Mateyo 14 - Chipangano Chabwangu

Imfwa yakwa Yohane Mubatishi

¹ Pali njilya nshita imfumu Helodi yalyumfwile umunkunta waku Yesu.

² Elo yasosele kuli bachilolo bayiko ati, “Ngu ni Yohane Mubatishi abukile kubafwa. Echo akwatile ifiso ifyakuchita ifintu ifikulu.”

³ Pakuti Helodi ayikete Yohane nokumukaka, amubika namuchifungo pamulandu wakwa Helidiyasi muka Filipo, wabo wakwa Helodi.

⁴ Pantu Yohane alikweba Helodi ati, “Chalibindwa ukupa mukawenu.”

⁵ Epo Helodi alikufwayila ukwipaya Yohane, kuntu alikutina abantu pantu balikusosa ati, Yohane musoseshi.

⁶ Elo pakasuba kakuchinshika ukufyalwa kwamfumu Helodi, umwanansungu mwana Helodiyasi alikushana pabantu. Na Helodi atemenwe ukwinekantu.

⁷ Elo Helodi alapile nokusosa kumwanansungu ati, “Chonse icho ukolomba nkokupela.”

⁸ Ulo banyina bamwebele ichakulomba ngu mwanansungu, aebele Helodi ati, “Nkofwaya nduno lwenka mumpele umutwi wakwa Yohane Mubatishi mumbale!”

⁹ Elo Helodi ayiketwe nechikonko ukwinekantu, kuntu umulandu wakulapa pachintu-bwinji ichali nakwe pakulya, tafwayilepo ukuti amukanye.

¹⁰ Elo atumine muchifungo uwakuya kuputula umutwi wakwa Yohane.

¹¹ Elo aletele umutwi mumbale nokupela umwanansungu. Naye atwalile banyina.

¹² Abakusambila bakwa Yohane balishile nokupinta ichitumbi chakwe nokuchishika. Elo bayile kuli Yesu nokumushimikila.

Yesu alisha abantu amakana asano

¹³ Ulo Yesu aumfwile mfi, alifumineko nokwinjila mubwato nokuya kuchifulo chimbi ukushingilile, ukwakwebati ekale enka. Amabumba abantu pakumfwa ati Yesu aya, alifumine mumishi nokupita kumulundu nokumukonka.

¹⁴ Ulo Yesu apatukile mubwato, abwene ibumba ilikulu ilyabantu. Elo alibabelele ichisa, epo atatikile ukuposha abalwele babo bonse.

¹⁵ Ulo akasuba kawile, abakusambila bayile kuli Yesu nokusosa ati, “Boneni, akasuba kawa, namuno tuli nimumpanga. Bebeni abantu baye mumishi bakayishitile ifyakulya.”

¹⁶ Nomba Yesu asosele ati, “Tabalingilepo kuya iyowo. Mwebo mwenka bapeleni ifyakulya!”

¹⁷ Nabo baasukile ati, “Nga fwe kuti twachita shani? Tukwete imifuba isano bwaka nenswi shibili.”

¹⁸ Elo Yesu asosele ati, “Mpeleni fyonse mfi.”

¹⁹ Yesu aebele amabumba abantu ukwikala pesani. Elo abulile imifuba nenswi shibili, aliloleshe kumulu nokutotela kuli Lesa. Ulo ashilile ukutotela, alisunawile imifuba nji nokupela abakusambila bakwe ukuti balumbe abantu.

²⁰ Elo bonse balilile nokwikuta. Elo abakusambila batolele utwabufumfwa imiseke ikumi na ibili.

²¹ Elo abalalume abalile bali ukubati amakana asano, ukutapendelako abanakashi nabana.

Yesu aenda pamenshi

²² Bwangu-bwangu Yesu alibakakatishe abakusambila bakwe ukupatama mubwato nokuya kwishilya limbi ilyaku bemba. Ye ashele akolaya ibumba lyabantu.

²³ Ulo abalayile, aninine ulupili enka muchungulo, mukulomba.

²⁴ Panshita njilya ubwato bwena bwali pakati kaku bemba, bukofwaya nokwibila kumatamba pantu kwali ichipupu.

²⁵ Elo kumacha, Yesu ayile uko bali akoyenda pamenshi.

²⁶ Ulo abakusambila bamubwene akoyenda, balitinine bati, “Chipuku!” Epo balyawile nokwebeka.

²⁷ Bwangu-bwangu Yesu asosele kuli bo ati, “Shipeni, nine, mwitina!”

²⁸ Elo Simoni Petulo asosele ati, “Bashikulu, kati nimwebo, njebeni ukuti nyende pali bemba.”

²⁹ Naye amwebele ati, “Isa.” Elo Simoni Petulo afumine mubwato nokwenda pamenshi ukuya kuli Yesu.

³⁰ Nomba ulo abwene ichipupu ichikulu alitinine nokutatika ukwibila. Elo alilile ati, “Bashikulu ngafweni.”

³¹ Bwangu-bwangu Yesu alimwikete nokusosa kuli ye ati, “Webo we wachichetekelo chinini! Nindo wakayikila mumutima?”

³² Ulo bayinjile mubwato, ichipupu nacho chalilekele.

³³ Epo balimulambile nokuti, “Chine-chine niwe Mwana waku Lesa.”

Yesu aposha abalwele muchalo cha Genesaleti

³⁴ Ulo Yesu nabakusambila bakwe bayabukile kwishilya, bafikile muchalo cha Genesaleti,

³⁵ uko abantu bamwishibile ukuti ni Yesu. Elo batumine abantu mukuleta abalwele bonse mumishi iyashingulukile ichifulo nchilya, nokubaleta kuli Yesu.

³⁶ Abantu balimupapatile ukwebati, abaleke balokumukumyako bwaka kwilaya lyakwe. Elo bonse abalikukumyako balikupola.