Mateyo 19 - Chipangano Chabwangu

Umulandu wakubengana mufyupo

¹ Ulo Yesu ashilile ukusosa nga mashiwi, alifumineko ku Galili, nokuya kuchalo cha Yudeya kwitala lya Yodani.

² Amabumba abantu alimukonkele. Elo alibaposeshe kwenka nkulya.

³ Bambi abamu Bafalisi bayishile kuli Yesu mukumwesha bati, “Napo chamwifunde kumwalalume ukubenga umukashi wakwe pamulandu uuli onse?”

⁴ Naye abasukile ati, “Napo tamwapendapo ukuti pakutatika Lesa abumbile umwalalume nomwanakashi?

⁵ Lesa asosele ati, ‘Pamulandu ngu umwalalume akusha bawishi nabanyina nakuyilundako kumukashi wakwe. Echo mba babili bakuba umubili umo!’

⁶ Nomba tabalipo babili iyowo, kuntu bali umo bwaka. Echo icho Lesa alundanya, umuntu elundululapo.”

⁷ Abafalisi balimufumbile ati, “Kanshi chindo Mosesi asuminishe ukuti umwalalume apele umukashi wakwe kalata yakumubengelapo, elo amuleke?”

⁸ Naye Yesu alibasukile ati, “Mulandu wakutomfwapo kwenu echo Mosesi amusuminishe ukubenga abakashi benu. Nomba ukufuma pakutatika kwachalo tefyopo chali iyowo.

⁹ Nomba nkomweba ati, umuntu nga abenga umukashi wakwe nokupa umbi pamulandu uutali wabuchende, epela achita ubuchende.”

¹⁰ Elo abakusambila bakwe bamwebele ati, “Kati umulandu wamwalalume nomwanakashi waba mfi, chingalinga bwaka nokutopapo.”

¹¹ Elo Yesu abebele ati, “Te bonsepo abomfwisha amashiwi nga iyowo, kuntu abo Lesa afwilisha.

¹² Eko bali bambi abatangopapo, pantu efyo bafyelwe. Eko bali bambi abatangopapo, pantu abantu bambi babachitile mfi. Elo eko bali nabambi abasala ukutopapo, pantu bakofwaya ukupyungila Lesa. Uyo uungomfwa mfi, omfwishe.”

Yesu ashukisha abana banini

¹³ Abantu bambi baletele abana banini kuli Yesu ukuti abike amaboko akwe pali bo nokubashukisha. Nomba ulo abakusambila bakwe bababwene, balibakalipile.

¹⁴ Elo Yesu asosele ati, “Lekeni abana banini bese kuli nebo, mwibakanyapo, pakuti Ubufumu bwakumulu bwaku bo abali nga mba.”

¹⁵ Elo abikile amaboko akwe pabana banini. Ulo ashilile, ayile kumbi.

Umulumbwana umusambashi

¹⁶ Nomba kwayishile umwalalume umo kuli Yesu nokumufumba ati, “We musambishi, chintu ndo ichiweme mfwile ukuchita pakuti nkapoke ubumi butapwa?”

¹⁷ Naye amwasukile ati, “Mba nindo wamfumbila pachintu ichiweme? Uuweme Umo bwaka. Nomba nga akofwaya ukukwata ubumi butapwa ulokukonka amafunde akwe.”

¹⁸ Naye alimufumbile ati, “Mafunde ndo?” Yesu amwasukile ati, “Wilokwipayapo, wilokuchitapo buchende, wilokwibapo, wilokubepeshapo umunobe,

¹⁹ chinshika bawiso nabanoko, nakambi ulokutemwa umunobe kubati nimfilya wayitemwa wemwine.”

²⁰ Elo mulumbwana ngulya alyasukile ati, “Nga Mafunde onse naliyalama. Nomba chindo chashalako?”

²¹ Yesu amwasukile ati, “Kati ukofwaya ukuba uwapwililika, koya ukashitishe ifintu fyonse ifyo wakwata. Indalama wakusangamo, ushipele kubachula, elo wakwisa kuba nobuboni kumulu. Elo wise unkonke.”

²² Ulo umulumbwana ngu aumfwile mfi, ichinso chakwe chalifitile. Epo ayile nechinkonko pantu ali nobuboni ubwinji ukwinekantu.

²³ Elo Yesu asosele kubakusambila bakwe ati, “Nachine nkomweba ati, chaliba ichakosa kumuntu uwabuboni ukwinjila mubufumu bwakumulu.

²⁴ Echo chaliba ichayanguka ingamila ukupula mulinso lyakashinje ukuchila umusambashi ukwinjila mu Bufumu bwaku Lesa.”

²⁵ Abakusambila bakwe balishimbilwe ukwinekantu pakumfwa nga mashiwi. Epo balifumbene bati, “Nga muntu shani wakwisa kupuluka?”

²⁶ Yesu alibalolekeshe nokusosa ati, “Nchi chaba ichafishe kubantu, kuntu tekuli Lesapo iyowo. Kuli Ye fyonse finakile.”

²⁷ Elo Petulo asosele ati, “Boneni, fwebo twalisha ifintu fyonse nokumukonka. Kanshi fwebo findo twakupelwapo?”

²⁸ Yesu abebele ati, “Nachine nkomweba ati, mubufumu bwabwangu bukoyisa, ulo Mwana wa Muntu akwikala pamupando wakwe uwabuleme, namwe mwe bankonka mwakwikala pamipando iili ikumi na ibili. Mwakuya kupingula imitundu ikumi na ibili iya Baisilaeli.

²⁹ Na uyo onse uwasha inanda, nangula bawabo, nangula inkashi, nangula bawishi, nangula banyina, nangula abana, nangula amabala pamulandu wakunebo, akupokelelapo ifinji ukwinekantu ukuchila ifyo ashile. Akupokelela ubumi butapwa.

³⁰ Nomba abenji abali pantanshi ebakuba panuma, nabo abapanuma abenji ebakuba pantanshi.