Mateyo 6 - Chipangano Chabwangu

Pamulandu wakupela ifyankumbu

¹ “Chenjeleni ukuti mwilokuchitapo imilimo iiweme kubantu pakuti mubonekele. Pantu nga mukochita mfi, tamwakapokelelepo ichilambu kuli Bawishinwe abakumulu.

² “Pamulandu ngu, ulo mukopela ichabupe kubantu bachula, mwiibwenesha palwalala kubati nimfilya bachita abakutumpayika mumananda aakulombelamo Lesa namumisebo ukuti bachinshikwe kubantu. Nkomweba ati, mba bantu balipokele kabela ichilambu chabo.

³ Nomba mwebo pakupela ichabupe kumuntu mwilekapo nangu umunenu eshibe icho muchitile.

⁴ Nga mwachita mfi, ubupe bwenu ubwankumbu bwakwishibikwa kuli mwebo mwenka. Epo Bawishinwe nabo ababona ifyamubumfisolo, bakumulambula.

Ukusambisha pamulandu wakulomba

⁵ “Ulo mukolomba, mulokubati abakutumpayika. Pakuba bo balitemwa ukwimakana pakulomba mumananda aakulombelamo Lesa napamampandwa amisebo, ukuti babonekele kubantu. Nkomweba ati, mba balipokele kabela ichilambu chabo.

⁶ Nomba mwebo ulo mukolomba injileni munanda yenu mwisaleko nechibi. Mulombe kuli Bawishinwe abatabonekapo. Elo Bawishinwe ababona ifyo muchita mubumfinsolo bakumulambula.

⁷ “Nakambi pakulomba mwilokubwabwata bwaka, nga mfilya fichita abatayishibapo Lesa. Bo balanguluka ukwebati mukusosa ifinji emo Lesa angabomfwa.

⁸ Mwipalanapo nabo pakuti Bawishinwe bakumulu balishiba ifyo mukochulila ulo mutalabalomba.

⁹ Echo mwebo mulokulomba ati, ‘Banshifwe bakumulu, ishina lyenu lichinshikwe.

¹⁰ Ubufumu bwenu bwise, ukufwaya kwenu kuchitike panonshi, ukubati nikumulu.

¹¹ Mutupele lelo ichakulya chesu ichalelo.

¹² Mutunakilileko amabifyo yesu, kubati nimfilya tunakilila bonse abatubifisha.

¹³ Mwitulekelesha mukwesheka, kuntu mutupokeko kumubi.’

¹⁴ “Kati mukobanakilila abantu imilandu yabo, Bawishinwe bakumulu bakumunakilila namwe.

¹⁵ Nga tamukobanakililapo abantu imilandu yabo, Bawishinwe bakumulu nabo tabakamunakililepo imilandu yenu.

Ukusambisha pamulandu wakuyikanya ukulya

¹⁶ “Ulo mukoyikanya ukulya, mulokwikalapo abachikonko nga mfilya bachita abakutumpayika. Bo balayishimfyanya pamenso pakuti abantu bababone ukuti bakoyikanya ukulya. Nachine nkomweba ati, mba balipokelela kabela ichilambu chabo.

¹⁷ Nomba webo, panshita iyo ukoyikanyapo ukulya, usambe pamenso nokusakula imishishi yobe,

¹⁸ ukwebati ukuyikanya ukulya kobe kwishibikwe bwaka kuli Bawiso ababona ifyamubumfisolo. Elo nabo bakukulambula.

Ububoni mumulu

¹⁹ “Muyibikilapo ububoni bwenu panonshi, apo finamupapila nendalabwa fyonaula, nabang’o nabo balatoba nokwiba.

²⁰ Nomba muyibikile ububoni bwenu kumulu, uko finamupapila nangula indalabwa tafyonaulapo, nabang’o nabo tabatobapo nokwiba.

²¹ Pakuti ukuli ububoni bobe, ekuba nomutima obe.

Ukusanika kwamubili

²² “Amenso enu enyali yamubili wenu. Nga amenso enu ali bwino, nomubili wenu wakuyiulamo ukusanika.

²³ Nomba amenso enu nga taali bwino, umubili wenu wakuba mumfinshi. Nomba ukusanika kwenu nga kwaaluka imfinshi, imfinshi njilya yakuba fititi!

Lesa nobuboni bwapanonshi

²⁴ “Takupo umuntu uupyungila imfumu shibili, pakuba angapatapo imo nokutemwapo imbi, elo angalokumfwilapo imo nokusula iinakwe. Echo tekuti mupyungilepo Lesa nobuboni.

²⁵ “Nachine nkomweba ati, mulokusakamanapo pabumi bwenu mwati, nindo tukolyapo, nangula, nindo tukonwapo? Nangula napamubili wenu mwati, nindo tukofwalapo? Napo ubumi tabwachindamapo ukuchila ifyakulya? Napo umubili nawo tawachilapo pafyakufwala?

²⁶ Boneni ifyuni fyamumulu! Tafiminsapo nangula ukulobolola nangula ukututila mumatala, kuntu Bawishinwe bakumulu ebafilisha. Napo mwebo tamwachilapo ukuchindama pafyuni?

²⁷ Mba ninani uwamuli mwe mukusakamana kwakwe engalundapo nangu akasuba kamo kubumi bwakwe?

²⁸ “Findo mukosakamanina pafyakufwala? Boneni amaluba aamumpanga ifyo akula! Yo taabombapo nangula ukupikula insalu shakufwala iyowo.

²⁹ Nachine, nangu imfumu Solomoni uwali nobuboni ubwinji, tafwelepo ifiweme kubati limo ilyamumaluba nga.

³⁰ Nomba Lesa nga alafwika mfi amaluba aamumpanga aaliko lelo, mailo aposwa mumulilo, napo mwebo tekuti amufwikepo ukwinenene? Mwe bachichetekelo ichinini!

³¹ “Kanshi mwilokusakamanapo mumitima yenu mwati, ‘Nindo tukolya? Nangula, nindo tukonwa? Nangula mwati, nindo tukofwala?’

³² (Fyonse mfi efyo abantu abatayishibapo Lesa babikapo imitima yabo.) Nomba mwe mwishibe ukwebati Bawishinwe bakumulu balishiba ati fyonse mfi mulafikabila.

³³ Echo baleni mufwaye ubufumu bwakwe nokubanakila, elo fyonse mfi fyakupelwa kuli mwe.

³⁴ Kanshi mwilokusakamanapo pafyakasuba kamayilo. Ifyamayilo fyamayilo. Akasuba kamo kali nobuchushi ubwakako.