Mateyo 12 - Chipangano Chabwangu

Ifyapakasuba ke Sabata

¹ Panshita njilya, pakasuba ke Sabata, Yesu akalangenye mumabala aku tiligu. Nomba abakusambila bakwe baumfwile insala. Elo batatikile ukukonaula imisonte yaku tiligu nokulya.

² Ulo Abafalisi babwene mfi, basosele kuli Yesu ati, “Boneni! Abakusambila benu bakochita ichitasuminishiwa Mumafunde pakasuba ke Sabata!”

³ Elo Yesu abasukile ati, “Napo tamwapendapo ifyo Davide achitile ulo ali nensala pamo nabo ali nabo?

⁴ Ayinjile munanda yaku Lesa umo ye nabo ali nabo balile imifuba iyatulilwe kuli Lesa, icho batalingile kuchita, kuntu bachipupila benka.

⁵ Napo tamwapendapo Mumafunde ifyo bachipupila bamunanda yaku Lesa pe Sabata batoba ifunde lyakasuba nka, nomba tabapelwapo umulandu?

⁶ Echo nkomweba ati, epo ali mpano uuchilile pananda yaku Lesa.

⁷ Nga mwayishibile ifyo amalembo aku Lesa ngalya aasosa ati, ‘Icho mfwaya ninkumbu, techipupopo iyowo,’ nga tamupelapo mulandu kubatakwetepo umulandu iyowo.

⁸ Pakuti Umwana wa Muntu Eshikulu nape Sabata.”

Yesu aposha uwakuboko ukwauminina

⁹ Ulo Yesu afumineko nkulya, ayile kwinjila munanda yakulombelamo Lesa.

¹⁰ Mwenka mulya mwali umwalalume uwali nokuboko ukwauminina. Elo abantu bafumbile Yesu ati, “Napo chalisuminishiwa mumafunde esu ukuposha umuntu pakasuba ke Sabata?” Bafumbile mfi ukuti basange apakumupelelapo umulandu.

¹¹ Elo Yesu abasukile ati, “Mba ninani mukati kenu, nga ali nembelele imo, nomba yawila muchilindi pakasuba ke Sabata uutangayifumyamo?

¹² Echo umuntu alichilapo ukwinekantu pambelele. Elo nefunde lilasuminisha ukuchita ichilungeme pakasuba ke Sabata.”

¹³ Ulo Yesu ashilile ukusosa mfi, aebele umwalalume ati, “Tambulula ukuboko kobe.” Alitambulwile, elo nokuboko kwakwe kwalipolele, kwalingana nokunakwe.

¹⁴ Penkapo Abafalisi balifuminemo nokuya mukupangana umwakwipayila Yesu.

Yesu emubomfi waku Lesa Uwasalwa

¹⁵ Ulo Yesu ayishibile ifyo balikupangana, alifumineko. Abantu abenji balikonkele, elo naye aliposeshe bonse abalwele.

¹⁶ Nomba alibakenye ukuti bemufisululapo.

¹⁷ Achitile nchi pakuti chifikilishiwe icho Lesa asosele ukupitila mumusoseshi Esaya ati,

¹⁸ “Ngu emubomfi wanji uwo nasala uwo natemwesha. Elo muli ye ndasekelela. Nakumupela Umupashi wanji, elo naye akubilisha ifyabupingushi bwanji kunko shonse.

¹⁹ Talokutalikapo nangula ukuwowauka, talokubilikishapo pakulabila mumisebo.

²⁰ Takashilishepo itete ilyafwantika, nangu ukushimya inyali iitakoyakishapo. Alikumfwila abantu inkumbu, ukufika ubulungami bwakwe bukachimfye.

²¹ Nabenafyalo bakuchetekela.”

Yesu na Belesebule

²² Elo abantu baletele kuli Yesu umuntu uwali impofu nabuchibulu pantu ali nomupashi uubi. Elo Yesu alimuposeshe, naye atatikile ukusosa nokubona.

²³ Echo amabumba abantu alishimbilwe ukwinekantu nokufumba ati, “Napo ngu ewungaba Umwana wakwa Davide?”

²⁴ Ulo Abafalisi baumfwile mfi, basosele ati, “Ni Belesebule, mukulu wamipashi iibi ewumupela ifiso ifyakutamfishako imipashi iibi.”

²⁵ Nomba Yesu alishibile ifyo balikulanguluka. Elo asosele kuli bo ati, “Ichalo chonse ichabanika mumabumba nokutatika ukuyilwisha ichine chenka tachikokolapo. Elo abantu bamumusumba umo, nangula ulupwa lumo lwabukilana lulapatukana.

²⁶ Kati Satana akotamfya Satana, ekwebati ayibukila enka. Napo ubufumu bwakwe bwingemakana shani?

²⁷ Elo nga ndatamfya imipashi iibi kufiso ifyakwa Belesebule, nga kanshi abakusambila benu bafitamfisha kufiso fyaku nani? Kanshi abakusambila benu benka ebakumushinisha.

²⁸ Nomba nga ndatamfya imipashi iibi kufiso ifya Mupashi waku Lesa, ekwebati Ubufumu bwaku Lesa bulifikile pali mwebo.

²⁹ “Takupo umuntu nangu umo uwingenjila munanda yamuntu uwafiso nokwiba ifintu fyakwe, kuntu abala akaka umuntu wafiso ngulya. Elo engeba ifintu fyamunanda yakwe.

³⁰ “Umuntu uutasuminishanyapo nandibo, mulwani wanji, noutangafwako ukulonganya, alasalanganya.

³¹ Echo nkomweba ati, Lesa kuti anakililapo abantu abachita ifibi nemiponto yonse, nomba uwakupontela Umupashi Wabuta ye takanakililwepo.

³² Chimo chenka umuntu onse uwakwebaula Umwana wa Muntu kuti anakililwa. Nomba onse uwakupontela Umupashi Wabuta, takanakililwepo nangu munkulo njino nangula muli njilya iikoyisa.

Ichiti nefitwalo fyachiko

³³ “Mwalishiba ukuti ichiti ichiweme chitwala ifitwalo ifiweme, nechiti ichibipile chitwala ifitwalo ifibipile pakuti ichiti chonse chishibikilwa kufitwalo fyachiko.

³⁴ Mwe bana bansoka mwe! Nga mungasosa shani ifiweme mwe babi mfi? Pakuba akanwa kamuntu kalabila pafyayiula mumutima wakwe.

³⁵ Umuntu umuweme alabila ifiweme ififuma mumutima wakwe. Umubi naye alabila pafibipile ifyayiula mumutima wakwe

³⁶ “Nomba nkomweba ati, pakasuba kabupingushi abantu bakupelwa imilandu pamulandu wamashiwi onse awo basosa ichisose-sose.

³⁷ Echo nikumashiwi yenu yenka eko mwakupelelwapo nangula ukutapelelwapo umulandu.”

Ichakubwenako ichakwa Yona

³⁸ Nomba bambi abasambishi ba Mafunde na Bafalisi basosele kuli Yesu ati, “We musambishi, tukofwaya ukuti utulangeko ifyafiso ifikulu.”

³⁹ Elo naye abasukile ati, “Abantu mba ababipa abatachetekela abamuli njino nkulo bakofwaya ukubona ifyafiso ifikulu. Nomba tabakafibonepo, sembi ichachitikile kuli Yona umusoseshi.

⁴⁰ Fyenka ifyo Yona ali mumala answi iikulu inshiku shitatu, akasuba nobushiku, efyo no Mwana wa Muntu akuba munda yachalo inshiku shitatu.

⁴¹ Elo pakasuba kakupingulwa, abantu bamu Ninive bakwisa kumupela umulandu pakuti balilekele ukuchita ifibi ulo baumfwile ukusambisha kwakwa Yona!

⁴² Pakasuba kakupingulwa, nyina-mfumu waku Sheba akwisa kwimakana nokumupela umulandu, pantu afumine kumpela yachalo ukwisa mukumfwa ukusambisha ukwamulangwe kumfumu Solomoni. Nomba nkomweba ati, epo ali mpano uuchilile Solomoni!

Ukubwela kwa Mupashi Uubi

⁴³ “Ulo umupashi uubi wafuma mumuntu, uya ulo wendauka kumulundu, ukofwaya ichifulo chakutushishapo. Nga tausangilepo ichifulo,

⁴⁴ ulayisosha uwine wenka ati, ‘Nkobwelela kunanda yanji uko nafumine.’ Ulo wabwelela, wasanga tamupo ichilimo, muliweme nokusungwa bwino.

⁴⁵ Elo ulafuma nokuya kuleta imipashi inakwe isano na ibili iibipile ukuchila wo, elo ikoyisa kwinjila nokwikalamo. Kumupwilo, ngulya muntu akuba uubipile ukuchila ifyo ali pakwamba. Efyo chakuba nakuli njino nkulo iibi.”

Banyina nabawakwe baku Yesu

⁴⁶ Ulo Yesu alikusosa kubantu, kwayishile banyina nabawakwe, bayimakene panse, bamutumine intumi ukumwita ukuti basose nakwe.

⁴⁷ Elo umuntu umo aebele Yesu ati, “Banyinenwe nabawenu balimakene panse bakofwaya ukusosa namwe.”

⁴⁸ Elo Yesu abasukile ati, “Nibani bama? Nibani bawesu?”

⁴⁹ Elo atandeshe amenso ukwayikele abakusambila bakwe nokusosa ati, “Boneni, mba ebama nabawesu.

⁵⁰ Pakuti umuntu uuli onse uuchita ififwaya Bata bakumulu, ewesu, enkashi nakambi ebama.”