Taitasi 2 - Chipangano Chabwangu

Ukusambisha kwachine

¹ Nomba webo, ulokusambisha ifyalinga nechisambisho ichachine.

² Eba abalalume abakulu ukuti babe abateka imitima, abakwilama abene, abamano mubuchetekelo, mukutemwa namukushipikisha.

³ Mumibelo imo yenka, eba abanakashi abakulu ukuti balokwikala nobumi ubwaololoka. Bebapo abalwambo nangula abasha kubwalwa, kuntu balokusambisha ifiweme.

⁴ Elo ukuti balokusambisha abanakashi abayiche ukutemwa abalume nabana babo,

⁵ nokuti balokwilama, abali nemitima iiweme, abakashi bachumfwila kubalume babo. Echo abantu tekuti basalulepo amashiwi aku Lesa.

⁶ Munshila imo yenka, mwebe abalumbwana ukuba abayilama.

⁷ Muli fyonse mfi, webo ube ichilangililo chamichitile iiweme. Elo mukusambisha kobe ube uwachine nomuchinshi.

⁸ Amashiwi obe abe aaweme ukuti onse uwachitala omfwe insoni. Abe uwambula akabi akali konse ako bengasangamo.

⁹ Ubebe abasha nabena ukuti balokumfwila bashikulu babo muli fyonse. Balokupanga ifitala nabo

¹⁰ nangula ukubebilako. Nomba bayibweneshe ukuti baliweme elo bachishinka. Mufintu fyonse bachinshike amasambisho aku Lesa, Umupulushi wesu.

¹¹ Elo Lesa alanga ubwanshi bwakwe pakufwaya ukupulusha abantu bonse.

¹² Ubwanshi mbu butusambisha ukuti tutalamukeko kubumi ubwamusalula nolunkumbwa ulwamufyachalo. Butusambisha ukuba abakwilama, abaololoka nokuchinshika Lesa muli nji nkulo.

¹³ Pakuti tukololela ubushiku ubwashukishiwa, ulo twakubona umuchinshi waku Lesa umukulu, no Mupulushi wesu Yesu Klistu.

¹⁴ Ngu alipele umwine ukuti atupulushe kububi bwesu bonse nokutulenga ukuba abantu bakwe abachinchila mumilimo iiweme yonse.

¹⁵ Mfi efyo ulokusambisha. Ulokubachinchisha abantu nokubakonkobesha nefiso fyonse. Kwibapo umuntu nangu umo ukuti akuloleshe pamutwi.