Mateyo 4 - Chipangano Chabwangu

Yesu ayeshewa kuli Satana

¹ Elo Mupashi Wabuta watwite Yesu muchiswebebe mukweshewa kuli Satana.

² Panuma yanshiku amakumi ane, akasuba nobushiku, ukwambula ukulya, Yesu aliumfwile insala.

³ Epo Satana alishile nokumwesha ati, “Kati niwe Mwana waku Lesa, eba amabwe nga ukuti aaluke umufuba.”

⁴ Elo Yesu amwasukile ati, “Chalilembwa ati, ‘Umuntu tangekala uwabumi pakulya umufuba wenka iyowo, kuntu pa mashiwi onse aafuma mukanwa kaku Lesa.’”

⁵ Epo Satana atwite Yesu kumusumba wa Yelusalemu, amutekele pachitumbe chananda yaku Lesa.

⁶ Elo asosele kuli Ye ati, “Kati niwe Mwana waku Lesa, chilukila panshi pakuti chalilembwa ati, ‘Lesa akweba abangelo bakwe ukwisa kukwelekela pamaboko abo, ukuti wiyitutulapo amakasa obe pamabwe.’”

⁷ Yesu alyasukile ati, “Nakambi chalilembwa ati, ‘Wiyeshapo Bashikulu Lesa obe.’”

⁸ Nakambi Satana atwite Yesu palupili ulutali nokumulanga amabufumu onse aamuchalo chonse nomuchinshi waako.

⁹ Elo asosele kuli Yesu ati, “Mfi fyonse nkokupela nga wafukama pamakasa anji nokunambila.”

¹⁰ Yesu alimwasukile ati, “Fuma mpa, we Satana! Pakuti chalilembwa ati, ‘Ulokulambila Bashikulu Lesa obe, mba benka ebo ulokupyungila.’”

¹¹ Elo Satana alimushile Yesu, nabangelo balishile nokumupyungila.

Yesu atatika umulimo wakwe mu Galili

¹² Ulo Yesu aumfwile ukuti Yohane bamukaka muchifungo, abwelelemo ku Galili.

¹³ Tayikelepo mu Nasaleti, kuntu ayile kwikala mu Kapenaumu, umushi wamululamba lwaku Bemba wa Galili, mumipaka ya Sebuloni na Nafutali.

¹⁴ Nchi chachitikilwe pakuti chifikilishiwe ichalembelwe na Esaya umusoseshi ati,

¹⁵ “We chalo cha Sebuloni necha Nafutali, kunshila yaku bemba, petala ya Yodani, we Galili, ichalo chabenafyalo!

¹⁶ Abantu abayikala mumfishi bakobona ukusanika ukukulu! Bo abayikala muchalo chamfinshi iyamfwa, ukusanika kwakubatulila.”

¹⁷ Ukufuma pali njilya nshita, Yesu atatikile ukubilisha ati, “Lapileni pantu ubufumu bwakumulu bwapalamina.”

Yesu ayita abalofi banswi bane

¹⁸ Ulo Yesu alikwenda mululamba lwaku Bemba wa Galili, abwene abalofi babili: Simoni (uwitwa Petulo), na Andileya wakwe, balikuteya isumbu muli bemba pakuti bali abalofi banswi.

¹⁹ Elo Yesu asosele kuli bo ati, “Nkonkeni pakuti nkoyisa kumulenga ukuba abalofi babantu.”

²⁰ Bwangu-bwangu balishile amasumbu abo nokumukonka.

²¹ Nakambi ulo Yesu aendeleko panini, abwene Yemusi mwana Sebedi na Yohane wakwe bali mubwato pamo nabawishibo, balikusosola amasumbu abo. Nabo alibetile.

²² Bwangu-bwangu bashile ubwato nabawishibo, nokumukonka.

Yesu asambisha, ashimikila nokuposha

²³ Yesu alikwenda-enda muchalo cha Galili, ukusambisha mumananda aakulombelamo Lesa, nokubilisha Ubutumi Bwawama ubwa Bufumu, nokuposha abantu abali namalwele aapusene-pusene nabanakile imibili.

²⁴ Ululumbi lwakwe lwalitulikile muchalo chonse icha Siliya. Elo abantu batwite kuli Yesu bonse abalikulwala amalwele aapusene-pusene, abayiketwe imipashi iibi, abachinkoni-nkoni, nababulebe, bonse kabaposha.

²⁵ Echo amabumba abantu ayenji alimukonkele, ayafumine ku Galili, kuchalo chamishi ikumi, kumusumba wa Yelusalemu, ku Yudeya, elo nabakwitala lyamulonga wa Yodani.