Mateyo 17 - Chipangano Chabwangu

Kusanguka kwaku Yesu palupili

¹ Ulo papitile inshiku shisano nabumo, Yesu abulile Petulo, Yemusi na Yohane wabo nokuya nabo kulupili ulutali apabenka.

² Elo asangukile pamenso abo. Impumi yakwe yalikubengeshima kubati kasuba, amalaya akwe alikubeka nokubutisha tuutu.

³ Penkapo abakusambila balibwene Eliya na Mosesi bakososhanya na Yesu.

⁴ Elo Petulo aebele Yesu ati, “Bashikulu, chingawama kuli fwebo ukwikala mpano! Kati mukofwaya, nkoyimaka imisasa itatu: Umo ube wenu, umbi ube wakwa Mosesi, umbi nawo ube wakwa Eliya.”

⁵ Achili mukusosa, kwayishile ikumbi ilitubile tuutu nokubafimba. Elo mwafumine ishiwi mukati kekumbi ndilya ilyasosele ati, “Ngu Mwana wanji uwatemwekwa. Muli Ye emo nkosekelela. Mumfweni!”

⁶ Ulo abakusambila baumfwile ishiwi, balitinine ukwinekantu nokuwila panshi ubwifuneme.

⁷ Elo Yesu apalamine nokubakumya nokuti, “Bukeni, mwitinapo!”

⁸ Ulo bashibatwile amenso, tababwenepo umuntu umbi, sembi Yesu enka.

⁹ Ulo balikutentemuka ulupili, Yesu alibakonkobeshe ati, “Tekwesha ukubushako umuntu nangu umo ifyo mwabona, sembi ulo Umwana wa Muntu akubuka kubafwa.”

¹⁰ Elo abakusambila balimufumbile ati, “Mba nindo abasambishi ba Mafunde bakososela ati Eliya ewakubalilapo ukwisa?”

¹¹ Yesu alibasukile ati, “Nachine Eliya ewakubalilapo ukwisa mukuwamya ifintu fyonse.

¹² Nomba nkomweba ati, Eliya alisa kale, kuntu abantu tabamwishibilepo iyowo. Elo bamuchitile bwaka umo balikufwayila abene benka. Efyo no Mwana wa Muntu bakumuchusha.”

¹³ Elo abakusambila baumfwile ukuti alikusosa pali Yohane Mubatishi.

Yesu aposha umulumbwana uwali nomupashi uubi

¹⁴ Ulo bafikile ukwali ibumba lyabantu, umuntu umbi ayile kuli Yesu nokumufukamina.

¹⁵ Elo asosele ati, “Bashikulu, beni nenkumbu pamwana wanji pantu akolwala ichinkoni-nkoni, nakambi chilamuposa mumulilo nangu mumenshi.

¹⁶ Nalimuletele kubakusambila benu ukuti bamuposhe, kuntu chalibakangile.”

¹⁷ Yesu alibasukile ati, “Mama wesu ee, mwe nkulo iibipile neyitachetekelapo! Kanshi nakwikala nenu ukufika lwisa? Nkoshipikisha nenu ukufika lwisa? Temulandupo, letenipo umulumbwana kuli ne!”

¹⁸ Elo Yesu akalipile umupashi uubi uwalikuchusha umulumbwana ngulya, nawo walifuminemo muli ye. Elo alipolele panshita yenka njilya.

¹⁹ Nomba abakusambila balimufumbile kumbali ati, “Mulandu ndo fwebo chatukangila ukufumya umupashi uubi?”

²⁰ Naye abebele ati, “Pantu ukuchetekela kwenu kunini. Nachine nkomweba ati, nga mwakwata ichichetekelo kubati kaluseke kamasitadi, kuti mwaeba ulupili ndu ati, ‘Telela nkulya!’ Nalo kuti lwatela, tekuti kube nangu chimo icho ichingamukanga.”[

²¹ Echo pakutamfya umupashi uubi uwaba mfi, takupo inshila imbi, kuntu nimukulomba namukuyikanya ukulya.]

Yesu asosa nakambi pamfwa yakwe

²² Ulo abakusambila balongene pamo mu Galili, Yesu alibebele ati, “Umwana wa Muntu akoyembulwa kubantu.

²³ Elo bakumwipaya. Nomba mubushiku bwalenga shitatu, akwisa kubuka kubafwa.” Abakusambila balibele nechikonko

Yesu apela umusonko wananda yaku Lesa

²⁴ Ulo Yesu nabakusambila bakwe bafikile ku Kapenaumu, abalonganya umutulo wananda yaku Lesa bayile kuli Petulo nokumufumba ati, “Napo umusambishi wenu tatulapo umusonko uwakunanda yaku Lesa?”

²⁵ Petulo alyasukile ati, “Alatula.” Ulo Petulo ayinjile munanda, Yesu abangililepo ukumweba ati, “Webo Simoni ukolangulukapo shani? Kanshi imfumu shachalo nikulibani shipoka umusonko? Napo nikubantu bashiko nangula nikuli bambi?”

²⁶ Petulo alyasukile ati, “Nikuli bambi.” Yesu amwebele ati, “Kanshi abantu babo tabatulapo umusonko.

²⁷ Nomba pakuti abantu befulwapo, koya kuli bemba ukateye indobani. Inswi iyo ukoya kubalilapo ukuloba, ukayichenamune akanwa, elo wakusangamo indalama. Ukashipinte indalama nshilya nokuya tula umusonko wanji nowobe.”