Ukufisulula 12 - Chipangano Chabwangu

Umwanakashi nechisoka

¹ Panuma yaku mfi, kwalibonekele ichishibilo ichakushimbwisha ichikulu kumulu. Kwali umwanakashi uwafwite akasuba. Panshi yamakasa yakwe pali umweshi, elo pamutwi wakwe pali ingala yabufumu iyantandala ikumi na shibili.

² Umwanakashi ngu alimitile. Ulo ali apepi nokupapa alililile ukwinekantu pamulandu wakukalipwa.

³ Kwalibonekele ichishibilo ichakushimbwisha chimbi ichikulu kumulu ichiswetele chee. Chalikwete imitwi isano na ibili nensengo ikumi. Elo pamutwi uuli onse chalifwite ingala iyabufumu.

⁴ Nomuchila wachiko chalikololeleko ichiputulwa chimo ichalenga fitatu ifyantandala shakumulu nokushiponya panshi. Elo chisoka nchilya chapilibwike kumwanakashi uwali mupepi nokupapa umwana ukwebati nga apapa umwana ngulya chimulye.

⁵ Umwanakashi ngu alipapile umwana umwalalume. Ngu akutungulula ifyalo fyonse nomusako wachela. Nomba umwana ngu alipintilwe kumulu kuli Lesa nakumupando wakwe uwabufumu.

⁶ Penkapo umwanakashi alifulumukile muchiswebebe. Nkulya kwenka Lesa alimupekanishishe ichifulo chakwe ichakusungilwapo panshiku ikana limo nemyanda ibili namakumi asano na limo.

⁷ Penkapo kwalibukile inkondo kumulu. Mikaeli nabangelo bakwe balilwile inkondo nechisoka nchilya. Nanchi chisoka nabangelo bachiko chalilwile nabo.

⁸ Nomba tachabachimfishepo. Elo tachakwetepo nechifulo kumulu iyowo.

⁹ Ichisoka ichikulu nchilya chaliponeshewe panshi, echisoka ichakale beta umubi nangula Satana, ngulya uubepa abantu bonse bapanonshi. Chaliposelwe pano chalo pamo nabangelo bachiko bonse.

¹⁰ Penkapo nalyumfwile ishiwi ilikulu ukufuma kumulu ilyalikusosa ati, “Nomba Lesa atupulusha. Nomba Lesa wesu alanga ifiso fyakwe, elo nobufumu bwakwe. Nomba Uwasubwa wakwe alanga insambu shakwe. Pakuti uwalikubepa bawesu ngulya, aliposelwe kunse, ngulya uwalikubepesha bawesu kuli Lesa, akasuba nobushiku bamutamfya kumulu.

¹¹ Bawesu balichimfishe nomulopa wa Mwana wambelele, namashiwi ayachine ayo balikubilisha. Bo baliyipele ukufikapo, ichakwebati tabali kutinapo nokufwa.

¹² Echo sekeleleni mwebo abakumulu, namwe abekalamo. Nomba ishamo kuli mwebo, ichalo nabemba pakuti umubi ngu, akoyisa kuli mwe uwayiulamo nobukali, pakuba alishibile ukwebati inshita iyo akwete inono bwaka.”

¹³ Ulo ichisoka nchilya chabwene ukuti chaposelwe panshi, chalitatikile ukupepeka umwanakashi ngulya uwafyele umwana umwalalume.

¹⁴ Nomba umwanakashi ngu alipelwe amapindo abili aali kubati yalukoshi ulukulu ukuti apupukile nokusha ichisoka nokuya kuchifulo chakwe ichali kuchiswebebe. Nkulya akusungilwako imyaka itatu nawapakati, ukutina ukwebati ichinsoka nchilya chingamubona.

¹⁵ Elo kukanwa kwachiko kwafumine amenshi ayenji ayakuti amukokolole umwanakashi ngulya.

¹⁶ Nomba ichalo chalimwafwilishe umwanakashi ngu. Chalyaseme nokumina amenshi ichisoka nchilya chapongolwele.

¹⁷ Ichisoka nchi chalikalipile umwanakashi ukwinekantu. Elo chayile ukulwisha abamukowa bamwanakashi ngu abashele balikulama amafunde aku Lesa, bo abalikubilisha ifyaku Yesu muchine.

¹⁸ Chalimakene palulamba lwabemba.