Maliko 9 - Chipangano Chabwangu

¹ Yesu achili mukusosa nokuti, “Nachine nkomweba ati, epo bali bambi abemakanine mpano abatakafwepo, kuntu ababala ukubona Ubufumu bwaku Lesa bukoyisa nefiso.”

Ukusanguka kwaku Yesu palupili

² Ulo papitile inshiku shisano nabumo, Yesu abulile Petulo, Yemusi na Yohane, ayile nabo kulupili ulutali apabenka. Elo asangukile pamenso abo.

³ Amalaya akwe alikubeka nokubutisha tuutu! Tapalipo panonshi kasamfya wansalu ungeshiba ukushitufya mfilya.

⁴ Epo abakusambila babwene Eliya na Mosesi bakososhanya na Yesu.

⁵ Elo Petulo aebele Yesu ati, “We musambishi, chingawama kuli fwebo ukwikala mpano. Katwimake imisasa itatu: umo ube obe, umbi ube wakwa Mosesi, umbi nawo ube wakwa Eliya.”

⁶ Pantu Petulo tayishibilepo ichakwasuka pantu ye nabanakwe baliketwe umwenso.

⁷ Elo kwayishile ikumbi nokubafimba, nakambi mwafumine neshiwi mukati kekumbi ilyasosele ati, “Ngu Mwana wanji uwatemwekwa, mumfweni!”

⁸ Bwangu-bwangu pakucheba-cheba, tababwenepo umuntu naumbi, kuntu Yesu enka.

⁹ Ulo balikutentemuka ulupili, Yesu alibakonkobeshe ati, “Tekwesha ukwebako umuntu nangu umo ifyo mwabona, sembi ulo Umwana wa Muntu akubuka kubafwa.”

¹⁰ Abakusambila basungile nga mashiwi, nokusoshanya muli bo benka ukuti, “Chikoyalula ndo ukubuka nakambi kubafwa?”

¹¹ Abakusambila balimufumbile Yesu ati, “Nga nindo abasambishi ba Mafunde bakoebela ati, ‘Eliya ewakubalilapo ukwisa?’”

¹² Yesu alibasukile ati, “Nachine Eliya ewakubalilapo ukwisa mukuwamya ifintu fyonse. Nga nomba mulandu ndo chasoselwa mu Malembo ati, Umwana wa Muntu ali nokuchula ukwinekantu nokukakwa?

¹³ Nomba nkomweba ati, Eliya alisa kale, nakambi nabantu balimuchitile umo bafwayile benka, ukubati nimfilya Amalembo asosa pali ye.”

Yesu aposha umulumbwana uwali nomupashi uubi

¹⁴ Ulo Yesu nabakusambila bakwe babwelele ukwashele abakusambila bambi, babwene ibumba lyabantu ilikulu lilibashingulukile, nabasambishi ba Mafunde bambi balikutalikana nabo.

¹⁵ Ulo abantu babwene Yesu, balishimbilwe ukwinekantu. Babutukile uko ali nokumupela umutende.

¹⁶ Yesu afumbile abakusambila bakwe ati, “Findo ifyo mukotalikana nabo?”

¹⁷ Umuntu umo mwibumba alyasukile Yesu ati, “We musambishi, naletele kuli mwebo umwana wanji umwalalume. Aba nomupashi uubi uumukanya ukusosa.

¹⁸ Ulo umwikata lonse, ulamupama panshi elo nokufumya ipofu kukanwa, ukukwesanya ameno nomubili wonse ulauminina ntii-nti. Nayisa kupapata kubakusambila bobe ukuti baufumyemo umupashi uubi, kuntu bayisa kufilwa.”

¹⁹ Yesu alibasukile ati, “Mwe bantu batachetekela! Kanshi mukofwaya njikale nenu inshita yalepa shani? Nkoshipikisha nenu inshita yalepa shani? Temulandupo, muleteni umulumbwana kuli nebo!”

²⁰ Bamuletele kuli Yesu. Ulo umupashi uubi wabwene Yesu, wamuwishishe panshi, nokumufulunganya, nokufumya ipofu kukanwa.

²¹ Yesu afumbile wishi wamulumbwana ati, “Kanshi ubulwele bwamutatikile lwisa?” Naye alyasukile ati, “Bwamutatikile ulo ali umwayiche.

²² Libili-libili bwalikumuposa mumulilo namumenshi ukuti bumwipaye. Mutukwatilepo inkumbu nokutwafwilisha nga kuti mwachita mfi!”

²³ Yesu asosele ati, “Chikoyalula ndo icho mukososa ati, kati ukosumina? Ifintu fyonse filachitika kumuntu uwaba nechichetekelo!”

²⁴ Bwangu-bwangu bawishi wamwana balyawile nokusosa ati, “Nkochetekela, nomba nshafikapo. Mungafweko mfikepo!”

²⁵ Ulo Yesu abwene ibumba lyabantu, ilyabutukileko, akalipile umupashi uubi ati, “We mupashi uubi, we nkoma-matwi, we chibulu we, nkokweba ati, fuma muli ngu mulumbwana wikenjilamo nakambi!”

²⁶ Umupashi uubi walimufulungenye, elo walifuminemo nokwaula. Umulumbwana ashele alilele kubati alifwile, nabenji abalipo balangulukile ati, “Afwa!”

²⁷ Nomba Yesu alimwikete kuminwe nokumubusha, epo alimakene.

²⁸ Ulo Yesu ayinjile munanda, abakusambila bakwe balimufumbile kumbali ati, “Mulandu ndo fwebo chatukangila ukufumya umupashi uubi?”

²⁹ Yesu alibasukile ati, “Takupo inshila imbi iyakufumishamo umupashi uubi uwaba nga ngu, kuntu mukulomba mwenka.”

Yesu asosa nakambi ifyamfwa yakwe

³⁰ Ulo bafumineko, Yesu nabakusambila bakwe bayile ku Galili. Tafwayilepo ukuti umuntu nangu umo eshibe uko ali.

³¹ Pakuti alikusambisha abakusambila bakwe ati, “Umwana wa Muntu akoyembulwa kubantu. Elo bakumwipaya. Nomba mubushiku bwalenga shitatu, akwisa kubuka kubafwa.”

³² Nomba bo tabayishibilepo umwalolele nchi chebo. Echo balitinine ukumufumba.

Ninani umukulu mu Bufumu bwaku mulu?

³³ Ulo bafikile kumushi wa Kapenaumu, nokwinjila munanda, Yesu alibafumbile ati, “Kanshi findo mwali kutalikishanya panshila?”

³⁴ Elo bayikele chelele, pakuti balikutalikishanya munshila ukwishiba umukulu pali bo.

³⁵ Yesu ayikele panshi, ayitile abakusambila ikumi na babili, asosele kuli bo ati, “Umuntu ukofwaya ukuba umukulu ayichefye nokubombela bonse.”

³⁶ Epo abulile akana kanini nokukemanika pantanshi yabo. Alikakumbatile nokubeba ati,

³⁷ “Umuntu onse uwakupokelela akana kanini akalinga nka mwishina lyanji, epela nine apokelela. Elo onse uwapokelela nebo, te nenkapo apokelela, kuntu nangulya uwantumine.”

Onse uutatulengulula muntu wesu

³⁸ Yohane asosele kuli Yesu ati, “We musambishi, twabwene umuntu umo uwalikufumya mipashi iibi mwishina lyobe. Epo twalimukenye pakuti tali wamwibumba lyesu.”

³⁹ Yesu asosele kuli bo ati, “Mwimukanyapo, pakuti takwaba nangu umo uuchita ifyafiso ifikulu mwishina lyanji nakambi ese mukusosa ifyabipa pali nebo.

⁴⁰ Onse uutali mulwani wesu muntu wesu.

⁴¹ Sambilileni nchi! Uyo onse uwakumupela inkombo yamenshi akunwa pakuti muli bena Klistu, nachine akoyisa kupoka ichilambu chakwe.”

Ifilenga ukubifya

⁴² “Kati umuntu akulenga umo uwaku mba bana banini ukuposa ichichetekelo muli nebo, chamulinga ukumukakila ichilibwe chakupelako mumukoshi wakwe nokumuposa mwitenga lyamenshi.

⁴³ Kati ukuboko kobe kulakulenga ukubifya, ukuputuleko! Chawama ukwinjila mubumi butapwa nokuboko kumo ukuchila ukuya kuposwa namaboko abili mumulilo uutashimapo. [

⁴⁴ Umo, ‘Imilomwa ibalya tayifwapo, nomulilo taushimapo.’]

⁴⁵ Nakambi ulukasa lobe nga lulakulenga ukubifya, luputuleko. Chawama ukwinjila mubumi ubutapwa nolukasa lumo ukuchila ukuposwa mumulilo utashimapo namakasa abili. [

⁴⁶ Umo, ‘Imilomwa ibalya tayifwa, nomulilo taushimapo.’]

⁴⁷ Nakambi kati ilinso lyobe lilakulenga ukubifya, lilobolemo. Chawama ukwinjila mu Bufumu bwaku Lesa nelinso limo ukuchila ukuposwa mumulilo utashimapo namenso abili.

⁴⁸ Umo, ‘Imilomwa ibalya tayifwapo, nomulilo taushimapo.’

⁴⁹ “Ukubati nimfilya umuchele ulungwa mufyakulya, efyo namwebo bonse mukoya kuwamishiwa nomulilo wamachushi.

⁵⁰ “Umuchele waliwama, kati umuchele wakubuluka, mba ukoyisa kulowa nendo? “Beni nawo umuchele uwakutemwana muli mwe, nakambi ikaleni umutende umo nomunakwe.”