Mateyo 22 - Chipangano Chabwangu

Ichelusho chamutebeto wabwinga

¹ Yesu abebele nachimbi ichelusho ati,

² “Ubufumu bwakumulu buli kubati nimfumu imo iyapekanishishe umwana wayiko umutebeto wapabwinga.

³ Yatumine abapyungi bayiko ukuya kwita bo abayitilwe kumutebeto ngu, kuntu balikene ukwisa.

⁴ Elo yatumine abapyungi bambi ati, ‘Kebeni abo abayitilwe ukuti ifyakulya tulipekenye. Intungu shanji neng’ombe shimbi ishinine balipeye. Elo nefintu fyonse balipekenye kale. Echo iseni kumutebeto wabwinga.’

⁵ Nomba bonse abayitilwe tabayileko. Bayile mukuchita bwaka ifyo bakofwaya: umbi ayile kwibala lyakwe, umbi kumakwebo akwe.

⁶ Nomba abashelepo, bayikete abapyungi bakwe, balibachushishe nokubepaya.

⁷ Echo imfumu yalikalipile ukwinekantu. Elo yatumine abashilikali bayiko ukuya kubepaya nokocha umushi wabo.

⁸ Elo yasosele kubapyungi bayiko ati, ‘Ubwinga bapekenye kale, nomba abayitilwe tabalingilepo.

⁹ Kanshi kamuyeni kumampandwa amisebo mukete bonse abo mwakubona!’

¹⁰ Nachine abapyungi bayile mumisebo nokulonganya pamo bonse bo basangile, ababi nabaweme. Elo nenanda yamutebeto yaliwilemo abantu abenji.

¹¹ “Ulo imfumu yayinjilemo mukubona abalwendo, yasangilemo umwalalume umo uutafwitepo ilaya lyabwinga.

¹² Elo yamufumbile ati, ‘We munanji, mba winjilemo shani muno we utafwitepo ilaya lyabwinga?’ Nomba ye akutumene bwaka.

¹³ Elo imfumu yaebele abamilimo bakwe ati, ‘Mukakeni kumaboko nakumolu, mumupose panse pamfinshi. Kwenka uko akulila nokukwesanya ameno!’”

¹⁴ “Pakuti abayitwa benji, nomba abasalwa banini bwaka.”

Umulandu wamusonko

¹⁵ Elo Abafalisi bayile mukupangana ukuti basange umwakumwikatila Yesu mumisosele yakwe.

¹⁶ Bamutumine abakusambila babo, elo nebumba lyakwa Helodi ukuya kumufumba ati, “We musambishi, twalishiba ukuti uli wachine nakambi usambisha ifyachine. Elo tautinapo muntu nangu umo, pakuba tawakwatapo akapatulula kubantu.

¹⁷ Nomba twebeko, ukochibonapo shani? Napo fwebo tulingile ukusonka umusonko kuli Kayisale nangula iyowo?”

¹⁸ Nomba Yesu alishibile ubuchebjeshi bwabo. Elo abebele ati, “Nindo mukonjesesha? Mwe bakutumpayika mwe!

¹⁹ Ndeteleniko indalama mbone.” Nabo balimulangile imo.

²⁰ Elo Yesu abafumbile ati, “Kanshi ngu umutwi namfi ifyalembwapo fyaku nani?”

²¹ Nabo bamwasukile ati, “Fyakwa Kayisale.” Elo abebele ati, “Kanshi peleni kuli Kayisale ifyakwa Kayisale, nakuli Lesa ifyaku Lesa.”

²² Ulo baumfwile mfi, balishimbilwe ukwinekantu. Elo bafuminepo nokumusha.

Umulandu wakubuka kubafwa

²³ Mukasuba kenka nkalya, kwayishile Abasaduki bambi kuli Yesu. Abasaduki mba balikusambisha abantu ukwebati takupo ukubuka kubafwa. Elo bafumbile Yesu ati,

²⁴ “We musambishi, fwebo Mosesi alitukonkobeshe ati, umuntu uwaupa nga afwa ukwambula ukufyalapo abana, wabo alinokupyana mukamfwilwa pakuti afyalileko wakwe abana.

²⁵ Nomba kwalipo abalalume basano na babili abalikwikala nkuno. Umukulu-bantu aupile umwanakashi, kafwa ukwambula ukufyalamo abana.

²⁶ Uwachibili kamupyana, naye chimo chenka kafwa bwaka ukwambula ukufyalamo abana, nowachitatu naye chimo chenka. Basukile bonse basano na babili bashilile ukufwa ukwambula ukuti bafyalemo abana.

²⁷ Kumupwilo umwanakashi naye alifwile.

²⁸ Nomba abantu pakubuka kubafwa, ngu mwanakashi akuba nimukani pali mba bonse basano na babili abo aupilweko?”

²⁹ Elo Yesu alibasukile ati, “Mwaliluba pantu tamwayishiba Amalembo aku Lesa nangula ifiso fyakwe.

³⁰ Pakuba ulo abantu bakabuka kubafwa, tabayise kupanapo iyowo, pantu bakuba kubati bangelo bakumulu.

³¹ Nomba pamulandu wakubuka kwabafwa, napo tamwapendapo ifyo Lesa asosele ati,

³² ‘Nine Lesa wakwa Abulahamu, Lesa wakwa Isake, Lesa wakwa Yakobe?’ Ekwebati ni Lesa wababumi, te Lesapo wabafwa iyowo.”

³³ Nomba abantu abenji abaliko ulo baumfwile mfi, balishimbilwe ukwinekantu pamulandu wakusambisha kwakwe.

Ifunde ilyachilapo

³⁴ Inshita ulo Abafalisi baumfwile ukuti Yesu aasukile Abasaduki bwino-bwino, nabo balongene pamo.

³⁵ Elo umo uwaku bo afwayile ukwesha Yesu. Elo alimufumbile

³⁶ ati, “We musambishi, nga kanshi ifunde lyachilapo pa Mafunde aku Lesa nilisa?”

³⁷ Elo Yesu amwasukile ati, “‘Ulokutemwa Bashikulu Lesa obe nobumi bobe bonse, nomutima obe onse, namano obe onse.’

³⁸ Ndi efunde ilikulu nakambi elyachilapo.

³⁹ Ilyakonkapo nalyo nindi lilikubati linakwe likoti, ‘Ulokutemwa umunobe kubati nimfilya wayitemwa wemwine!’

⁴⁰ Pamafunde nga abili epashinta Amafunde onse akwa Mosesi nokusambisha kwabasoseshi.”

Nga Uwasubwa waku Lesa nimwana nani?

⁴¹ Ulo Abafalisi balongene pamo, Yesu alibafumbile ati,

⁴² “Nga mulangulukapo shani pafya Wasubwa waku Lesa? Wamulupwa lwakwani?” Nabo balimwasukile ati, “Wamulupwa lwakwa Davide.”

⁴³ Elo abebele ati, “Mulandu ndo Davide ulo asanikilwe no Mupashi waku Lesa asosele ati, ‘Ni Mfumu?’ Pakuti asosele ati,

⁴⁴ ‘Bashikulu Lesa basosele kuli Bashikulu banji ati, ikala kukuboko kwanji ukwamulyo, ukufikila mbike utupondo tobe, ukuti tube ichakunyantapo amakasa obe.’

⁴⁵ Kati Davide umwine amwitile ati, ‘Bashikulu,’ mba angaba shani umwana wakwe?”

⁴⁶ Tapalipo nangu umo uwapamine ukumwasuka ishiwi nangu limo iyowo. Ukufumu pali nkalya kasuba, tapalipo nangu umo uwamufumbile amafumbo nayambi.