Mateyo 26 - Chipangano Chabwangu

Bapinga ukwipaya Yesu

¹ Ulo Yesu ashilile ukulabila amashiwi onse nga, asosele kubakusambila bakwe ati,

² “Mulishibile ukwebati kwashala inshiku shibili ukuti akasuba kakulu ka Chakulya Chakuchilila kafike, elo Umwana wa Muntu akupelwa ukuti asamikwe pamutashi.”

³ Elo intungulushi shabachipupila nabakulu ba Bayuda balongene kunanda yakwa Kayafasi, chipupila mukulu.

⁴ Balikusoshanya ukuti basange inshila yakwikatilamo Yesu mubuchenjeshi nokumwipaya.

⁵ Balikusosa ati, “Iyowo, pakasuba ka Chakulya Chakuchilila tepopo, pantu kuti mwayisa kuba ichimfulunganya mubantu.”

Yesu bamusuba amafuta ku Betani

⁶ Yesu ali mumushi wa Betani, munanda yakwa Simoni uwapolele kufyona.

⁷ Ulo Yesu ali pakulya, kwayishile umwanakashi umo uwapintile umusashi wamafuta aabwema ubuweme nakambi aamutengo uukulu ukwinekantu alikwitwa naladi, nokuyetulwila pamutwi waku Yesu.

⁸ Ulo abakusambila babwene mfi balikalipile, nokusosa ati, “Mulandu ndo akowonawilwa mfi amafuta nga?

⁹ Nga twaya kushitishamo indalama ishinji ishakupela abachula.”

¹⁰ Nomba Yesu alishibile ifyo balikusosa, elo abebele ati, “Chindo mukomusakamikila ngu mwanakashi? Umulimo ngu uwo ampyungila uuweme ukwinekantu.

¹¹ Pantu abachula mwali kuli nabo lonse, kuntu tamwalokulipo nandibo lonse iyowo.

¹² Ngu mwanakashi pakunjitila mafuta pamubili wanji, ampekanishisha kabela ukushikwa kwanji.

¹³ Nachine nkomweba ati, konse uko pano chalo balikubilisha Ubutumi Bwawama, balikusosa ifichitile ngu mwanakashi pakumwibukisha.”

Yuda asumina ukwembula Yesu

¹⁴ Nomba umo uwabekumi na babili uwitwa Yuda Isikaliyoti ayile kuntungulushi shabachipupila

¹⁵ nokuti kuli bo, “Nindo mukompela nga chakuti nayembula Yesu kuli mwe?” Elo bamupele indalama shabuseke amakumi atatu.

¹⁶ Nomba ukufuma njilya nshita Yuda ali kufwayilisha inshila neshita iingalinga ukwembwilapo Yesu.

Yesu nabakusambila bakwe balya umulalilo

¹⁷ Mukasuba kakubalilapo akakulyamo Imifuba Iitatutumuka, abakusambila bayile kuli Yesu nokusosa ati, “Kanshi nikwisa uko mukofwaya ukuti tumuwamishishe Chakulya Chakuchilila?”

¹⁸ Yesu abasukile ati, “Kamuya kuli kantwa mumusumba, mukamwebe ati, ‘Umusambishi akoti, inshita yanji ili mupepi. Ndefwaya ukulya Chakulya Chakuchilila kunanda yobe pamo nabakusambila banji.’”

¹⁹ Nachine abakusambila bachitile mwenka umo Yesu abebele. Bapekenye nachakulya nchi.

²⁰ Ati kube ichungulo, Yesu nabakusambila bakwe ikumi na babili balikulya.

²¹ Ulo bali pakulya, Yesu asosele ati, “Nkomweba ati, umunenu umo akonyembula.”

²² Pakumfwa mfi, nabo babele nechikonko ukwinekantu. Elo batatikile ukufumba Yesu umo-umo ati, “Napo ninebo Bashikulu.”

²³ Naye asosele ati, “Uwo nkotobela nakwe pamo mumbale imo eukonyembula.

²⁴ Umwana wa Muntu akoya mukufwa nga mfilya chalembwa mu Mashiwi aku Lesa pali Ye. Nomba ishamo kumuntu uyo ukoyembula Mwana wa Muntu! Nga chaliweme kuli ye ukutafyalwapo.”

²⁵ Elo Yuda uyo uwamwembwile, afumbile ati, “Napo nine Bashikulu?” Naye amwasula ati, “Wasosa.”

Umulalilo waku Bashikulu

²⁶ Ulo bali pakulya, Yesu abulile umufuba atotele kuli Lesa, ausunawile nokupela nabakusambila bakwe ati, “Buleni mulye pakuti ngu mubili wanji.”

²⁷ Nakambi abulile ulukombo, atotele kuli Lesa, abapele nokuti, “Nwenimo bonse.

²⁸ Ngu mulopa wanji uwachipangano chabwangu, uwayitililwa abenji ukuti amabifyo abo anakililwe.

²⁹ Nachine nkomweba ati, tanshakanwepo nakambi amenshi afitwalo fya mpesha ukufikila pakasuba ako nkanwamo amenshi afitwalo fyawaini uwabwangu mu Bufumu bwaku Lesa.”

³⁰ Ulo bayimbile ulwimbo, balifuminemo nokuya kulupili lwa Maolife.

Yesu asosa ifyakukanwa na Petulo

³¹ Yesu asosele kuli bo ati, “Mwe bonse mukombutuka bwenka mbuno bushiku. Pakuba chalilembwa mu Mashiwi aku Lesa ati, ‘Nakwipaya chembela nembelele shakupalangana.’

³² Nomba ulo nakubuka kubafwa, nakumutanjilila ku Galili.”

³³ Elo Petulo ayasukile Yesu ati, “Nangu bambi bakubutuka, kuntu nebo iyowo!”

³⁴ Elo Yesu amwebele ati, “Nachine nkokweba ati, muli mbuno bushiku bwenka, ulo tambala atalalila, ukonkana imiku itatu.”

³⁵ Petulo asosele ati, “Nangu kati kufwa, nkofwa nawe. Tekuti nkukanepo iyowo!” Nabakusambila bambi nabo basosele fimo fyenka.

Yesu alomba Wishi mwibala lya Getesemani

³⁶ Elo Yesu ayile nabakusambila bakwe kuchifulo ichitwa Getesemani. Elo abebele ati, “Ikaleni mpano panshita nkoya mukulomba.”

³⁷ Yesu abulilepo Petulo nabamwana Sebedi babili. Elo atatikile ukulilishika nokusakamikwa.

³⁸ Abebele ati, “Umutima uli nechikonko ukwinekantu nichikanga bwaka nokufwa. Ikaleni mpano, mulokulinda pamo nandibo.”

³⁹ Ulo Yesu aendeleko panini akatalamukila awile panshi ubwifuneme, nokulomba ati, “Bata, kati kuti chalinga, fumyenipo ndu lunkombo ulwabuchushi. Nangu chibe mfi, kwiba kubati kufwaya kwanji iyowo, kuntu ukufwaya kwenu eko kuchitike.”

⁴⁰ Yesu abwelele kubakusambila bakwe mbalya batatu, asanga bali mutulo. Epakweba Simoni Petulo ati, “Simoni Petulo, mulilele, bati?

⁴¹ Kanshi mwafilwa ukulola pakashita akanini bwaka? Umutima ukofwayisha, kuntu umubili uli wanaka.”

⁴² Yesu alibwelelemo umuku wachibili, aya mukulomba ati, “Bata kati ulunkombo ndu ulwamachushi talwafumepo pali nebo, chiteni ukufwaya kwenu.”

⁴³ Elo nakambi abwela, asanga bali mutulo, amenso abo alilemene kutulo.

⁴⁴ Nakambi alibashile, ayile mukulomba umuku wachitatu. Asosele amashiwi amo enka.

⁴⁵ Elo abwelelemo kubakusambila bakwe nokubeba ati, “Napo nanomba muchili mutulo nokutusha, bati? Boneni, Umwana wa Muntu akoposwa muminwe yabantu babipa.

⁴⁶ Imeni tulokuya. Boneni uwakunyembula ngu ayisa!”

Bayikata Yesu

⁴⁷ Lwenka ndulya ulo Yesu alikusosa, Yuda umo uwabakusambila bakwe ikumi na babili alifikile. Ali nebumba ilikulu ilyabantu abali nemyele nenkoli. Batuminwe nentungulushi shabachipupila nabachilolo.

⁴⁸ Uwakwembula Yesu alibapele kale ichishibilo ati, “Uyo nkoya kufyomfyonta, eye enka. Mumwikate.”

⁴⁹ Ulo Yuda afikile kuli Yesu asosele ati, “Mutende we musambishi! Elo amufyomfyontele.”

⁵⁰ Elo Yesu amwebele ati, “We munanji, chita icho wishile.” Abantu bayile kuntashi, nokumwikata Yesu.

⁵¹ Nomba umo uwabantu abali pamo na Yesu, asolomwene umwele wakwe nokukwempula ukutwi kwamupyungi wakwa chipupila mukulu.

⁵² Elo Yesu amwebele ati, “Bwelesha umwele muchitubyu, pantu bonse ababomfya umwele bakonaulwa nomwele.

⁵³ Napo ukolanguluka ukuti tekuti njitepo kuli Bata ukwebati bantumine nduno lwenka amabumba ikumi na abili aabangelo?

⁵⁴ Nga chakuti nachita mfi, nga kuti fyachitika shani ifyalembwa Mumalembo?”

⁵⁵ Panuma Yesu abafumbile ati, “Napo nebo ndi chipondo, apo mwayisa nemyele nenkoli mukunjikata, bayi? Inshiku shonse nalikwikala namwebo nkosambisha munanda yaku Lesa, nokuti munjikatepo, yii.

⁵⁶ Chiweme pantu mfi fyonse fyachitika ukuti fibe ifyakwebesha ifyo abasoseshi balembele.” Elo abakusambila bonse bashile Yesu nokufulumuka ulubilo.

Yesu munsaka yamilandu

⁵⁷ Abantu bo abayikete Yesu bamutwite kuli Kayafasi chipupila mukulu, uko abasambishi ba Mafunde nabakulu ba Bayuda balongene.

⁵⁸ Petulo alikukonka Yesu akatalamukila, nakwisano lyakwa chipupila mukulu. Alinjile nokwikala apayikele abashilikali ukuti abone ichikochitika.

⁵⁹ Elo intungulushi shabachipupila nabachilye bonse balikufwayilisha bukamboni bwabufi ubwakuti bapingwilepo Yesu ukufwa.

⁶⁰ Nomba balifililwe, nangu pali bakamboni babufi abenji abakumubepesha. Kumupwilo kwayishile abantu babili,

⁶¹ basosele ati, “Ngu muntu alikweba ati, ‘Nebo kuti natobaula nji nanda yakulombelamo Lesa nakambi nokuyimaka munshiku shitatu bwaka.’”

⁶² Chipupila mukulu ayimakene mulwalala lwachilye nokufumba Yesu ati, “Kanshi taukoyasukapo nangu kamo pali nji milandu iyo abantu bakokwebelela?”

⁶³ Yesu ali chelele, nokwasuka, yii. Elo chipupila mukulu asosele kuli Yesu ati, “Nkokweba mwishina lyaku Lesa uwabumi ukuti utwebe mukulapa kati niwe Klistu, Umwana waku Lesa?”

⁶⁴ Elo Yesu amwebele ati, “Wasosa. Nomba nkomweba ati, ukufuma nomba mwakubona Umwana wa Muntu alikele kukuboko kwamulyo ukwaku Lesa umwine wafiso fyonse, mwakumubona uko akwisa mumakumbi amumulu.”

⁶⁵ Penkapo chipupila mukulu alepawile insalu shakwe nokuti, “Mulandu ndo tukofwayila nabakamboni bambi? Asalula Lesa. Nomba mwayumfwila mwebene umusalula.

⁶⁶ “Nomba mukolangulukapo shani?” Bonse balyasukile chapamo bati, “Alingile bwaka ukuti afwe.”

⁶⁷ Elo bamushipile amate kumenso nokumupama. Elo abamupamine basosele ati,

⁶⁸ “Lota nga ewe Uwasubwa waku Lesa. Ninani wakupuma?”

Petulo akana Yesu

⁶⁹ Nomba Petulo ayikele mulubansa. Elo kwayishile umwanansungu umo umupyungi wakwa chipupila mukulu nokumweba ati, “Nawe kumo wali pamo na Yesu waku Galili.”

⁷⁰ Nomba Petulo alikene kabomfwileko bonse ati, “Webo, nshishibilepo icho ukusosa iyowo.”

⁷¹ Ulo Petulo alikufumina panse pamulyango, umwanansungu umbi amubwene nokweba abalipo ati, “Ngu mwalalume naye aali pamo na Yesu waku Nasaleti.”

⁷² Nakambi Petulo alikene ati, “Nalapa, uyo muntu nshimwishibilepo.”

⁷³ Ulo papitile akashita kanini, abayimakenepo balikweba Petulo ati, “Nachine webo wali pamo na Yesu pantu imisosele yobe yakushinina.”

⁷⁴ Nomba Petulo atatikile ukuyilapisha ati, “Nalapa, Lesa antobaule. Nebo uyo muntu mukoshimbula tanshimwishibilepo nangu panini!” Penkapo natambala alililile.

⁷⁵ Elo Petulo ayibukishe ifyo Yesu asosele ati, “Ulo tambala atalalila ube ulinkene imiku itatu.” Elo Petulo afumine panse nokulila ukwinekantu.