Mateyo 7 - Chipangano Chabwangu

Ukupingula bambi

¹ “Mulokupingulapo bambi, pakuti namwe Lesa ekamupingulapo.

² Pakuti Lesa akamupingwila mumusango umo wenka uwo mupingwilamo bambi, nomulingo uwo mukolingilako bambi ewo namwe Lesa akamulingilako.

³ Mba nindo ukololesesha akapande akali mulinso lyakuwenu, elo we wasula ichipande ichili mulinso lyobe?

⁴ Elo kuti wasosa shani kuli wenu ati, ‘Leka mfunye akapande akali mulinso lyobe,’ ulo mulinso lyobe muli ichipande?

⁵ We wakutumpayika we! Bala uyishibule ichipande ichili mulinso lyobe, elo wakulolesha bwino nokufunya akapande akali mulinso lyakuwenu.

⁶ “Mwipelako ichili ichapatulikwa kumbwa, epali shamwalukila nokumusuma. Nakambi mulokuposelapo inkumba impande shenu ishamutengo, epali shanyantaulapo.

Lomba, fwaya, konkonsha

⁷ “Lombeni, elo mwakupelwa. Fwayeni, elo mwakusanga. Konkosheni, elo mwakwiswilwa.

⁸ Pakuti onse uulomba alapelwa, uufwaya alasanga, nangulya uukonkonsha aleswilwa.

⁹ Napo ninani pali mwe, ulo umwana wakwe amulomba umufuba, angamupela ibwe?

¹⁰ Nangula ulo amulomba inswi, angamupela insoka?

¹¹ Nomba nga mwebo mwebabi mfi, mwalishiba ukupela abana benu ifiweme, mba Bawishinwe abakumulu kuti bafilwa shani ukupela ifintu ifiweme kuli bo abakobalomba?

¹² “Fyonse ifyo mukofwaya ukuti abantu bamuchitile, efyo namwebo mulokubachitilako. Pakuti nku ekusambisha kwamafunde akwa Mosesi nabasoseshi.

Umulyango uuche

¹³ “Injileni pamulyango uuche, pakuti umulyango uutwala kukonayika ukulu, elo nenshila yauko nayo ikulu. Echo nabantu abendamo benji.

¹⁴ Elo umulyango uutwala kubumi ubutapwa uuche, elo nenshila yauko iiche. Echo nabantu abayisanga bakupenda bwaka.

Ichiti nefitwalo fyachiko

¹⁵ “Chenjeleni nabasoseshi ababufi. Mba besa kuli mwe bakoboneka kubati nimbelele, kuntu mukati mimbulu iikali.

¹⁶ Mwakubeshibila kufitwalo fyabo. Napo abantu balaswa impesha kumyunga nangu amakunyu kumituntulwa?

¹⁷ Ichiti ichiweme chitwala ifitwalo ifiweme, kuntu ichiti ichabipa chitwala ifitwalo ifyabipa.

¹⁸ Ichiti ichiweme tekuti chitwalepo ifitwalo ifyabipa, nechabipa tekuti chitwalepo ifitwalo ifiweme.

¹⁹ Ichiti chonse ichitatwalapo ifitwalo ifiweme bakachitema nokuchiposa mumulilo.

²⁰ Kanshi kumichitile yabo eko mwakubeshibila.

Mwebo tanshamwishibilepo

²¹ “Te bonsepo abanjita ati, ‘Shikulu, Shikulu’ bakwinjila mubufumu bwakumulu, kuntu bo abachita ukufwaya kwaku Bata abali kumulu.

²² Ulo akasuba kabupingushi kakwisa, abantu abenji bakusosa kuli ne ati, ‘Shikulu, Shikulu, nimwishina lyenu umo twalikushimikila amashiwi enu. Nimwishina lyenu umo twalikutamfishamo imipashi iibi, elo nokuchitilamo ifyafiso ifikulu ifinji.’

²³ Elo nandibo nakubasuka ati, ‘Nshimwishibilepo! Fumeni mpa mwe bachita ububi.’

Bakemaka bamananda babili

²⁴ “Echo umuntu onse uukoumfwa amashiwi anji nga nokuyachita eupalene nomuntu uwamano uwayimeke inanda yakwe pamwala.

²⁵ Imfula yalilokele, inika shalyamine nechipupu chalikuntile pali njilya nanda, kuntu tayawilepo iyowo, pantu yayimekwe pamwala.

²⁶ “Kabili umuntu onse uukoumfwa amashiwi anji nga nokutayachita, eupalene nomuntu uutumpile uwayimeke inanda yakwe pamusenga.

²⁷ Imfula yalilokele, inika shalyamine nechipupu chalikuntile pali njilya nanda, nayo kayikunta napanshi natuyu!”

Ukusambisha kwaku Yesu kwafiso

²⁸ Ulo Yesu ashilile ukusosa nga mashiwi, ibumba lyabantu lyalishimbilwe ukwinekantu pakusambisha kwakwe.

²⁹ Talipo kubati basambishi ba Mafunde yakwa Mosesi, kuntu Ye alikusambisha umo abelele nensambu.