Mateyo 16 - Chipangano Chabwangu

Abafalisi bafwaya ichakubwenako

¹ Abafalisi na Basaduki bambi bayile kuli Yesu mukumwesha. Balimufumbile ukuti achitepo ichafiso ifikulu chimo ichakulanga ukuti atumwa na Lesa.

² Elo abasukile ati, “Kunshita yachungulo mulati, ‘Bwakucha bwino pantu kumulu kwaba chee.’

³ Namuluchelo mweba ati, ‘Lelo kukoba imfula iinekantu pantu kumulu kwaba amakumbi aaswetele nafitile fititi.’ Mwalishiba ukwilula ifiboneka iwulu, kuntu chilamukanga ukwilula ifyakubwenako ifyanduno.

⁴ Ilabipa njino nkulo iitachetekelapo muli Lesa, iikofwaya ichafiso ifikulu! Nomba tayakachibonepo, sembi ichachitikile kuli Yona umusoseshi.” Elo kafumapo nokuya kaya.

Imimena ya Bafalisi na Basaduki

⁵ Ulo abakusambila baabukile kwishilya, balilabukile ukupinta imifuba.

⁶ Elo Yesu asosele kuli bo ati, “Chenjeleni nemimena ya Bafalisi na Basaduki.”

⁷ Nabo balisoshenye bati, “Ifyo asosele mfi pantu tatuletelepo imifuba.”

⁸ Nomba Yesu alishibile ifyo balikusoshanya. Elo abafumbile ati, “Mwe bantu bachichetekelo chinini! Findo ifyo mukososhanya mwati, tatukwetepo imifuba?

⁹ Napo nanomba tamulaumfwikishapo? Kanshi tamukoyibukishapo imifuba njilya isano iyo nasunawile nokulisha abantu amakana asano? Nga fyashelepo, mwayiwishe imiseke inga?

¹⁰ Ngolo nasunawilile abantu imifuba isano na ibili nokulisha abantu amakana ane, kanshi ifyashelepo mwayiwishe imiseke inga?

¹¹ Nga mulandu ndo muteshibilepo ukwebati tanshikososapo pamulandu wamifuba? Echo chenjeleni nemimena ya Bafalisi neya Basaduki.”

¹² Nomba baumfwikishe ukwebati temimenapo iyakututumwinako imifuba Yesu alikubachenjeshako, kuntu kusambisha kwa Bafalisi na Basaduki.

Yesu e Wasubwa waku Lesa

¹³ Ulo Yesu afikile muchalo cha Kayisaleya Filipi, afumbile abakusambila bakwe ati, “Nga bantu basosa ati Umwana wa Muntu ninani?”

¹⁴ Nabo balimwasukile ati, “Bambi basosa ati niwe Yohane Mubatishi, bambi bati niwe Eliya, elo bambi nabo basosa ati niwe Yelemiya nangula umo uwabasoseshi.”

¹⁵ Elo Yesu abafumbile ati, “Nga mwe mwebati nine nani?”

¹⁶ Simoni Petulo alyasukile ati, “Niwe Uwasubwa waku Lesa ngulya uwalayilwe, Mwana Lesa wabumi.”

¹⁷ Pakwasuka Yesu amwebele ati, “Walishuka Simoni mwana Yona, pantu temuntupo uwakufisulwila nchi iyowo, kuntu ni Bata bakumulu.

¹⁸ Nomba nkokweba ati, niwe Petulo, elo pachibwe nchi, nkemakapo ulukuta lwanji. Elo nefiso fyamfwa tafyakaluchimfyepo iyowo.

¹⁹ Nakukupa imfungulo shabufumu bwakumulu. Chonse icho wakaka panonshi nakumulu chakakwa, necho wakakula panonshi, nakumulu chakakulwa.”

²⁰ Elo Yesu abakonkobeshe abakusambila bakwe ati, tekwesha ukubushako umuntu nangu umo ukwebati nine Uwasubwa waku Lesa.

Yesu asosa pafyakuchula nemfwa yakwe

²¹ Ukufuma panshita njilya Yesu atatikile ukulondolwela abakusambila bakwe ati, “Ningile ukuya ku Yelusalemu uko abakulu Babayuda, intungulushi shabachipupila, nabasambishi ba Mafunde bakuya kunchusha ukwinekantu nokunjipaya. Nomba mukasuba kalenga shitatu nakwisa kubuka kubafwa.”

²² Ulo Petulo aumfwile mfi, abulile Yesu nokuya nakwe pambali, atatikile ukumwebaula ati, “Iyowo Bashikulu! Nchi tachamuchitikilepo!”

²³ Nomba Yesu alyalukile nokwebaula Simoni Petulo ati, “Fuma mpa Satana! Pantu ifyo ukolanguluka tefyaku Lesa iyowo, kuntu fyabuntu.”

²⁴ Elo Yesu asosele kubakusambila bakwe ati, “Umuntu kati akofwaya ukunkonka ayikanye umwine nokupinta umutashi wakwe, elo ankonke.

²⁵ Pakuti umuntu onse uukofwaya ukupulusha ubumi bwakwe akwisa kubuposa. Nomba uyo onse uwakuposa ubumi bwakwe pamulandu waku nebo, ewakubupulusha.

²⁶ Mba bune ndo chingamuletelapo umuntu nga anonke ichalo chonse nomba alufya ubumi bwakwe? Nga chintu ndo umuntu angakabushanyapo nobumi bwakwe?

²⁷ Pantu Umwana wa Muntu akwisa nabangelo bakwe mubuleme bwaku Wishi. Elo akwisa kupela umuntu umo-umo ukulingana nemilimo yakwe iyo achita.

²⁸ Nachine nkomweba ati, epo bali bambi abemakene mpano abatakafwepo, kuntu bakabale ukubona Umwana wa Muntu akoyisa mubufumu bwakwe.”