Mateyo 18 - Chipangano Chabwangu

Ninani umukulu mubufumu bwakumulu

¹ Panshita yenka njilya, abakusambila bayile kuli Yesu nokuti, “Nga umukulu mubufumu bwakumulu ninani?”

² Elo ayitile akana kanini nokukemanika pantanshi yabo,

³ nokuti, “Nachine nkomweba ati, nga tamuli kubati twana tunini, tamwakenjilemo mubufumu bwakumulu.

⁴ Kanshi uuyichefya ukubati akana kanini nka, ewakuba umukulu mubufumu bwakumulu.

⁵ Nakambi umuntu onse upokelela akana kanini akalinga nka mwishina lyanji, epela nine apokelela.

Ifilenga ukubifya

⁶ “Kati umuntu akulenga umo uwaku mba bana banini ukuposa ichichetekelo muli nebo, chamulinga ukumukakila ichilibwe chakupelako mumukoshi wakwe nokumuposa muli bemba.

⁷ Ishamo kubantu bapanonshi abo abalenga abanabo ukubifya! Ina ukubifya epo kwaba, kuntu ishamo kumuntu uyo uulenga abantu bambi ukubifya!

⁸ “Kati ukuboko nangula ukulu kobe kulakulenga ukubifya, kuputuleko nokukuposa! Chawama ukwinjila mubumi butapwa uwaputulwako ukuchila ukuya kuposwa mumulilo uutashimapo namaboko abili nangula namolu abili.

⁹ Nakambi kati ilinso lyobe lilakulenga ukubifya lilobolemo. Chawama ukwinjila mubufumu bwaku Lesa nelinso limo ukuchila ukuposwa mumulilo uutashimapo namenso abili.

Ichelusho chambelele yalubile

¹⁰ “Chenjeleni ukuti mwisulapo umo uwabana mba abanini. Nachine nkomweba ati, abangelo babo abakumulu baba pantanshi yaku Bata abali kumulu inshita shonse. [

¹¹ Pantu Umwana wa Muntu ayishile mukupulusha bo abaluba.]

¹² “Nga mwebo mukolangulukapo shani? Nga umuntu alikwete imbelele umwanda umo, elo imo yaluba, napo tekuti ashepo isho ishili amakumi asano na ane nashisano nashine nokuya kufwaya njilya iilubile?

¹³ Nachine nkomweba ati, nga ayisanga alinokusekelela ukwinekantu pali njilya imo ukuchila pali nshilya ishitalubilepo.

¹⁴ Efyo na Bata abali kumulu tabafwayapo umo uwabana mba abanini ukuti alube.

Ifyo tulingile ukuchita umunensu nga atubifisha

¹⁵ “Kati wenu akubifisha uye ukamwebe ulo muli babili bwaka. Elo nga akumfwila ekwebati mwawikishanya.

¹⁶ Nga tomfwilepo, witeko umuntu umo nangu babili ukuti umulandu onse upingulwe pamenso yabakamboni babili nangu batatu.

¹⁷ Kati akana ukubomfwila nabo, webeko abamuchilonganino chaku Lesa. Nga akana ukubomfwila abamuchilonganino, elo umuchite nga uwakunse nangu kasonkesha.

Ukubinda nokusuminisha

¹⁸ “Nachine nkomweba ati, chonse icho mwakaka panonshi, nakumulu chakakwa, necho mwakakula panonshi, nakumulu chakakulwa.

¹⁹ “Nakambi nkomweba ati, nga abantu babili pali mwebo baumfwana panonshi ukulombapo ichintu chimo, Bata abakumulu bakubapela.

²⁰ Pantu uko abantu babili nangu batatu balongana mwishina lyanji, nandibo ndi pakati kabo.”

Ichelusho chamupyungi uwankansa

²¹ Elo Petulo ayile kuli Yesu nokumufumba ati, “Bashikulu, nga wesu ambifisha kuti namunakilila imiku inga? Napo isano na ibili?”

²² Yesu alimwasukile ati, “Temikupo isano na ibili bwaka iyowo, kuntu ukufikila imiku amakumi asano na abili ukufushishako imiku isano na ibili.

²³ Pantu ubufumu bwakumulu buli kubati nimfumu iyayitile abapyungi bayiko ukuti babweshe inkongole shabo kuli ye.

²⁴ Ulo yatatikile ukupitulukamo, umo uwakongwele indalama amakana ikumi limo, aletelwe kuli ye.

²⁵ Nomba pamulandu wakuti takwete ichakufutilako, imfumu yakwe yapingwile ukuti ashitishiwe pamo nomukashi wakwe nabana, nafyonse ifyo akwete, ukuti abweshe inkongole yakwe.

²⁶ Ulo umupyungi aumfwile mfi, afukeme pamakasa aamfumu nokuti, ‘Nakilileniko, nakumubwesesha shonse.’

²⁷ Elo imfumu yamupyungi ngu yamukwatile inkumbu, yalimunakilile inkongole nokumweba ukuti aye.

²⁸ “Nomba ulo afuminepo bwaka, akumenye umupyungi munakwe uwamukongwele indalama umwanda umo bwaka. Alimukamine pamukoshi nokumweba ati, ‘Mbwesesha inkongole yanji!’

²⁹ Umupyungi munakwe alimufukamine nokumupapata ati, ‘Nakilileniko, nakumubwesesha!’

³⁰ Nomba ye alikene, alimwikete nokuya kumuposa muchifungo ukufikila akabweshe inkongole.

³¹ Ulo abapyungi banakwe babwene mfilya, baliketwe ichikonko. Elo bayile kubusha imfumu yabo ifyachitikile.

³² Elo imfumu yakwe yalimwitile nokumweba ati, ‘We mupyungi mubi we! Nalikunakilile umulandu onse ngulya pantu walimpapatile.

³³ Nomba webo taukwatilepo umunobe inkumbu kubati nimfilya nebo nakukwatile inkumbu?’

³⁴ Echo mubukali imfumu yakwe yamutumine kuchifungo ukuti akakwe ukufikila akabweshe inkongole yonse.”

³⁵ “Efyo namwe bakumuchitila Bata abakumulu nga tamukonakililapo wenu nomutima onse.”