Mateyo 27 - Chipangano Chabwangu

Yesu bamutwala kuli Pilato

¹ Ulo bwachele, intungulushi shabachipupila nabachilolo balipangene ukuti bepaye Yesu.

² Bakakile Yesu nokumutwala kuli Pilato, kateka wabena Loma.

Yuda ayikulika

³ Ulo Yuda uyo uwamwembwile, abwene ukuti Yesu apelwa umulandu wakumwipaya alilangulukile, nokubwesha indalama shabuseke amakumi atatu, kuntungulushi shabachipupila nabakulu ba Bayuda nokuti,

⁴ “Nabifya pakwembula umuntu uutakwetepo mulandu.” Nabo basosele ati, “Napo uyo mulandu wesu? Mulandu obe wenka.”

⁵ Elo Yuda aposele indalama shabuseke nshilya panshi munanda yaku Lesa nokufumamo. Elo ayile kuyikulika.

⁶ Ulo intungulushi shabachipupila shatolele indalama shabuseke nshilya nokusosa ati, “Nshi ndalama tashasuminishiwapo mumafunde esu ukushibika muchipawo chananda yaku Lesa iyowo, pantu nindalama shamulopa.”

⁷ Echo balipangene ukwebati indalama nshi bashitemo ibala lyakwa kabumba wanongo, umwakushika abalwendo.

⁸ Echo ukufikila nankano kasuba, ndi ibala litwa ati, “Ibala Lyamulopa.”

⁹ Nomba ifyasosele umusoseshi Yelemiya fyalifikilishiwe, “Babulile indalama shabuseke amakumi atatu, umutengo bamupingwile kubena Isilaeli.

¹⁰ Elo bashitilemo ibala lyakwa kabumba wanongo, ukulingana nefyo Bashikulu banjebele.”

Pilato afumba Yesu

¹¹ Batwite Yesu kuli Pilato, kateka wabena Loma. Elo Pilato amufumbile ati, “Napo webo niwe Mfumu ya Bayuda?” Yesu amwasukile ati, “Wasosa!”

¹² Nomba intungulushi shabachipupila nabachilolo balikumwebela ifintu ifinji. Yesu ena akutumene bwaka.

¹³ Elo Pilato amufumbile ati, “Napo taumfwilepo nji milandu bakokupela?”

¹⁴ Nomba Yesu akutumene bwaka, taasukilepo ishiwi nangu limo iyowo, asuka kateka chamupesha namano.

Pilato apingwila Yesu ukufwa

¹⁵ Panshita ya Chakulya chakuchilila, kateka wabena Loma alikubakakwilapo umufungwa umo uwo ichintu-bwinji chafwaya.

¹⁶ Kanshi panshita njilya kwaliko umufungwa umo uwali akapondo uwalikwitwa Balabasi.

¹⁷ Ulo balongene, Pilato asosele kuli bo ati, “Kanshi ninani uwo mukofwaya ukuti mukakwile, Balabasi nangula Yesu uwitwa Klistu?”

¹⁸ Pakuti Pilato alishibile ukuti nipamulandu wamufimbila batwalile Yesu kuli ye.

¹⁹ Ulo Pilato achili alikele pachipuna chabupingushi, umukashi wakwe alitumine amashiwi kuli ye ati, “Wichitapo kantu nangu kamo pali uyo muntu, wakaele. Pakuti ndichulile ukwinekantu muchoshi pamulandu wakwe.”

²⁰ Nomba intungulushi shabachipupila nabakulu ba Bayuda batunkilishe abantu ukuti balombe Balabasi, kuntu Yesu ye bamwipaye.

²¹ Elo kateka abafumbile ati, “Ninani pali mba babili uwo mukofwaya ukuti mukakwile?” Nabo balyasukile ati, “Balabasi.”

²² Pilato alibafumbile ati, “Nomba nchite nakwe shani Yesu uwitwa Klistu?” Bonse balyasukile ati, “Musamikeni pamutashi!”

²³ Elo Pilato abafumbile nakambi ati, “Mba mulandu ndo achitile?” Nabo balibilikishe ukuchilapo bati, “Musamikeni bwaka.”

²⁴ Ulo Pilato abwene ukwebati mwali ukutalikishanya mubantu, abulile amenshi nokusamba kuminwe yakwe pamenso yabantu. Elo asosele ati, “Tanshikwetepo umulandu pamfwa yamuntu ngu. Chiteni icho mukofwaya mwebene.”

²⁵ Abantu bonse balyasukile ati, “Umulandu ube pali fwe napabana besu.”

²⁶ Penkapo Pilato abakakwile Balabasi. Elo apingwile ukuti Yesu bamupande ifikoti, elo panuma bakamusamike pamutashi.

Abashilikali basekuluka Yesu

²⁷ Penkapo abashilikali bakwa kateka batwite Yesu kunanda yakwa kateka. Balongenye bonse abashilikali banabo nokushinguluka Yesu.

²⁸ Bamufulile amalaya akwe nokumufwika umwinjila uufitulukile.

²⁹ Elo baanine ing’ana yaminga nokumufwika kumutwi. Bamufumbatike itete muminwe yakwe kumulyo. Elo bamufukamine nokumusekuluka ati, “Mutendepo, we Mfumu ya Bayuda.”

³⁰ Bamushipile amate nokumupamaula umusako pamutwi.

³¹ Ulo balekele ukumusekuluka, bamufulile umwinjila ngulya nokumufwika amalaya akwe nakambi. Elo bamutwite mukumusamika.

Basamika Yesu pamutashi

³² Ulo balikuya munshila, bakumenye umwalalume umo, Simoni uwaku Sailini. Balimukakatishe ukupinta umutashi waku Yesu.

³³ Elo batwite Yesu kuchifulo ichitwa Gologota, ekwebati, “Ichifulo Chefupa Lyamutwi.”

³⁴ Kwenka nkulya bapele Yesu waini uwo basanshisheko indusha ukuti anwe. Nomba ulo asondele, Yesu alikene ukunwa.

³⁵ Ulo bamusamikile pamutashi, bachitile bumwine-mano pakwabana amalaya akwe.

³⁶ Elo bayikele panshi bakomusopa.

³⁷ Pamutashi, pamulu wamutwi wakwe, balembelepo amashiwi akulanga icho bamwipayilepo ati, “Ngu ni Yesu Imfumu ya Bayuda.”

³⁸ Basamikilepo notupondo tubili pamo na Yesu, kamo kumulyo, kambi nako kuchipiko.

³⁹ Abantu abalikupita munshila, balikumusalula ili bapuKKOKKGkumya nemitwi.

⁴⁰ Balikusosa ati, “Te we walikutwanga wati, ‘Kuti natobaula nanda yaku Lesa nokuyimaka munshiku shitatu.’ Ipulushe wenka wemwine. Kati niwe Mwana Lesa, wike pamutashi.”

⁴¹ Intungulushi shabachipupila nabasambishi ba Mafunde nabachilolo nabo balikumusekuluka, bakososhanya ati,

⁴² “Alikupulusha bambi, nomba chamukanga ukuyipulusha umwine! Nimfumu yabena Isilaeli, kayike pamutashi nafwe tukomuchetekela!

⁴³ Alichetekela muli Lesa nokusosa ati, ‘Nine Mwana waku Lesa. Nomba Lesa kamupulushe, kati nachine akomufwaya.’”

⁴⁴ Elo notupondo utwasamikilwe pamo nakwe, nato twalimwebawile kumo.

Imfwa yaku Yesu

⁴⁵ Nomba ulo akasuba kafikile pa 12 koloko, imfinshi yafimbile ichalo chonse ukufika panshita ya 3 koloko wachungulo.

⁴⁶ Pa 3 koloko penka Yesu ayawile neshiwi ilikulu ati, “Eloi, Eloi, lama sabakatani?” Ekweba ati, “Lesa wanji, Lesa wanji, nindo mwandekelesha?”

⁴⁷ Abantu bambi abayimakenepo pakumfwa, basosele ati, “Umfweni akoyita Eliya!”

⁴⁸ Bwangu-bwangu umbi alibutukile nokupinta umwepu. Autumpikile muli waini uusasamine, elo autungile kwitete nokumutambika Yesu ukuti anwe.

⁴⁹ Elo bambi basosele ati, “Lekeni tubone kati Eliya akoyisa kumupulusha!”

⁵⁰ Yesu alilile nakambi neshiwi ilikulu, nokufwa kafwa.

⁵¹ Penkapo nechansalu icho balikuchinga munanda yaku Lesa chalyabakene pakati ukufuma pamulu ukufika napanshi. Ichalo chalitenkene ukwinekantu, elo namabwe alilepaukile.

⁵² Imanda shalisukile, elo abantu abenji abachetekele muli Lesa abafwile balibukile ukufuma kubafwa.

⁵³ Balifumine mumanda, elo panuma yakubuka kwaku Yesu kubafwa, bayile Mumushi Wabuta. Elo balibwenekele nakubantu abenji.

⁵⁴ Ulo umukulu wabashilikali nambalya abo alikulonda nabo Yesu, babwene ichinkukuma nefyachitikile, balitinine ukwinekantu bati, “Nachine, ngu muntu aali Mwana waku Lesa.”

⁵⁵ Kwali nabanakashi abenji abalikutamba akatalamukila. Balikukonka nokupyungila Yesu ukufuma ku Galili.

⁵⁶ Mukati kebumba mwali Maliya Magadala na Maliya banyina Yemusi na Yosefe, nabanyina wabana bakwa Sebedi.

Ukushikwa kwaku Yesu

⁵⁷ Ulo kwali ichungulo, kwayishile umuntu uwitwa Yosefe. Ali musambashi uwafumine kumushi waku Alimateya. Naye ali wakusambila waku Yesu.

⁵⁸ Ayile kuli Pilato nokulomba ichitumbi chaku Yesu. Pilato alisuminishe ukuti bamupele.

⁵⁹ Epo Yosefe alibulile umubili nokupomba munsalu iiweme iyambafuta.

⁶⁰ Ayile kubika mumanda yakwe iyabwangu iyo afukwile mwibwe. Elo apilibwiilepo nebwe ilikulu pamulyango wamanda, nokuya kaya.

⁶¹ Maliya Magadala na Maliya umbi balikele nkulya umulungatanya napamanda.

Balonda imanda

⁶² Ulo bwachele pakasuba ke Sabata, intungulushi shabachipupila na Bafalisi, balongene kuli Pilato

⁶³ nokumweba ati, “We mfumu, twayibukisha ifyo ngulya uwabufi alikusosa ulo ali nobumi ati, ‘Nga shakumana inshiku shitatu nakubuka kubafwa nakambi.’

⁶⁴ Echo ebeni abakulonda imanda ukufikila napakasuba kakulenga shitatu, epali abakusambila bakwe bayisa kumwiba. Elo bakwisa mukweba abantu ati, alibukile kubafwa. Ekwebati ubufi mbu ubwakulekelesha bwakubipisha ukuchila ubwakwamba.”

⁶⁵ Pakumfwa mfi, Pilato abebele ati, “Pinteni bamalonda baye mukulonda imanda ukubati nimfilya ifyo mwayishiba.”

⁶⁶ Echo balile, kabesalishapo pamulyango wamanda pakukambatikapo ichishibilo pebwe. Elo bashilepo abakulonda.