Taitasi 3 - Chipangano Chabwangu

Imibele yabwina Klistu

¹ Ulokubebukisha abantu bobe ukuti balokunakila ishamfumu nentungulushi. Balokubomfwila nokubomba bwino imilimo yonse.

² Mulokubeba ukuti belokusosapo ifibi kumuntu uuli onse, kuntu ukuba abamutende nechumfwilo. Inshita shonse balokupela umuchinshi kubantu bonse.

³ Pakuti nafwebo akale twali abapuneme, abatomfwapo nakambi abaluba. Twali abasha kulunkumbwa ulubi ululi lonse. Twalikwikala mububi nakambi twali abamufimbila. Abantu balikutupata, elo nafwebo twali kubapata.

⁴ Nomba ulo ichisa nokutemwa kwaku Lesa Mupulushi wesu kwafisulwilwe,

⁵ alitulubwile. Tepamulandu iyamilimo iiweme iyo twachitile iyowo, kuntu nimunkumbu shakwe. Alitulubula pakutusamba ukutupela ukufyalwa kwabwangu nobumi bwabwangu ukupitila mu Mupashi Wabuta.

⁶ Muli Yesu Klistu, Umupulushi wesu, Lesa alifungulula ifiso fyakwe nokutupela Umupashi Wabuta.

⁷ Lesa alichitile mfi ukwebati mubwanshi bwakwe, utulungamike pamenso yakwe. Elo twakupokelela ubumi butapwa ubo tulindilila.

⁸ Amashiwi nga yachine. Nkofwaya ukuti ifintu mfi mushimpe mukufisambisha pakuti bo abachetekela Lesa bayipeleshe ukuchita imilimo iiweme. Fintu mfi fisuma nakambi filafwilisha abantu.

⁹ Nomba mutalukeko kufikansa, ulunkonena lwafikolwe, ukulaka nokusula amafunde. Mfi fyonse tafilingilepo nakambi tamupo bupilibulo iyowo.

¹⁰ Umuntu uwafikansa, muchenjesheni imiku ibili. Kati takokumfwilapo, mutalukeni.

¹¹ Pakuti ulishibile ukuti umuntu wamfi nimbifi nobubi bwakwe bulamushinina umwine.

Amashiwi akumupwilo

¹² Nga natuma Alitemasi nangula Tikikasi kuli webo, ukendeshe ukwisa kuli nebo ku Nikopolisi pakuti nkofwaya ukuba nkulya panshita yamwela.

¹³ Uchinchile mukwafwilishako Senasi uwamafunde na Apolosi mubulwendo lwabo. Ubone ukuti balikwete fyonse ifyo bakabila.

¹⁴ Abantu besu balingile ukusambilila ukuchita imilimo iiweme ukuti bafwilishe apo balinjile ukwafwilisha. Tabalingilepo ukuba nobumi ubwabwaka.

¹⁵ Bonse abo tuli nabo balemuposha umutende. Baposhe umutende bawesu bonse muchichetekelo. Ubwanshi bwaku Lesa bube namwebo bonse.