Mateyo 28 - Chipangano Chabwangu

Yesu abuka kubafwa

¹ Akasuba ke Sabata ulo kashilile kumachacha, mukasuba kakwamba akamulungu, Maliya Magadala na Maliya umbi bayile mukubona kumanda.

² Kwayishile ichinkukuma ichikulu. Umungelo waku Bashikulu alikile ukufuma kumulu nokukunkulushapo ichebwe pamanda. Elo ayikelepo pachebwe.

³ Ukuboneka kwakwe kwali kubati kampeshi-mpeshi, nefwakufwala fyakwe fyali ifitubile tuutu.

⁴ Bamalonda balimutinine ukwinekantu nokututuma. Bali kubati bantu abafwa.

⁵ Elo umungelo asoseshe abanakashi ati, “Mwitinapo iyowo, pantu ndishibile ukweba mukofwaya Yesu uwasamikilwe pamutashi.

⁶ Taamo muno, alibukile mwenka mulya asosele. Iseni mubone apo aalele.

⁷ Nomba kamuya bwangu-bwangu, mukabushe abakusambila bakwe ati, ‘Alibukile ukufuma kubafwa, nakambi alimutanjile ukuya ku Galili. Kwenka nkulya eko mukoya kumubwena.’ Nomba nebo namweba.”

⁸ Bwangu-bwangu, abanakashi mbalya balifumineko kumanda. Nangu bali nomwenso, nomba balisekelele ukwinekantu! Bayile ulo babutuka ulubilo mukweba abakusambila bakwe.

⁹ Bwanguluke Yesu alibakumenye nokubaposha ati, “Umutende ube nayimwe.” Elo bayishile kuli Ye nokumwikata kumolu, elo bamulambile.

¹⁰ Epo Yesu abebele ati, “Mwitinapo iyowo, kamuya mukebe bawesu ukuti baye ku Galili, nkulya eko bakoya kumbwena.”

Ifyashimikile bamalonda

¹¹ Ulo abanakashi balimukuya, abashilikali bambi abalikulonda imanda bayinjile mumushi nokushimikila intungulushi shabachipupila fyonse ifyachitikile.

¹² Elo intungulushi shabachipupila shalongene pamo nabachilolo nokupangana. Bapele abashilikali indalama ishinji ukwinekantu,

¹³ nokuti, mulokusosa kubantu ati, “Abakusambila bakwe balishile kwiba ichitumbi chakwe ulo twali mutulo.

¹⁴ Nga chakwebati nchi chaumfwika kuli kateka Pilato, fwebo tukamunasha umutima ukuti ekamupela umulandu.”

¹⁵ Nabo balipokelele indalama nokuchita fyenka ifyo babebele. Epo ndi lyashi lyalisalanganine mu Bayuda ukufikila namuli nkano akalelo.

Yesu atuma abakusambila bakwe

¹⁶ Elo abakusambila ikumi na umo bayile ku Galili, kulupili nkulya Yesu abasontele.

¹⁷ Ulo bamubwene balimulambile, kuntu bambi balikayikile.

¹⁸ Elo Yesu ayishile kuli bo nokusosa ati, “Ifiso fyonse fyapelwa kuli ne kumulu napanonshi.

¹⁹ Echo kamuya kubantu bamitundu yonse, mukabasangule ukuba abakusambila banji. Mukababatishe mwishina lya Bata, nelya Mwana nelya Mupashi Wabuta.

²⁰ Mukabasambishe ukulama fyonse ifyo namukonkobeshe. Nandibo nalikuba namwe inshita shonse ukufikila nakumupwilo wachalo.”