Mateyo 3 - Chipangano Chabwangu

Ukubilisha kwakwa Yohane Mubatishi

¹ Muli nshilya nshiku kwayishile Yohane Mubatishi, uwali kubilikisha muchiswebebe cha Yudeya ati,

² “Lapileni pantu ubufumu bwakumulu bwapalamina!”

³ Yohane ngu ewo Esaya umusoseshi asoselepo ati, “Umuntu akobilikisha muchiswebebe, ‘Wamyeni umusebo waku Bashikulu! Lungamikeni bwino inshila yabo, ukuti bese bendemo!’”

⁴ Yohane alikufwala ilaya ilyabililwe namasako angamila, nakambi nomushipi wampampa mumusana wakwe. Ichakulya chakwe chali ninshe nobuchi.

⁵ Abantu abenji abamu Yelusalemu, nabamuchalo cha Yudeya, elo nabamumishi iyali mupepi na Yodani balishile kuli Yohane.

⁶ Epo balikuyisosela amabifyo abo nokubatishiwa kuli Yohane mumulonga wa Yodani.

⁷ Ulo Yohane abwene Abafalisi na Basaduki abenji bakoyisa mukubatishiwa, alisosele kuli bo ati, “Mwe bana bansoka mwe! Ninani wamuchenjeshe ukubutuka kubukali bwaku Lesa ubukoyisa?

⁸ Chiteni ifintu ifyakulanga ukupilibuka kwamitima yenu.

⁹ Elo mwilokuyibepapo mumitima yenu mwati, ‘Twaliba nashifwe Abulahamu. Nachine nkomweba ati, Lesa kuti aalula nga mabwe ukuti abe abana bakwa Abulahamu.’

¹⁰ Isembe lilibikilwe kale pamushu uukulu uuli onse uwachiti. Pakuti ichiti chonse ichitatwalapo ifitwalo ifiweme bakuchitema nokuchiposa mumulilo.

¹¹ Nebo nkomubatisha namenshi ichishibilo chakulanga ukuti mwalapila, kuntu uyo uwakwisa panuma yanji, akumubatisha ku Mupashi Wabuta nakumulilo. Alinchililepo ifiso. Nebo tanshilingilepo nokupinta inkwanda shakwe.

¹² Alikwete nolupe muminwe yakwe ulwakwelelako tiligu. Elo akututila tiligu mubutala bwakwe, kuntu imisungu mumulilo uutashimapo.”

Ukubatishiwa kwaku Yesu

¹³ Pali njilya nshita Yesu afumine kuchalo cha Galili nokwisa kumulonga wa Yodani kuli Yohane mukubatishiwa.

¹⁴ Elo Yohane afwayile ukumukanina ati, “Nine ningile ukubatishiwa kuli webo, mba wayisa shani kuli ne?”

¹⁵ Nomba Yesu alimwasukile ati, “Leka chibele mwenkomo pali njino nshita, pakuti tufikilishe fyonse ifyo Lesa afwaya.” Elo Yohane asumine.

¹⁶ Ulo Yesu ashilile ukubatishiwa, bwangu-bwangu alisubukile mumenshi. Mumulu mwalisukile, abwene Mupashi waku Lesa ukoyisa kubati ninkunda pali Ye.

¹⁷ Elo ishiwi lyasosele ukufuma kumulu ati, “Ngu Emwana wanji uwatemwekwa, muli ye emo nkosekelela.”