Ukufisulula 10 - Chipangano Chabwangu

Umungelo nakabuku muminwe

¹ Elo nabwene umungelo umbi uwafiso akoyika ukufuma kumulu. Ayinjile mwikumbi napamutwi pakwe pali inkongolo. Ichinso chakwe chali kubati kasuba namolu akwe yali kubati insenamina shamulilo.

² Muminwe yakwe alikwete akabuku akayiswilwe. Ukulu kwakwe ukwamulyo anyantile pali bemba, elo ukwakuso anyantile pamulundu.

³ Alibilikishe neshiwi ilikulu kubati chibulumo chankalamo. Panuma yakubilikisha mfi, inkuba shisano na shibili shabulumine.

⁴ Ulo inkuba shilya shashilile ukubuluma, nafwayile ukulemba. Nomba nalyumfwile amashiwi ayafumine kumulu akoti, “Wifisululapo ifyo ifibulumo fisano na fibili filabile. Wilembapo iyowo!”

⁵ Elo umungelo ngulya nabwene alinyantile pali bemba napamulundu, alimishe ukuboko kwakwe ukwamulyo kumulu.

⁶ Elo alilapile mwishina lyaku Lesa umumi umuyayaya, uyo uwalengele umulu nafyonse ifyabamo, ichalo nafyonse ifyabamo. Umungelo ngulya asosele ati, “Inshita nomba yashila!

⁷ Ulo umungelo walenga basano na babili akulisha indibu yakwe, ifyamubumfishi ifyo Lesa apekenye kale fyakuchitika, kubati nimfilya alayile abapyungi bakwe abasoseshi.”

⁸ Elo ishiwi ndilya naumfwile ilyafumine kumulu lyanjebele nakambi ati, “Koya ukabule akabuku nkalya akayisulwa akali mukuboko kwamungelo uwayimakana pali bemba napamulundu.”

⁹ Nachine nalile kumungelo ngulya nokumweba ukuti ampele akabuku nkalya. Nomba ye anjebele ati, “Kabule elo ukalye. Mumala yako kakulula, kuntu mukanwa kobe kakulowa kubati buchi.”

¹⁰ Elo nalikapokele akabuku nkalya akali mukuboko kwamungelo nokukalya. Nachine mukanwa kali kulowa kubati buchi, kuntu ulo nakaminine, mumala kalikulula tepe-tepe.

¹¹ Penkapo anjebele ati, “Ulingile ukubilisha ubutumi bwaku Lesa kufyalo fyonse, kumishobo yonse, kumilaka yonse, elo nakushamfumu shonse.”