Mateyo 10 - Chipangano Chabwangu

Abakusambila ikumi na babili abaku Yesu

¹ Yesu ayitile abakusambila bakwe ikumi na babili. Elo abapele insambu shakufumya imipashi iibi, nokuposha amalwele aapusene-pusene.

² Nga emashina abatumwa ikumi na babili: (Simoni uwitwa Petulo) na Andileya wakwe, Yemusi nawakwe Yohane bamwana Sebedi.

³ Filipo na Batolomeyo, Tomasi na Mateyo uwamusonko, Yemusi mwana Alifeyo na Tadiyasi,

⁴ Simoni uwakwipakisha mufyachalo na Yuda Isikaliyoti uwayembwile Yesu.

Yesu atuma abatumwa ikumi na babili

⁵ Mba ebakusambila ikumi na babili abo Yesu atumine nokubakonkobesha ati, “Mwiyako kubenafyalo, nangula ukwinjila mumushi wabena Samaliya.

⁶ Nomba muye bwaka kubana Baisilaeli abo abali kubati nimbelele ishaluba.

⁷ Kamuyeni mukubilisha ati, ‘Ubufumu bwakumulu bwapalamina.’

⁸ Muye mukuposha abalwele, ukubusha abafwa, ukuposha abafyona nokufumya imipashi iibi. Mwapokela bwaka, namwebo mukapele bwaka.

⁹ Mwipintapo ndalama mumatumba enu nangu nigolide, nangu silubale nangu indalama.

¹⁰ Mwipintapo itumba lyalwendo, nangu amalaya abili, nangu inkwabilo shibili nangu inkoli pakuti uwamilimo alila mumilimo yakwe.

¹¹ “Ulo mwayinjila mumusumba nangu mumushi, mufwayemo umuntu uungamupokelela bwino. Mwikale nakwe ukufikila ulo mwakufumamo.

¹² Ulo mwayinjila munanda mulokusosa ati, ‘Umutende ube namwebo.’

¹³ Abali munanda nga bamupokelela bwino, umutende wenu wikale nabo. Nga chakuti tabamupokelelepo, lekeni umutende wenu ubwelele kuli mwebene.

¹⁴ Nga takwakabepo umuntu nangu umo uwakumupokelela nangu ukumfwa amashiwi enu, mukakunte ulukungu kumakasa enu pakufuma munanda iyo nangu mumushi uyo.

¹⁵ Nachine nkomweba ati pali nkalya kasuba akabupingushi Lesa akubakwatila inkumbu abena Sodomu nabena Gomola ukuchila abantu bamuli ngulya musumba!

Ifyamachushi aakoyisa

¹⁶ “Umfweni! Nkomutuma ukubati nimbelele pakati kamimbulu. Echo chenjeleni kubati ninsoka nakambi mufuke imitima kubati ninkunda.

¹⁷ Chenjeleni nabantu, pakuti bakamutwala mufilye nokumupuma mumananda aakulombelamo Lesa.

¹⁸ Bakumutwala kubapingushi nakumfumu pamulandu waku nebo. Elo mwakunchitila bukamboni kuli bo nakubenafyalo.

¹⁹ Nomba ulo balikumwikata, mwilokusakamanapo mwati, ‘Findo tukoya kusosa?’ Nangula mwati, ‘Tukoya kulondolola shani?’ Pantu Lesa akumweba ifyakusosa panshita yenka njilya.

²⁰ Pakuti temwepo mwalikusosa iyowo, kuntu Mupashi waku Bawishinwe bakumulu ewalikusosela muli mwe.

²¹ “Munshita njo wabo akwipayisha wabo, wishi naye akwipayisha umwana. Elo abana nabo bakwimina abafyashi babo nokubepayisha.

²² Abantu bonse bakumupata pamulandu waku nebo. Nomba uwakushipikisha ukufika nakumupwilo ewakupuluka.

²³ Nomba nga bamuchusha mumushi umo, butukileni kuli umbi. Nachine nkomweba ati, ulo mutalapwilisha imishi yonse iyamu Isilaeli, Umwana wa Muntu alikwishile kale.

²⁴ “Napo tamwayishibapo ukwebati uwakusambila tachilapo pamusambishi wakwe, nakambi umusha naye tachilapo pali shikulu wakwe?

²⁵ Chiweme ukwebati uwakusambila alingane nomusambishi wakwe, elo umusha naye alingane nabashikulu bakwe. Kati umukulu wananda bamwita ati ni Belesebule, palibufi abamunanda yakwe?

Uulingile ukutina

²⁶ “Kanshi mulokutinapo bantu. Pantu tapapo akantu akafimbwa akatakafisuluke, nangula ichamubumfisolo ichitakeshibikwe.

²⁷ Icho nkomweba mumfishi, mukachisosele pakasuba, nanchilya mukoumfwa mukantepe-ntepe fyakumfwikila pamulu wamutenje wamananda.

²⁸ Mwitinapo abo abepaya umubili, kuntu tabakwetepo ifiso ifyakwipaya umupashi. Echo tineni uyo uwipaya umubili pamo nomupashi mumulilo uutashimapo.

²⁹ Napo ututiti tubili tatushitwapo ikobili limo? Napali nto utunini takubapo nangu kamo akawila panshi ukwambula Bawishinwe ukwishiba.

³⁰ Nangu nimwebo imishishi yamumutwi wenu yalipendwa yonse.

³¹ Kanshi mwitinapo iyowo, pakuba mwebo mwalichindama ukuchila patutiti utwinji.

Ukusumina nokukana Yesu

³² “Umuntu onse uwakunsumina pamenso abantu, eye nandibo nakwisa kumusumina pamenso aku Bata bakumulu.

³³ Nomba onse uwakunkana pamenso abantu, nandibo nakwisa kumukana pamenso aku Bata bakumulu.

Abantu bakupatana pamulandu waku Yesu

³⁴ “Mwilokulangulukapo ukwebati nalileta umutende pachalo. Temutendepo naleta iyowo, kuntu inkondo.

³⁵ Pantu nayisa mukupatanya umwana umwalalume kuli wishi, umwanansungu kuli banyina, nomulokashi kuli banyinafyala.

³⁶ Pakuba abalwani bamuntu bakuba benka abalupwa lwakwe.

³⁷ “Umuntu uwatemwesha bawishi nangula banyina ukuchila nebo talingilepo ukuba umuntu wanji. Elo na uyo onse uwatemwesha umwana wakwe umwalalume nangula umwanakashi ukuchila nebo, talingilepo ukuba umuntu wanji.

³⁸ Onse uyo uutapintapo umutashi wakwe nokunkonka, talingilepo ukuba uwakusambila wanji.

³⁹ Onse uufwaya ukupulusha ubumi bwakwe, ewakubuposa, nowakuposa ubumi bwakwe pamulandu wanji, ewakubupulusha.

Ukulambulwa

⁴⁰ “Onse uwapokelela mwebo, nine apokelela. Elo onse uwampokelela ekwebati apokelela na Bata abantumine.

⁴¹ Onse uwapokelela umusoseshi uwatumwa na Lesa akupokelela ichilambu ichakubati chamutumwa waku Lesa. Elo onse uwakupokelela uwalungamikwa pantu mulungami, akupokelela ichilambu chakwe.

⁴² Na muntu uupela amenshi bwaka akunwa kuli uyo umunini pantu wabakusambila banji, nachine nkomweba ati, akapokelela ichilambu chakwe.”