Mateyo 5 - Chipangano Chabwangu

Ukusambisha kwaku Yesu palupili

¹ Ulo Yesu abwene amabumba abantu, aninine palupili nokwikala. Abakusambila bakwe nabo balimukonkele.

² Elo atatikile ukubasambisha ati,

Ukushuka ukwinenene

³ “Balishuka bo abayishiba ukuti balichula mumupashi, pakuti ubufumu bwakumulu bwabo.

⁴ “Balishuka bo abakolosha, pakuti Lesa akubashinshinta.

⁵ “Balishuka bo abayichefya, pakuti Lesa akubapela ichalo abalayile.

⁶ “Balishuka bo abafwayisha ukuchita ifilungeme nomutima wabo onse pakuti Lesa akubekusha.

⁷ “Balishuka bo abakwatila abanabo inkumbu, pakuti nabo Lesa akabakwatila inkumbu.

⁸ “Balishuka bo abelele imitima, pakuti bakubona Lesa.

⁹ “Balishuka bo abaleta umutende, pakuti Lesa akubeta abana bakwe.

¹⁰ “Balishuka bo abakochula pamulandu wabulungami, pakuti ubufumu bwamumulu bwabo.

¹¹ “Mwalishuka mwebo ulo abantu bakomusuula, bakomuchusha, bakomweba ifibi fyonse nokumubepesha ubufi pamulandu wanji.

¹² Angeni nokusekelela pakuti ichilambu chenu kumulu chikulu. Pakuti mfi efyo bachushishe nabasoseshi abamutanjilile.

Ifyamuchele nokusanika

¹³ “Nimwe umuchele wachalo. Kati umuchele wakubuluka, mba ukoyisa kulowa nendo? Taukwetepo mulimo, wakwitila bwaka kunse nabantu kabaunyantaulapo.

¹⁴ “Nimwe ukusanika kwamuchalo. Umushi uwayimakwa palupili tekuti ufisamikwepo.

¹⁵ Elo abantu tabasanikapo inyali nokuyifunikila mumbale, kuntu bayiteka apasansukile ukuti isanikile bonse abali munanda.

¹⁶ Efyo bwenesheni ukusanika kwenu pamenso abantu ukuti babone imilimo yenu iiweme, ukwebati bachinshike Bashinwe bamumulu.

Ukusambisha kwamafunde

¹⁷ “Mulokulanguluka ukuti nayisa mukonaula Amafunde akwa Mosesi nokusambisha kwabasoseshi, kuntu mukufikilisha ifyalembwa.

¹⁸ Nachine nkomweba ati, umulu nechalo afitalashila, tapakonayikepo akalembo nangu kamo akalitoni mu Mafunde aku Lesa ukufikila ulo fyonse fyakuchitika.

¹⁹ Echo umuntu onse uukoyisa kutalamapo limo pali nga Mafunde, nangu lingachepa shani, nokusambisha abantu ukuchita fyenka mfilya, akuba umunini Mubufumu bwakumulu. Nomba uyo uukolama nokusambisha abantu ukuchita mfi, ye akuba umukulu Mubufumu bwakumulu.

²⁰ Echo nkomweba ati, ukuchetekela kwenu kati takuchililepo ukwabasambishi ba Mafunde akwa Mosesi nokwa Bafalisi, tamwakenjilemo mubufumu bwakumulu.

Ukusambisha pamulandu wabukali

²¹ “Mwalyumfwa ifyo abakale baebelwe ati, ‘Wilokwipaya. Onse uwayipaya umunakwe bamutwale mukumulubulwisha.’

²² Nomba nebo nkomweba ati, onse uwakalipila wabo akutwalwa mukulubulula. Noyo uwakweba wabo ati, ‘We chipuba we,’ akuba nomulandu kunsaka yamilandu iikulu. Nomba uwakweba wabo ati, ‘We chinangwa we!’ Ye alingile ukumuposa mumulilo uutashimapo.

²³ Kanshi ulo ukotwala ichipupo chobe kuchipupililo, nakambi wayibukisha ukuti wenu ali nomufimbila nawebo,

²⁴ bala ushe ichipupo chobe nkulya kuntanshi yachipupililo uye muwikishanye pamo nawenu, elo wakwisa kupela ubupe bobe kuli Lesa.

²⁵ “Mulingile ukumfwana bwangu-bwangu nomwinamulandu obe ulo muchili mukoya nakwe mukulubulula. Epali akutwala kuli kapingula wamilandu, naye akupela muminwe yakwa kapokola. Kapokola naye akukubika muchifungo.

²⁶ Nkokweba ukuti tawakafumemo bwaka ukufikila ukapwilishe ukufuta umulandu obe nakekobili akakulekeleshako.

Ukusambisha pamulandu wabuchende

²⁷ “Mwalyumfwa ifyo abakale basosele ati, ‘Wilokuchitapo buchende.’

²⁸ Nomba nkomweba ati, umuntu onse uwalolesha umwanakashi nokumukumbwa, ekweba ati achita nakwe kale ubuchende mumutima wakwe.

²⁹ Kati ilinso lyobe ilyakumulyo lilakulenga ukubifya, ulilobolemo nokuliposa. Chawama ukulufya ichilewa chimo ichamubili obe ukuchila ukuleka umubili onse ukuya kuposwa mumulilo uutashimapo.

³⁰ Kati ukuboko kobe ukwamulyo kulakulenga ukubifya, ukuputuleko nokukuposa. Chawama ukulufyako ichilewa chimo ichamubili obe ukuchila ukuleka umubili onse ukuya kuposwa mumulilo uutashimapo.

Umulandu wakubengana muchupo

³¹ “Nakambi chalisoselwe ati, ‘Nga muntu abenga umukashi wakwe alingile ukumupela kalata wakubenganinapo.’

³² Nomba nkomweba ati, onse uubenga umukashi wakwe pamulandu uutali wabuchende, akomulengela ukuchita ubuchende ngulya mwanakashi. Elo umwalalume uwakumupa umwanakashi wabengelwe ngu, naye achita ubuchende.

Ukusambisha pamulandu wakulapa

³³ “Nakambi mwalyumfwa ifyo abakale baebelwe ati, ‘Wilokulapapo bufi pakulaya, kuntu uchite icho walaya pamenso aku Bashikulu.’

³⁴ Nomba nkomweba ati, mwilokulapapo nangu panini iyowo. Mwilokulapapo ati, ‘Nachine kumulu,’ pakuba echipuna chaku Lesa.

³⁵ Mwilokulapapo ati, ‘Napamushili,’ pakuba epo Lesa anyantapo amakasa akwe. Mwilokulapapo ati, ‘Napali Yelusalemu,’ pakuba emusumba wa Mfumu iikulu.

³⁶ Elo nakambi mwilokulapapo ati, ‘Napamutwi wanji,’ pakuti tekuti mwalulepo umushishi umo ukuba uutubile nangula uufitile.

³⁷ Mulokusosa bwaka mwati, ‘Ina,’ nangula, ‘Iyowo.’ Ifingachila pali mfi fifuma kuli Satana.

Ukusambisha pamulandu wachilandushi

³⁸ “Mwalyumfwa ifyo abakale baebelwe ati, ‘Ilinso palinso, ilino palino!’

³⁹ Nomba nebo nkomweba ati, mwilokubweseshapo ububi pabubi.

⁴⁰ Kati muntu akupama palutobo lwakumulyo, umwalwile nolwakuchipiko. Nga akutwala kunsaka yamilandu ukuti akupoke ilaya lyobe, umupele kumo nomwinjila obe.

⁴¹ Nakambi nga umushilikali akukakatisha ukumupintilako ichipe umulundu umo, umupintileko imilundu ibili.

⁴² Umuntu onse uukulomba akantu umupele, noukofwaya ukwashima akantu kuli webo wimutanapo.

Ukutemwa abalwani benu

⁴³ “Mwalyumfwa ifyo abakale baebelwe ati, ‘Ulokutemwana nefibusa fyobe, kuntu ulokupata abalwani bobe.’

⁴⁴ Nomba nkomweba ati, temweni abalwani benu nokubalombelako abakomuchusha.

⁴⁵ Nga mwachita mfi, mwakuba abana abenenene abaku Bawishinwe abakumulu. Pakuba bo ebalenga akasuba ukutula pabaweme napababipile. Elo balalosha nemfula pabaweme napababipile.

⁴⁶ Nomba kati mukotemwa bwaka abantu abamutemwa, lishuko ndo mwingabwenamo? Napo abamisonko nabo tefyopo bachita?

⁴⁷ Nga mukoposha umutende bawenu benka-benka, chindo mwachitapo ukuchila bambi? Napo abatayishiba Lesa nabo tefyopo bachita?

⁴⁸ Echo mube ababuta kubati nimfilya Bawishinwe bakumulu baba ababuta.