Ukufisulula 11 - Chipangano Chabwangu

Bakamboni babili

¹ Elo nalipelwe akati kakupiminako nokunjeba ati, “Koya kapime inanda yaku Lesa nechipupililo. Elo upende abo abalombela munanda nji.

² Nomba wipimapo ulukolo ulwakunse, ulushe pakuti lulipelwe kubantu abamitundu imbi. Bo bakunyantaula umushi uwabuta pamyeshi amakumi ane na ibili.

³ Elo nakutuma bakamboni banji babili abakufwala amasaka ukuti bakabilishe ubutumi bwaku Lesa inshiku ikana nemyanda ibili namakumi asano na limo.”

⁴ Bakamboni babili mbalya fiti fibili ifyamaolife nenyali shibili ishayimakana pachinso chaku Bashikulu wachalo.

⁵ Nga chakuti kuli ukofwaya ukubachusha, umulilo ulafuma mutunwa twabo nokonaula ifipondo fyabo. Uuli onse ukofwaya ukubachusha, bakumwipayila munshila imo yenka.

⁶ Bakamboni mbalya bali nefiso ifyakwisala kumulu ukuti imfula ilokapo munshiku isho bakobilisha ubutumi bwaku Lesa. Nakambi balikwete ifiso ifyakusangula amenshi ukuba umulopa. Elo kuti baleta muchalo ifikunka ifili fyonse inshita iyo bangafwayilapo.

⁷ Ulo bakushila bukamboni bwabo, chiswango nchilya ichifuma muchilindi ichitapela chakubalwisha. Elo chakubachimfya nokubepaya.

⁸ Elo ifitumbi fyabo fyakulala mumisebo yamumusumba uukulu, umo Shikulu wabo asamikilwe pamutashi. Ishina lyachishibilo ilyamusumba ngu ni Sodomu nangula Ijipiti.

⁹ Elo abantu abamufyalo fyonse, imikowa yonse nakambi abamishobo yonse bakubona pafitumbi fyabo inshiku shitatu nakasuba-pakati ukwambula ukusuminisha ukuti bashikwe mumanda.

¹⁰ Abantu bonse abekala muchalo bakusekelela pamulandu wamfwa shabo. Bakusekelela nokutuminshanya ifyabupe pakuti abasoseshi babili mba balikuchusha ukwinekantu abantu bapanonshi.

¹¹ Panuma yanshiku shitatu nakasuba-pakati, umupu uupela ubumi walifumine kuli Lesa nokwinjila muli bo. Awe balimakene, nabonse abababwenepo balikwete nomwenso uukulu.

¹² Abasoseshi balyumfwile ishiwi ilikulu ukufuma kumulu ilyasosele kuli bo ati, “Iseni nkuno!” Ulo ifipondo fyabo fyalikulolesha, balikwelele kumulu, mumakumbi.

¹³ Inshita yenka njilya, kwayishile ichikukumo ichikulu. Elo ichiputulwa chimo ichalenga ikumi ichamushi chaliwile. Abantu abafwile muchikukumo nchi bali amakana asano na abili. Bo abashele bayiketwe nomwenso ukwinekantu. Elo balichinshikile Lesa wakumulu.

¹⁴ Ichinkunka chalenga bubili chilipitile, kuntu ichabutatu chili apepi nokwisa.

Indibu yachisano na ibili

¹⁵ Panuma yaku mfi, umungelo walenga basano na babili alilishishe indibu yakwe. Elo kwalyumfwikile ichongo chamashiwi kumulu ati, “Nomba ubuleme ubwakutungulula bwaba ubwaku Bashikulu wesu no Wasubwa wakwe. Elo akutungulula umuyayaya!”

¹⁶ Penkapo bachilolo amakumi abili na bane abayikala pamipando pachinso chaku Lesa balifukeme nokulomba Lesa

¹⁷ bati, “Tukomutotela, Bashikulu Lesa Uwafiso fyonse, nimwebo mwenka ababapo nabalipo lonse. Tukomutotela pakuti mwatubonesha ifiso fyenu ifikulu, nokuti mwatatika ukutungulula.

¹⁸ Abantu bakunse balikalipile, pakuti inshita yakulanga ubukali bwenu ilifikile, neyakupingula abantu bafwa. Elo inshita yafika, iyakupela ichilambu kubapyungi benu, abasoseshi, nabantu benu abo abachinshika ishina lyenu, abayiche nabakulu. Nayifika inshita iyakonaula, bo abaonaula ichalo.”

¹⁹ Penkapo inanda yaku Lesa kumulu yayiswike. Elo Ichibokoshi cha Chipangano chalibonekele munanda njilya. Penkapo kwalibonekele inkuba, ukubuluma, ukubulukuta, ichikukumo nechimfula-mabwe.