Mateyo 21 - Chipangano Chabwangu

Ifyo Yesu ayinjile mu Yelusalemu

¹ Ulo Yesu nabakusambila bakwe bapalamine ku Yelusalemu nokufika apepi napamushi wa Betefage Palupili lwa Maolife, Yesu atumine abakusambila bakwe babili

² nokubeba ati, “Kamuya kumushi uuli kuntanshi yenu. Amwayinjila bwaka, mwakusanga punda alikakilwe pamo nakana. Mubakakuleni nokubaleta nkuno.

³ Kati umuntu akumufumba ati, ‘Mba findo mukochita mpo?’ Mumwasuke ati, ‘Bashikulu bali nabo nenchito.’ Elo akoya kumusuminisha.”

⁴ Mfi fyalichitikile ukubati nimulya Lesa asosele mumusoseshi ati,

⁵ “Ebani abamumushi wa Sioni ati, boneni, imfumu yenu ikoyisa kuli mwebo. Iyafuuka, ilininine pali punda, nachine pamwana wa punda.”

⁶ Ulo abakusambila bayile, bachitile mwenka umo Yesu abebele.

⁷ Balitwite punda nomwana kuli Yesu nokwanshikapo amalaya abo pamisana yaku bapunda. Elo Yesu anininepo.

⁸ Abantu abenji bayanshikile ifyakufwala fyabo mumusebo, bambi balikukonaula imisambo yafiti nokwanshika mumusebo.

⁹ Elo abantu balikwendela kuntanshi, nabali kumunkonka panuma, balikwaula bati, “Achinshikwe Mwana Davide! Alishuka uyo uwishila mwishina lyaku Lesa! Muchinshikeni mwe bakumulu wamyulu!”

¹⁰ Ulo Yesu ayinjile mu Yelusalemu, abantu bonse batukwile ichongo nokufumba ati, “Nga uyu muntu ninani?”

¹¹ Amabumba akonkele Yesu ayasukile ati, “Ngu ni Yesu, musoseshi ngulya waku Nasaleti, umushi wamuchalo cha Galili.”

Yesu ayinjila munanda yakulombelamo Lesa

¹² Yesu ayinjile munanda yaku Lesa nokutamfya bonse abalikushitisha nabali kushita mukati. Atatikile ukupenaula amatebulu abantu abali kukabushanya indalama, nefipuna fyaku bo abali kushitisha inkunda.

¹³ Abebele ati, “Chalilembwa ukuti, ‘Inanda yanji yakwitwa inanda yakulombelemo,’ kuntu mwebo eyo mwasangula uluchengo lwabang’o.”

¹⁴ Elo impofu nabalemana bayile kuli Yesu munanda yaku Lesa, na Yesu alibaposeshe.

¹⁵ Intungulushi shabachipupila nabasambishi ba Mafunde babwene ifintu fyakushimbwisha ifyo Yesu achitile. Elo baumfwile abana bakobilikisha munanda yakulombelamo Lesa ati, “Achinshikwe Mwana Davide!” Mfi fyakalifishe imitima yabo.

¹⁶ Echo balimwebele bati, “Napo ulyumfwilepo ifyo mba bakososa?” Elo Yesu abasukile ati, “Ina, napo tamwapendapo amashiwi ngalya aasosa ati, ‘Mwalisambilisha utwayiche notucheche ukuti tumutondayishe ukufikapo.’”

¹⁷ Ulo asosele mfi, Yesu ayile nokuya kumushi wa Beteni uko ayile kulala.

Yesu alapisha ichiti

¹⁸ Kachelo-chelo ulo Yesu alikubwelela ku Yelusalemu, aumfwile insala.

¹⁹ Ulo abwene umukunyu mumbali yanshila, alileko ukuti alyeko amakunyu. Nomba asangileko bwaka amabula enka. Elo asosele kumukunyu ati, “Ukufuma nduno tawakatwalepo nakambi ifisabo.” Penkapo umukunyu ngulya walyumine.

²⁰ Ulo abakusambila babwene mfilya, balishimbilwe, nokusosa ati, “Mba mukunyu wauma bwangu shani mfi?”

²¹ Elo Yesu abasukile ati, “Nachine nkomweba ati, kati mukochetekela nokutakayikapo, tamwakachite bwaka nchi chachitika kumukunyu ngu iyowo, kuntu mungasosa nakulupili ndu mwati, ‘Fuma mpa, uye uyipose muli bemba,’ nacho chakuchitika.

²² Nga mwachetekela, chonse icho mwakufumba mukulomba kwenu, mwakupelwa.”

Insambu shaku Yesu uko shafuma

²³ Ulo Yesu ayinjile munanda yaku Lesa, intungulushi shabachipupila nabakulu Babayuda bayile kuli Yesu ulo alikusambisha, nokumufumba ati, “Ninsambu ndo uchitilamo mfi fintu? Mba uwakupela nshi nsambu ninani?”

²⁴ Yesu abasukile ati, “Nandibo nkomufumbapo chimo bwaka, namwe nga mwangasuka, nkomwebako ukwafuma nshi nsambu nchitilamo fintu.

²⁵ Napo ulubatisho lwakwa Yohane nikuli Lesa lwafumine nangula nikubantu?” Elo batatikile ukutalikishanya bati, “Nga twaeba ati, ‘Lwafumine kuli Lesa,’ Yesu akutufumba ati, ‘Mba nindo mutachetekele Yohane?’

²⁶ Elo atwaeba ati, ‘Lwafumine kubantu,’ tukotina pantu bonse balishininkishe ukwebati Yohane ali musoseshi.”

²⁷ Echo bayasukile Yesu ati, “Tatwishibilepo.” Yesu naye epakubeba ati, “Kanshi nandibo nshamubushepo ukwafuma insambu nshi nchitilamo mfi fintu.

Ichelusho chabana babili

²⁸ “Nomba mukolangulukapo shani? Umuntu umo ali nabana abalumbwana babili. Ulo ayile kumwana wakwamba asosele ati, ‘We mwana wanji, koya ukabombe mwibala lya mpesha lelo.’

²⁹ Naye ayasukile ati, ‘Nshikofwayapo.’ Nomba panuma alilangulukilemo nokuya kubomba.

³⁰ Panuma wishi ayile kumwana wachibili nokumweba amashiwi amo enka. Ye ayasukile ati, ‘Ina, nkoya bata,’ kuntu tayileko.

³¹ Nomba ninani pali mba bana uwachitile ifyalikufwaya wishi?” Nabo bayasukile ati, “Wakwamba.” Yesu epakubeba ati, “Nachine nkomweba ati, abamisonko nabachende bakumutanjilila pakwinjila mubufumu bwaku Lesa.

³² Pakuti Yohane Mubatishi alishile nokumulanga inshila yabulungami, nomba tamwamuchetekelepo iyowo, kubati fintu abamisonko nabachende bamuchetekele. Ulo mwebo mwabwene mfilya, tamwalapililepo nokumuchetekela iyowo.”

Ichelusho chabalimi bamwibala

³³ Yesu asosele ati, “Umfweni ichelusho nachimbi. Kwalipo umuntu umo uwalimine ibala lya mpesha nokushitililako wombe. Ayimbilemo nechakukaminamo impesha, ayimekemo nechiteba. Elo ashile ibala kubalimi bambi nokuya kuchalo chimbi.

³⁴ Ulo inshita iyakulobolola ifitwalo yafikile, umwine webala atumine abasha bakwe kubalimi ukuti bakamuleteleko ifitwalo fyakwe.

³⁵ Nomba abalimi mbalya balimulasawile amabwe.

³⁶ Umwine webala atumineko nabambi abamilimo abenji ukuchila abantanshi. Nabo babachitile mumo mwenka.

³⁷ Pakulekelesha atumineko umwana wakwe nokuti, ‘Nachine umwana wanji bakoya kumuchinshika.’

³⁸ Nomba ulo abalimi bamubwene, balisoshenye abati, ‘Tenjilya impyani yakwe ikoyisa. Iseni tumwipaye pakuti ibala libe lyesu.’

³⁹ Elo bayikete umwana ngulya nokumuposela kunse yebala lya mpesha nokumwipaya.

⁴⁰ “Nomba umwine webala lya mpesha nga abwela, akubachita shani mba balimi?”

⁴¹ Nabo bamwasukile ati, “Nachine akubepaya mba abalimi ababi nokupela ibala ndilya kubalimi bambi abakumupelako ifitwalo munshita shalinga.”

⁴² Elo Yesu abebele ati, “Napo tamwapendapo Mumalembo ukuti, ‘Ibwe ndilya abakwimaka basulile, elyayishile kuba ilinenene ilyapachimfuntu. Kanshi efyo Imfumu yachita! Yangwee, mwandi twashimbwa fwe babonako!’”

⁴³ Elo Yesu abebele ati, “Nkomweba ati, mwakupokwa ubufumu bwaku Lesa, elo bwakupelwa kumutundu umbi uwakutwala ifitwalo ifinenene.” [

⁴⁴ Umuntu onse uukaponena pali ndi bwe, akukonayika, noyo lyakuwilapo akushonayika.]

⁴⁵ Ulo intungulushi shabachipupila na Bafalisi baumfwile ifyelusho fyasoselwe, balishibile ukuti ebo akoeba.

⁴⁶ Echo balikufwaya ukuti bamwikate, nomba batinine abantu pantu abenji balisumine ukuti Yesu musoseshi.