiswango chakwamba shalipelwe kuchiswango chabubili. Nchi chalikupatikisha ichalo nabonse abekalamo ukuti balombe ichiswango ichakwamba nchilya ichakwete ichibenga ichapolele.

¹³ Ichiswango chabubili nchi chalikulanga ifiso ifikulu ukwinekantu nokwishisha umulilo ukufuma kumulu nokuleta panonshi pamenso yabantu bonse.

¹⁴ Elo chalibepa abantu bonse abekala pachalo pamulandu wafiso ifikulu ifyo chasuminishiwe ukuchita pachinso chachiswango ichakwamba. Ichiswango nchi chalibebele ukupanga ichipasho ichakuchinshikilamo ichiswango nchilya ichalashiwe umwele, kuntu chali nobumi.

¹⁵ Ichiswango chabubili chalisuminishiwe ukuputa umupu uupela ubumi kuchipasho ichachiswango ichakwamba ukuti chilokusosa nokwipaya bonse bo abatakochilombapo.

¹⁶ Elo chalipatikishe abantu bonse, abanono nabakulu, ababuboni nenchushi, abantungwa nabasha ukuti balembwe ichishibilo pakuboko kwabo ukwamulyo nangula pampumi shabo.

¹⁷ Chalichitikile mfi ukwebati kwibapo uwakushita nangula ukushitisha akantu nga takwetepo ichishibilo nchi. Ichishibilo nchi lishina ilyachiswango ichakwamba nchilya ichiminina inambala yeshina lyakwe.

¹⁸ Nchi chikofwaya umulangwe. Onse uukwete umulangwe apende inambala yachiswango pakuba imakanina ishina lyamuntu. Inambala nji ni 666.