Mateyo 15 - Chipangano Chabwangu

Ukusambisha kwabakale

¹ Elo bambi Abafalisi nabasambishi ba Mafunde abafumine ku Yelusalemu balongene kuli Yesu nokuti,

² “Mulandu ndo abakusambila benu batakonkelapo utufuto twafikolwe fyesu? Pakuba tabasambapo kuminwe ulo tabalatatika ukulya?”

³ Naye alibasukile ati, “Nga mwe, mulandu ndo musulila amafunde aku Lesa pamulandu wakulama utufuto twenu?

⁴ Pakuti Lesa alimwebele ati, ‘Ulokuchinshika bawiso nabanoko,’ nokuti, ‘Uwatuka bawishi nangula banyina alingile ukumwipaya.’

⁵ Nomba mwe mukoti nga umuntu aeba bawishi nangula banyina ati, ‘Ifyo nalikufwaya ukumwafwilishako napela kuli Lesa,’

⁶ talingilepo ukuchinshika bawishi iyowo. Echo pamulandu wakusambisha kwenu, mwasula amashiwi aku Lesa nokukonka ukusambisha kwenu.

⁷ Mwe bakutumpayika mwe, umusoseshi Esaya alilungikile ulo asosele pali mwe ati,

⁸ ‘Mba bantu banchinshika bwaka nemilomo yabo, kuntu imitima yabo ili ukutali nane.

⁹ Ukunambila kwabo kwabwaka, pantu basambisha bwaka ifyabantu ukubati mafunde yanji!’”

Ifintu ifikowesha muntu

¹⁰ Nakambi Yesu ayitile ibumba lyabantu nokubeba ati, “Kutikeni, mumfwikishe!

¹¹ Takupo ichintu ichingila mumala amuntu nokumukowesha, kuntu nchilya ichifuma mukanwa kakwe echimukowesha.”

¹² Elo abakusambila bakwe balishile kuli Ye nokuti, “Napo ulishibile ukwebati Abafalisi balikalipile ulo basa kumfwa ifyo usosele?”

¹³ Naye alibasukile ati, “Ichilimbwa chonse icho Bata abakumulu batalimbilepo bakuchishula.

¹⁴ Balekeni bwaka, nimpofu ishitanjilila impofu shinabo. Kati impofu ikotanjilila impofu inakwe, shonse shibili shingawila muchilindi.”

¹⁵ Nomba Petulo asosele kuli Yesu ati, “Twalwileni nchi ichelusho.”

¹⁶ Naye asosele ati, “Kanshi namwebo tamwaumfwikishapo?

¹⁷ Napo tamwishibilepo ukwebati chonse ichinjila mukanwa kamuntu chilaya mumala nokufumina kunse?

¹⁸ Nomba ichifuma kukanwa echifuma kumutima, elo echimukowesha.

¹⁹ Pantu mumutima emufuma amalangulushi aabi: ukwipaya, ubuchende, nokuchita ifintu ifyabipa, ukwiba, ubufi, nokwamba abanabo.

²⁰ Fyonse mfi efikowesha umuntu, kuntu ukulya neminwe iitasambilwe tafikoweshapo muntu iyowo.”

Ichichetekelo chamwanakashi

²¹ Ulo Yesu afumine nkulya atelele apepi nemipaka yaku Tule na Sidoni.

²² Elo kwayishile umwanakashi umwina Kenani uwalikwikala nkulya. Alibilikishe ati, “Mwe Bashikulu mwana Davide, nkwatileni inkumbu. Umwana wanji umwanansungu ali nemipashi iibi iinji.”

²³ Nomba Yesu tamwasukilepo iyowo. Elo abakusambila bayile kuli Ye nokumupapatila bati, “Mwebeni ngu mwanakashi alokuya aletukomya amatwi kuchongo.”

²⁴ Elo Yesu asosele kumwanakashi ati, “Natumwa bwaka kubena Isilaeli abali kubati nimbelele ishaluba.”

²⁵ Ulo asosele mfi, umwanakashi alile nokumufukamina ati, “Bashikulu ngafweni.”

²⁶ Elo amwasukile ati, “Te chiwemepo ukubula ifilyo fyabana nokuposela imbwa.”

²⁷ Naye alyasukile ati, “Ina Bashikulu, nomba nembwa nasho shilalyako utusunaulwa utukoponayila munshi yetebulu lyakwa shikulu washiko.”

²⁸ Elo Yesu amwasukile ati, “We mwanakashi we, ichichetekelo chobe chikulu! Icho wafumba chichitikwe.” Penkapo umwana wakwe umwanansungu alipolele.

Yesu aposha abalwele abenji

²⁹ Ulo Yesu afumine nkulya, ayile kululamba lwaku bemba wa Galili. Aninine ulupili nokwikala panshi.

³⁰ Amabumba aakulu abantu ayile kuli Ye. Amutwalile abantu abalemene, impofu, bachibulu nabalwele bambi abenji, balikubabika apali Yesu. Naye alikubaposha.

³¹ Nomba abantu bonse balishimbilwe ukwinekantu ulo babwene bachibulu bakososa, abalemene bakoyenda nempofu shikobona. Elo namabumba atatikile ukutondayisha Lesa waba Isilaeli.

Yesu alisha abantu amakana ane

³² Yesu alitile abakusambila bakwe nokusosa kuli bo ati, “Ndi nenkumbu pebumba ndi pakuti bayikala nandibo nomba inshiku shitatu. Epo tabakwetepo nefyakulya. Nga nati mbaleke babwelelemo nensala kwabo, kuti bafwa ulushile munshila pantu bambi bafumine ukutali.”

³³ Elo abakusambila bakwe balimufumbile ati, “Nga muno muchiswebebe umuntu kuti afumya kwisa ifilyo fyakuti mba bantu bonse bekute?”

³⁴ Yesu alibafumbile ati, “Mukwete imifuba inga?” Nabo bamwasukile ati, “Isano na ibili notuswi tunini bwaka.”

³⁵ Elo Yesu aebele ibumba lyabantu ukwikala panshi.

³⁶ Abulile imifuba isano na ibili notuswi nokutotela kuli Lesa. Elo asunawile imifuba nokupela abakusambila bakwe ukuti balumbe kubantu. Nabo efyo bachitile.

³⁷ Bonse abantu balilile nokwikuta. Abakusambila batolele utusunaulwa utwashelepo imiseke isano na ibili.

³⁸ Abalalume abalileko bali amakana ane, ukutapendelako abanakashi nabana.

³⁹ Ulo ashilile ukulayana nabantu, apateme mubwato nokuya kuchalo cha Magadani.