Mateyo 25 - Chipangano Chabwangu

Ichelusho chabanansungu ikumi

¹ “Pali njilya nshita, ubufumu bwakumulu bwakubati banansungu ikumi abapintile inyali shabo nokuya mukuchinsha nshibwinga.

² Basano bali bapuneme, elo bambi basano bali abamano.

³ Abapuneme bapintile inyali shabo, nomba tabapintilepo amafuta.

⁴ Nomba abamano bo balipintile amafuta mumisashi yabo pamo nenyali.

⁵ Pamulandu wakuti nshibwinga alililwe ukwisa, bonse batatikile ukushipula nokuponena mutulo.

⁶ “Elo pakati kabushiku, kwaumfwikile ukwaula ati, ‘Ayisa nshibwinga! Fumeni mukachinshe!’

⁷ Echo abanansungu bonse balibukile nokwasha inyali shabo.

⁸ Abapuneme mbalya basosele kubamano ati, ‘Tupeniko amafuta. Boneni inyali shesu shikoshima!’

⁹ Nomba abanansungu abamano baasukile ati, ‘Nga twamupelako tekuti akumaninepo. Echo kamuya kubamakwebo mukayishitile.’

¹⁰ Ulo balikuya mukushita, nshibwinga alifikile. Echo bonse abayipekenye bayinjile pamo naye kumalila aabwinga. Elo nechiibi chaliselwe.

¹¹ “Panuma abanansungu mbalya balifikile nokusosha nshibwinga ati, ‘Shikulu, shikulu, twiswileniko.’

¹² Nshibwinga abasukile ati, ‘Nachine nkomweba ati, nshimwishibilepo!’”

¹³ Elo Yesu asosele ati, “Echo mulokulola pakuti tamwishibilepo akasuba nangula inshita Umwana wa Muntu akubwela.

Ichelusho chabalimi batatu

¹⁴ “Ubufumu bwakumulu bwakupalana nomuntu uwayile pabulwendo. Atalayima, ayitile abamilimo bakwe nokubapela ububoni bwakwe.

¹⁵ Umo amupele indalama amakana asano. Umbi amupele amakana abili. Elo umbi naye amupele ikana limo. Apele umo naumo ukulingana nefyo angabomba. Ulo ashilile ukubapela, aliile.

¹⁶ Uwapelwe amakana asano alimine nokushifungashanya. Elo asangilemo nashimbi amakana asano.

¹⁷ Uwapelwe amakana abili naye alishifungashenye, kasangamo nashimbi amakana abili.

¹⁸ Nomba ngulya uwo bapele ikana limo, ayile kwimba panshi nokushika indalama shakwa shikulu wakwe.

¹⁹ “Ulo papitile inshita iitali, shikulu wabamilimo mbalya alibwelele nokubeta ukuti bamulondolwele ifyo babomfeshe indalama shakwe.

²⁰ Uwapokele indalama amakana asano alishile nokuletelapo nashimbi amakana asano nokusosa ati, ‘Shikulu, mwampele indalama amakana asano. Boneni, nafungashanyamo nashimbi amakana asano.’

²¹ Elo shikulu wakwe amwebele ati, ‘Wachita bwino wemupyungi uuweme nakambi uwachetekelwa. Pakuti waba wachine patunini, nomba nkokubika ukuba umukulu pafintu ifinji. Echo injila usekelele pamo nandibo ne shikulu obe.’

²² “Uyo Uwapokele indalama amakana abili, naye alishile nokusosa ati, ‘Shikulu mwampele indalama amakana abili. Boneni, nafungashanyamo nashimbi amakana abili.’

²³ Elo shikulu wakwe amwebele ati, ‘Wachita bwino wemupyungi uuweme nakambi uwachetekelwa. Pakuti waba wachine patunini, nomba nkokubika ukuba umukulu pafintu ifinji. Echo injila usekelele pamo nandibo ne shikulu obe.’

²⁴ “Nangulya uwapokele ikana limo naye alishile nokusosa ati, ‘Shikulu, nalishiba ukuti mwebo mwalikosa umutima. Mulalobolola noko mutabyeleko, nokulonganya ifyo mutaminshilepo.

²⁵ Echo nalitinine. Elo nalile kushika indalama shenu panshi. Tenshi indalama shenu!’

²⁶ “Shikulu wakwe amwasukile ati, ‘We mupyungi mubi umufila! Kambi walishibile ukuti ndakobola noko ntabyeleko nokulonganya ifyo ntaminshilepo!

²⁷ Echo walingile ukubika indalama shanji uko babika indalama. Elo nebo pakubwela nga napokelela pamo nambikilapo.

²⁸ Pokeni ikana lyandalama, mupele ngulya uukwete amakana ikumi.

²⁹ Pantu umuntu ukwete ifinji, akubikilwapo nafimbi, nangulya uukwete tunini akupokwa noto akwete.

³⁰ Nomba nchi chinangwa chamuntu, chiposeni panse mumfinshi, ukwakuba ukulila nokukwesanya ameno.’

Ubupingushi bwakupelako

³¹ “Ulo Umwana wa Muntu akwisa mubuleme bwakwe, pamo nabangelo bakwe bonse, akwikala pachipuna chakwe ichabufumu.

³² Imitundu yonse iyabantu ikalonganikwa kuli Ye. Elo akupatula abantu ukubati nimfilya chembela apatula imbelele kumbushi.

³³ Akubika imbelele kukuboko kwakwe ukwamulyo, kuntu imbushi kuchipiko.

³⁴ Elo Imfumu yakusosa kubakumulyo ati, ‘Iseni mwebo Bata bashukisha. Injileni mubufumu ubo Bata bamupekanishisha ukufuma apo ichalo chatalilwe.

³⁵ Pantu ulo nali nensala mwalimpele ichakulya. Nali nechilaka mwalimpele amenshi aakunwa. Nali umulwendo mwalimpokelele.

³⁶ Ulo nali ubwamba, mwalimfwikile. Ulo nali umulwele, mwalimpempwile. Ulo nali muchifungo, mwalimpempwile.’

³⁷ “Elo abo abasekeshe Bashikulu bakwasuka ati, ‘Nilwisa twamubwene nensala, nafwe twamupela ifyakulya? Nilwisa mwali nechilaka, nafwe twamupela ichakunwa?

³⁸ Nilwisa mwali abalwendo, nafwe katumupokelela, nangula ulo mwali ubwamba nafwe katumufwika?

³⁹ Nilwisa mwali abalwele nangula ukuba muchifungo, nafwe katwisa mukumupempula?’

⁴⁰ Elo Imfumu yakubasuka ati, ‘Nachine nkomweba ati, ulo mwayafwilishe umo uwakuli mba abali kubulilwa, ninebo mwayafwilishe.’

⁴¹ “Elo akweba abakuba kuchipiko ati, ‘Fumeni mpa, mwe bashama. Kamuya mumulilo uutashimapo uwo Lesa apekanishishe Satana nabangelo bakwe.

⁴² Pantu nali nensala tamwampelepo ichakulya. Nali nechilaka tamwampelepo ichakunwa.

⁴³ Nali umulwendo, tamwampokelelepo. Nali ubwamba, tamwamfwikilepo. Ulo nali umulwele namuchifungo, tamwampempwilepo.’

⁴⁴ “Elo nabo bakwasuba ati, ‘Mwe Mfumu nilwisa twamubwene mwali nensala nangula nechilaka nangula abalwendo nangula mwali ubwamba nangula mwali abalwele nangula muchifungo, kuntu tatwamwafwilisheko?’

⁴⁵ Naye akubasuka ati, ‘Nachine nkomweba ati, lonse ulo mutalikwafwilishako nangu mba abali kubulilwa, nachine ninebo mutalikwafwilishako.’

⁴⁶ Elo bakuya mumachunshi aamuyayaya, kuntu abo abasekeshe Bashikulu bakwinjila mubumi butapwa.”