Mateyo 20 - Chipangano Chabwangu

Ichelusho chabamilimo

¹ “Ubufumu bwakumulu buli kubati muntu umo uwafumine luchelo-chelo ukuti enjishe abamilimo mwibala lyakwe ilya mpesha.

² Ulo ashilile ukupangana nabamilimo ukubapa ikobili limo akasuba kamo, alibatumine mwibala lyakwe ilya mpesha.

³ Nakambi alifumine panshita ya 9 koloko, asangile bambi bekele bwaka pachisanke.

⁴ Elo abebele ati, ‘Namwebo kamuya mwibala lyanji, nakwisa kumufolesha isho mulingile ukufola. Nabo balile.’

⁵ Ulo akasuba kafikile 12 koloko, napa 3 koloko achitile mumo mwenka, aya atumako nabambi.

⁶ Elo pa 5 koloko, alile nokusanga nabambi balimakene bwaka. Elo abafumbile ati, ‘Nindo mwikalile mpano akasuba konse?’

⁷ Nabo balyasukile bati, ‘Pantu takupo uwakutwinjisha imilimo.’ Naye abebele ati, ‘Kamuya namwe mwibala lyanji mukubomba.’

⁸ “Ulo kwali ichingulo, umwine webala aeba kapitawo ati, ‘Kete abamilimo, ubafoleshe, ukubalila pabakulekelesha, elo ulekeleshe ukulipila abakwamba.’

⁹ Elo abayinjile pa 5 koloko wachungulo bayisa, balipilwe ikobili limo-limo.

¹⁰ Abapakwamba ulo bayishile, balikulanguluka ati bakofola indalama ishinji. Nomba nabo balipilwe ikobili limo-limo.

¹¹ Pakufola bayilishenye kumwine webala

¹² ati, ‘Mba abalekelesha ababomba bwaka oola limo, ebo mwatulinganya nabo. Fwebo tulichulile akasuba konse!’

¹³ Nomba alyasukile umo waku bo ati, ‘We munanji, tanshikuchenjelekelepo iyowo. Napo tatupangenepo nobe ikobili limo?

¹⁴ Bula ikobili lyobe ulokuya. Nafwaya ukuti mpele uwakulekelesha ikobili limo ukubati nimfi nakufolesha webo.

¹⁵ Napo tekuti nchitepo ifyo nkofwaya pandalama shanji? Napo wafitwa pamulandu wakupela kwanji?’”

¹⁶ Elo Yesu alekelesha ukusosa ati, “Nomba abapanuma ebakuba abapantanshi, nabapantanshi ebakuba abapanuma.”

Yesu asosa pamfwa yakwe inshita yachitatu

¹⁷ Ulo Yesu alikuya ku Yelusalemu, atwite abakusambila bakwe pambali nokubeba ati,

¹⁸ “Boneni! Tukoya ku Yelusalemu uko Umwana wa Muntu bakoya kumutwala kuntungulushi shabachipupila nakubasambishi ba Mafunde. Bakoya kumupingula ukufwa.

¹⁹ Bakoya kumupela muminwe yabenafyalo. Nabo bakoya kumusekuluka, ukumupanda ifikoti nokumusamika pamutashi. Nomba pakasuba kalenga shitatu akwisa kubuka kubafwa.”

Icho balombele banyina Yohane

²⁰ Elo bamuka Sebedi bayile kuli Yesu nabana babo babili. Balimufukamine ukuti bamulombepo ichintu chimo.

²¹ Elo Yesu abafumbile ati, “Nindo mukofwaya?” Nabo balyasukile ati, “Nati ubalaye ukwebati abana banji mba babili bakese kwikala umbi kukuboko kwenu ukwamulyo, umbi naye ukwakuchipiko ulo mwakwisa mubufumu bwenu.”

²² Yesu alyasukile ati, “Tamwishibilepo icho mukofumba. Napo mwebo mwinganwenako kulukombo lwamachushi ulo nkoya kunwenako?” Nabo balimwasukile ati, “Ina, kuti twachita.”

²³ Yesu alibasukile ati, “Nachine mwakwisa kunwako kulukombo lwanji, nomba tanshikwetepo insambu ishakusuminisha abakwikala kukuboko kwanji ukwamulyo nangula ukwakuchipiko. Ni Bata ebakupela ififulo kuli bo abo bapekanishishe.”

²⁴ Ulo abakusambila banabo ikumi baumfwile mfi, balikalipile bawabo mbalya babili.

²⁵ Elo Yesu abetile pamo nokusosa ati, “Mwe mwalishiba ukuti bakateka babenafyalo balila abantu babo amasuku pamitwi. Elo intungulushi nasho shibwenesha ifiso fyashiko pabantu babo.

²⁶ Nomba tachifwile ukubapo mfi kuli mwe. Uyo onse uukofwaya ukuba umukulu pakati kenu, abe umupyungi wenu.

²⁷ Echo na uyo onse uukofwaya ukuba uwantashi pakati kenu, abe umusha wenu.

²⁸ Pakuti nangu Mwana wa Muntu umwine tayishilepo ukuti bakamupyungile iyowo, kuntu Ye ayishile mukupyungila nokupela ubumi bwakwe ukuti abantu abenji bakalubulwe.”

Yesu aposha impofu shibili

²⁹ Ulo Yesu nabakusambila bakwe balikufuma mu Yeliko, ibumba lyabantu ilikulu lyalikubakonka.

³⁰ Nomba impofu shibili ishalalume shayikele mumbali yanshila. Ulo shaumfwile ukuti Yesu akopita munshila njilya, shalibilikishe neshiwi ilikulu ati, “Mwe Shikulu, mwe Shikulu, Mwana Davide, tukwatileni ichisa!”

³¹ Abantu mbalya balikalipile impofu nokusheba ukuti shitalale. Nomba shena shalibilikishe ati, “Mwe Bashikulu, Mwana Davide, tukwatileni inkumbu!”

³² Yesu alimakene nokushita. Elo ashifumbile ati, “Nindo mukofwaya ukuti muchitile?”

³³ Nasho shalyaswike ati, “Bashikulu, tukofwaya ukubona.”

³⁴ Yesu alibomfwilile inkumbu nokubekata pamenso abo. Penkapo balitatikile ukubona nokumukonka kabamukonka.