Mateyo 11 - Chipangano Chabwangu

Intumi shafumine kuli Yohane Mubatishi

¹ Ulo Yesu ashilile ukubeba ifyakuchita abakusambila bakwe ikumi na babili, alifumineko, ayile akosambisha nokubilisha mumishi.

² Nomba ulo Yohane ali muchifungo, alyumfwile imilimo yaku Klistu. Elo atumine bambi abakusambila bakwe kuli Yesu.

³ Elo balimufumbile ati, “Napo niwe basosapo ati akwisa, nangula tuli nokulindila umbi?”

⁴ Elo Yesu ayasukile abatuminwe ati, “Bwelelenimo mukamushimikileko Yohane ifyo mwaumfwa nokubona:

⁵ impofu shikobona, abalemana bakoyenda, abafyona bakopola, bankoma-matwi bakoumfwa, abafwa nabo bakobuka, nabachula bakoshimikilwa Ubutumi Bwawama.

⁶ Balishuka abantu abatakayikapo pali nebo!”

⁷ Ulo abakusambila bakwe balikuya, Yesu atatikile ukusosa kumabumba abantu ifyakwa Yohane ati, “Ulo mwayile kuli Yohane muchiswebebe, findo mwalikufwaya ukubona? Napo mwalikufwaya ukubona ifyo itete lisunkana kumwela?

⁸ Nindo mwafwayile ukuya mukubona? Napo muntu uufwite ifyakufwala ifyelele? Iyowo, abantu bafwala ifyelele basangwa mumananda amfumu!

⁹ Njebeniko, findo mwayile mukubona? Napo musoseshi? Ina, nachine mwalibwene umuntu umukulu ukuchila umusoseshi.

¹⁰ Pakuti Yohane eye Amalembo asosapo ati, ‘Nakutuma intumi yanji, nakwituma pantanshi yobe, ukuti ikuwamishe inshila yobe.’

¹¹ Nachine nkomweba ati, tapapo nangu umo umukulu uuchilile pali Yohane. Nomba uyo uuli umunini mubufumu bwaku Lesa, mukulu ukuchilapo pali ye.

¹² Ukutatikila kunshita shakwa Yohane Mubatishi nokufika nduno, abantu balalwisha ubufumu bwakumulu, elo balesha ukubupoka kufiso.

¹³ Abasoseshi bonse na Mafunde akwa Mosesi asosele kabela pafyabufumu mbu ukufikila napanshita yakwa Yohane Mubatishi.

¹⁴ Echo kati mukofwaya ukusumina amashiwi abo, Yohane e Eliya ngulya uwali nokwisa.

¹⁵ Umfweni, ukwete amatwi aakumfwa, omfwe!”

¹⁶ Elo Yesu asosele ati, “Kanshi nikundo ningabalinganyako mba bantu bamuli njino nkulo? Bali ukubati bana abekele pachisanke abakoyitabana nabanabo ati,

¹⁷ ‘Twalimulishishe tumitolilo twapabwinga, nomba mwe namasha kayafishisha kumo! Twalimbile inyimbo shapachililo, nomba mwe nomusowa kawafishisha kumo!’

¹⁸ Ulo Yohane Mubatishi ayishile, alikwikanya ukulya nokunwa waini, nomba abantu baebele ati, ‘Ali nomupashi uubi!’

¹⁹ Elo Umwana wa Muntu ayishile, alikulya nokunwa. Abantu bonse baebele ati, ‘Boneni ngu muntu! Wakumutoba, nichakolwa nakambi nichibusa wabamisonko nembifi!’ Nomba umulangwe waku Lesa ulaboneka ukuba uwachine kumilimo yauko.”

Imishi yabula ichichetekelo

²⁰ Nomba Yesu atatikile ukukalipila abantu bamumishi umo achitile imilimo iyafiso ifikulu iyinji pantu tabalapilepo iyowo.

²¹ Echo asosele ati, “Yangwee, ubulanda kuli webo Kolasine! Yangwee, ubulanda nakuli we Betesaida! Nga chakwebati imilimo iyafiso ifikulu iyachitikilwe muli mwebo yachitikilwe muli Tule na Sidoni, abantu bankulya kale-kale nga balifwite amasaka nokuyitila imitoyi ukulanga ukuti balapila kumabifyo abo.

²² Nachine nkomweba ati, pali nkalya kasuba kabupingushi, umulandu wenu mwe wakubipisha ukuchila wabena Tule na Sidoni.

²³ Nawebo Kapenaumu, napo wakusumbulwa kufika nakumulu? Iyowo, wakwisa kuposwa mumulilo uutashimapo. Pantu ifyafiso ifikulu ifyachitikilwe muli webo nga fyachitikilwe mu Sodomu, nga epo uli ukufika nanduno.

²⁴ Echo nkomweba ichine ati, pali nkalya kasuba kabupingushi, umulandu wenu mwe wakubipisha ukuchila wabena Sodomu.”

Yesu eupela ukutusha

²⁵ Pali njilya nshita Yesu asosele ati, “Bata, mwe Kateka wamulu nechalo! Nkomutotela pantu mwalanga mfi ifintu kubatasambilila ifyo mwafishile kubamano nabasambilila.

²⁶ Ina, Bata nchi echo mwatemenwe ukuti chichitikwe mukufwaya kwenu.

²⁷ “Bata balimpela nebo ifintu fyonse. Takupo nangu umo uwayishiba Umwana, kano Bata benka. Nakambi takupo uwayishiba Bata, kano Umwana enka nabo Umwana asala ukubafisulwilako.

²⁸ “Iseni kuli nebo bonse mwe bakatele nokulemenwa, elo nande nakumupela ukutusha.

²⁹ Pinteni ikoli lyanji, elo musambilile kuli nebo, pantu ndiwayichefya nokufuka umutima, elo mwakusanga ukutusha mumitima yenu.

³⁰ Pakuti ikoli lyanji lyangukile, elo nechipe chanji chipubile.”