Mateyo 13 - Chipangano Chabwangu

Ichelusho chawakuminsa

¹ Mukasuba kenka nkalya, Yesu afumine munanda, ayile kwikala mumbali yaku bemba nokusambisha.

² Elo nebumba lyabantu ilikulu lyalilongene kuli Ye. Echo Yesu apateme mubwato nokwikala. Nomba abantu bonse bayikele pamulundu mumbali yaku bemba.

³ Elo alibasambishe ifintu ifinji mufyelusho. Asosele kuli bo ati, “Kwali umuntu uwayile mukuminsa imbuto.

⁴ Ulo alikuminsa, imbuto shimbi shawile munshila, elo ifyuni fyalishile nokushilya.

⁵ Shimbi shawile mulubwelekese, apatali umushili uwinji. Bwangu-bwangu shalimenene.

⁶ Ulo akasuba kaninine, imisongo yalifotele nokuma pantu imishu tayayinjilepo panshi.

⁷ Shimbi nasho shawile muminga, elo iminga yalikulile nokushitabilisha.

⁸ Nomba shimbi shawile mumushili uuweme, nokutwala shalitwite ifilyo. Shimbi shatwite umwanda umo, shimbi amakumi asano nalimo, elo shimbi nasho amakumi atatu.”

⁹ Pakupwisha Yesu asosele ati, “Umfweni, ukwete amatwi aakumfwa, omfwe!”

Umwalola ifyelusho

¹⁰ Nomba abakusambila bayile kuli Yesu nokumufumba ati, “Mulandu ndo mukobebela mufyelusho?”

¹¹ Elo naye abasukile ati, “Kuli mwebo kwalipelwa ukwishiba ifyamubumfisolo ifyabufumu bwakumulu, nomba bo tabapelwapo iyowo.

¹² Pantu uyo uukwetepo tunini, akapokwa noto akwete.

¹³ Echo abantu mba nkobebela mufyelusho, pakuti ukubona balabona, nomba tababweneshapo, ukumfwa balomfwa, nomba tabomfwishapo nangula ukwiluka.

¹⁴ Kuli mba fikofikilishiwa ifyo umusoseshi Esaya asosele ati, ‘Ukumfwa mwakumfwa, nomba tamwakelukepo. Ukubona mwakubona, nomba tamwakabweneshepo.

¹⁵ Pantu amano abantu mba anini, namatwi abo alikoma, namenso abo alishibata. Nga chitaba mfi, nga balabona namenso abo, balomfwa namatwi abo, nokwiluka mumano abo. Elo nga baalukila kuli ne, nande kuti nabaposha.’

¹⁶ “Nomba mwebo mwalishuka pantu amenso enu alabona, namatwi enu alomfwa.

¹⁷ Nachine nkomweba ati, abasoseshi nabantu baku Lesa abenji balikufwayisha ukubona ifyo mukobona, nomba tabafibwenepo iyowo. Elo balikufwayisha ukumfwa ifyo mukoumfwa nomba tabafyumfwilepo.

Umwalola ichelusho chawakuminsa

¹⁸ “Nomba umfweni umwalola ichelusho chawakuminsa.

¹⁹ Inshita abantu bomfwa amashiwi aasoswa pafyabufumu bwaku Lesa, Satana alesa nokufumyamo ifyo baumfwa mumitima yabo. Nshi embuto shaminshilwe mumbali yanshila.

²⁰ Nomba imbuto ishawile mulubwelekese, ebantu abomfwa amashiwi aku Lesa, bwangu-bwangu baumfwa nokusekelela.

²¹ Nomba amashiwi nga tayenjilisha mumitima yabo, yekalamo bwaka inshita iinini, kuntu ulo kwayisa ubuchushi nomwalu, pamulandu wamashiwi aku Lesa, bwangu-bwangu baleka ukumfwa amashiwi nga.

²² Bambi nabo baba kubati nimbuto ishawile muminga. Mba ebomfwa amashiwi aku Lesa, kuntu pamulandu wakufwayilisha ifintu fyamuchalo nobuchindami, elo mfi fintu filafininkisha amashiwi, epo tabatwalapo ifitwalo.

²³ Nomba bambi eko bali ababa nge mbuto ishawile mumushili uuweme. Mba ebomfwa amashiwi aku Lesa nokuapokelela mumitima yabo, elo batwala ifitwalo, bambi umwanda umo, bambi amakumi asano nalimo, bambi nabo amakumi atatu.”

Ichelusho chalunsekwe

²⁴ Nakambi Yesu abebele ichelusho nachimbi ati, “Ubufumu bwakumulu buli kubati muntu waminshile imbuto iiweme mwibala.

²⁵ Nomba inshita abantu bali mutulo, alishile umulwani wakwe nokuminsamo ulunsekwe muli tiligu nokuya kaya.

²⁶ Ulo fyamenene nokukula nokutwala inseke, elo ulunsekwe nalo lwabonekele.

²⁷ Elo ababomfi bamwibala bayishile nokumufumba ati, ‘Bashikulu, napo tamwaminshilepo tiligu mwibala lyenu? Mba nikwisa lwafuma ndu lunsekwe?’

²⁸ Elo abasukile ati, ‘Umulwani wanji ewachita nchi!’ Elo abamilimo bamwebele ati, ‘Napo mukofwaya ukuti tuye tukalunukulemo?’

²⁹ Elo naye abasukile ati, ‘Iyowo, pantu kuti mwanukawila kumo natiligu.

³⁰ Shilekeni shonse shikulile pamo ukufikila panshita yakulobolola. Elo nakweba abasefi ukuti batale banukule ulunsekwe nokulukaka imipo nokulocha, elo tiligu ena batutile mubutala bwanji.’”

Ichelusho chakaluseke kamasitadi

³¹ Nakambi Yesu asosele ati, “Ubufumu bwakumulu buli kubati kaluseke kamasitadi, ako umuntu abyele mwibala lyakwe.

³² Kaluseke kanini ukwinekantu pambuto shonse, kuntu kaalikulile ukuchila pafimpukesa fyonse nokuba ichiti ichikulu. Nefyuni fyalishile nokupikamo finsa mumisambo yachiko.”

Ichelusho chamimena

³³ Nakambi Yesu abebele nachimbi ichelusho ati, “Ubufumu bwakumulu buli kubati mimena iyo umwanakashi ayabikile muli bansako batatu, nokufuba umufuba ukufikila onse watutumuka.”

Icho Yesu abomfeshe ifyelusho

³⁴ Fyonse mfi Yesu abebele mufyelusho. Talikubasambishapo bwaka, sembi mufyelusho mwenka.

³⁵ Achitile mfi mukufikilisha ifyasosele umusoseshi ati, “Nakusambishisha mufyelusho, nakumulondolwela ifintu ifitayishibikwa ukufuma pakutatika kwachalo.”

Yesu aalula ichelusho chalunsekwe

³⁶ Ulo Yesu ashile amabumba abantu ayinjile munanda. Elo abakusambila bakwe bayile kuli Ye nokuti, “Mutwalwileko ichelusho chalunsekwe lwamwibala.”

³⁷ Naye alibalwilile ati, “Uyo uwaminshile eye Umwana wa Muntu.

³⁸ Ibala ndilya echalo, imbuto nshilya ekwebati bantu bamubufumu bwaku Lesa. Ulunsekwe ebantu bamubi ngulya.

³⁹ Akapondo kaminshile ulunsekwe, eye Satana. Ukulobolola ninshita yakupwa kwachalo. Abasefi ebangelo.

⁴⁰ Fyenkefyo ulunsekwe bakulukaka imipo nokulocha mumulilo, efyo kwakuba kumupwilo wachalo.

⁴¹ Umwana wa Muntu akutuma abangelo bakwe ukuti abafumye mubufumu bwakwe abantu babufi nabachita ububi bonse.

⁴² Akubaposa muchimbili-mbili chamulilo. Nkulya kwakuba ukulila nokukwesanya ameno.

⁴³ Echo abantu baku Lesa bakusanika kubati kasuba mubufumu bwaku Lesa. Umfweni, ukwete amatwi aakumfwa, omfwe.

Ichelusho chabuboni ubwafiswa

⁴⁴ “Nakambi ubufumu bwakumulu buli kubati buboni bwafishilwe mwibala, ubo umuntu afisulwile nokubufisa pambi. Nomba mukusekelela kwakwe, ayile kushitisha fyonse ifyo akwete nokushita ndi bala.

Ichelusho cha mpande

⁴⁵ “Nakambi ubufumu bwakumulu buli kubati musambashi uwabukwebo uukofwaya-fwaya impande ishiweme.

⁴⁶ Ulo ashisangile ishiweme ukuchila ishakale, alile nokushitisha fyonse ifyo akwete nokuyishita.

Ichelusho chesumbu

⁴⁷ “Nakambi ubufumu bwakumulu buli kubati lisumbu ilyaposelwe pali bemba ukwikata inswi ishipusene-pusene.

⁴⁸ Ulo lyayiwile, balikulile pamulundu. Bayikele panshi nokusala inswi ishiweme nokushibika mumiseke, kuntu ishibi balishiposele.

⁴⁹ Emfyo chakuba kumupwilo wachalo. Abangelo bakwisa mukupatula ababi ukufuma kubalungamikwa,

⁵⁰ nokubaposa muchimbili-mbili chamulilo. Nkulya kwakuba ukulila nokukwesanya ameno.”

Ifyabuboni bwabwangu nobwakale

⁵¹ Elo Yesu afumbile abakusambila bakwe ati, “Napo mwafyumfwa fyonse mfi?” Nabo balyasukile bati, “Ina.”

⁵² Naye elo abasoseshe ati, “Umusambishi uuli onse uwamafunde alisambilila amashiwi aabufumu bwakumulu, aba kubati umwine wananda uufumya muchipawo chakwe ifyabwangu nefyakale.”

Bakana Yesu ku Nasaleti

⁵³ Ulo Yesu ashilile ukusosa mfi, alifumineko.

⁵⁴ Ayile kuchalo chakumyabo uko asambishe abantu munanda yakulombelamo Lesa. Ulo ashilile ukusambisha, abantu abenji abaumfwileko balishimbilwe nokusosa ati, “Nga uyu mulangwe akwete wafuma kwisa?

⁵⁵ Napo ngu temwanapo wakwakapala wamapulanga? Teye mwana Maliya? Nawabo wakwa Yakobe, Yose, Yuda na Simoni?

⁵⁶ Napo bankashi shakwe nabo temba benka twikala nabo nkuno? Nomba ngu muntu afisanga kwisa fyonse mfi?”

⁵⁷ Echo balimusulile. Elo Yesu abebele ati, “Umusoseshi balamuchinshika kumbi konse, kuntu kuchalo chakumyabo, namunanda yakwe emo bamusula.”

⁵⁸ Echo Yesu tapyungileko imilimo iinji iyafiso ifikulu nku, pantu abantu tabamuchetekelepo.