Maliko 8 - Chipangano Chabwangu

Yesu alisha abantu amakana ane

¹ Muli nshilya nshiku, kwalongene nakambi ibumba ilikulu ilyabantu. Ulo ifyakulya fyabo fyashilile, Yesu ayitile abakusambila bakwe nokusosa kuli bo ati,

² “Ndi nenkumbu nebumba ndi pakuti bayikala nandibo nomba inshiku shitatu. Epo tabakwetepo nefyakulya.

³ Nga nati mbaleke babwelelemo nensala kwabo, kuti bafwa ulushile munshila pantu bambi bafumine ukutali.”

⁴ Elo abakusambila bakwe balimufumbile ati, “Nga muno muchiswebebe umuntu kuti afumya kwisa ifilyo fyakuti mba bantu bonse balye bekute?”

⁵ Yesu alibafumbile ati, “Inga imifuba muli nayo?” Nabo baasukile ati, “Isano na ibili.”

⁶ Elo Yesu aebele ibumba ukwikala panshi. Abulile imifuba njilya isano na ibili, atotele kuli Lesa, elo ayisunawile nokupela abakusambila bakwe ukuti balumbe kubantu. Nabo efyo bachitile.

⁷ Elo balikwetepo notuswi tunini, nato kumo Yesu alitotele kuli Lesa, asoseshe abakusambila bakwe ukupela abantu.

⁸ Bonse abantu balilile nokwikuta. Elo batolele utusunaulwa utwashelepo imiseke isano na ibili.

⁹ Abalile bali nangula amakana ane. Epo Yesu alibalekele ukuti baye.

¹⁰ Bwangu-bwangu Yesu apateme mubwato pamo nabakusambila bakwe nokuya kuchalo cha Dalamanuta.

Abafalisi bafwaya ichafiso ifikulu

¹¹ Abafalisi bambi bayile kuli Yesu nokutalikana nakwe. Balikufwaya ukumwesha. Bamufumbile ukuti achitepo ichafiso ifikulu chimo ichakulanga ukuti aba na Lesa.

¹² Epo Yesu alipemashikile nokuti, “Mulandu ndo abantu baku njino nkulo bakofwayila ichishibilo? Iyowo, nebo nkomweba ati, tachayise kupelwa kuli njino nkulo ichishibilo ichafiso ifikulu nangu chimo.”

¹³ Elo Yesu abashile nokwinjila nakambi mubwato, elo ayabukile kwishilya lyaku bemba.

Imimena ya Bafalisi neyakwa Helodi

¹⁴ Abakusambila balilabukile ukupinta imifuba. Bapintile bwaka umufuba umo mubwato epela.

¹⁵ Elo Yesu alibachenjeshe ati, “Umfweni, chenjeleni nemimena ya Bafalisi neyakwa Helodi.”

¹⁶ Nabo balisoshenye bati, “Ifyo asosela mfi pantu tatukwetepo imifuba.”

¹⁷ Yesu alishibile ifyo balikusoshanya. Elo abafumbile ati, “Findo ifyo mukososhanya ati tamukwetepo imifuba? Kanshi nanomba tamulayishiba nokumfwikisha? Kanshi nanomba tamulaumfwa?

¹⁸ Mwalikwata menso, kanshi tamukobwenesha. Amatwi mwalikwata, kanshi tamukoumfwikisha? Kanshi tamukoyibukishapo

¹⁹ imifuba njilya isano iyo nasunawilile nokulisha abantu amakana asano? Nge fyashelepo mwayiwishe imiseke inga?” Nabo balimwasukile ati, “Ikumi na ibili.”

²⁰ Yesu asosele nakambi ati, “Ngolo nasunawilile abantu imifuba isano na ibili, nokulisha abantu amakana ane, kanshi ifyashelepo mwayiwishe imiseke inga?” Nabo balimwasukile ati, “Isano na ibili.”

²¹ Epo Yesu alibafumbile ati, “Kanshi nanomba tamwaumfwikishapo?”

Yesu aposha impofu ku Betesaida

²² Ulo bafikile ku Betesaida, abantu bambi batwite kuli Yesu umuntu umwalalume uwali impofu, nokumufumba ukuti amukumye.

²³ Epo Yesu ayikete umuntu uwapofula pakuboko nokumutwala kunse yamushi. Epo atile ukumushipila amate pamenso, Yesu abikile amaboko akwe pali ye. Elo alimufumbile ati, “Napo ukobona akantu?”

²⁴ Umuntu ayinushe amenso akwe nokuti, “Nkobona abantu ukubati fiti fikoenda-enda.”

²⁵ Yesu abikile nakambi iminwe yakwe pali ye. Epo aliloleshe bwino-bwino, alipolele nokubona ifintu fyonse bwino-bwino.

²⁶ Yesu amutumine ukuya kwabo nokumweba ati, “Wiyinjilamo muli ngu mushi uye bwaka kwenu.”

Yesu Ewasubwa waku Lesa

²⁷ Epo Yesu nabakusambila bakwe bayile mumishi iyali apepi na Kayisaleya Filipi. Panshila alibafumbile ati, “Njebeniko, abantu beba ati nebo nine nani?”

²⁸ Nabo balimwasukile ati, “Bambi basosa ati niwe Yohane Mubatishi, bambi bati niwe Eliya, elo bambi nabo basosa ati uli umo uwabasoseshi baku Lesa.”

²⁹ Yesu alibafumbile ati, “Nga mwebo mukoti nine nani?” Petulo alimwasukile ati, “Niwe Klistu.”

³⁰ Yesu alibakonkobeshe ati, “Tekwesha ukubushako umuntu nangu umo ukuti nine Uwasubwa waku Lesa.”

Yesu asosa pafyakuchula nemfwa yakwe

³¹ Epo Yesu abalile ukusambisha abakusambila bakwe ati, “Umwana wa Muntu akumfwa amachushi, nokusulwa kubakulu Babayuda, kuntungulushi shabachipupila, nabasambishi ba Mafunde. Bakumwipaya, kuntu mukasuba kalenga shitatu akwisa kubuka kubafwa.”

³² Ndi shiwi alisosele pamenso-kutuba. Ulo Petulo aumfwile mfi, abulile Yesu nokuya nakwe pambali. Elo atatikile ukumwebaula.

³³ Nomba Yesu alyalukile nokulolesha pabakusambila bakwe, nokwebaula Petulo ati, “Fuma mpa Satana! Pantu ifyo ukolanguluka tefyaku Lesa iyowo, kuntu fyabuntu!”

³⁴ Yesu ayitile ibumba lyabantu pamo nabakusambila bakwe. Asosele kuli bo ati, “Kati umuntu akofwaya ukunkonka, ayikanye umwine nokupinta umutashi wakwe, elo ankonke.

³⁵ Pakuti umuntu onse ukofwaya ukupulusha ubumi bwakwe, eukoyisa kubuposa. Nomba uyo onse uwakuposa ubumi bwakwe pamulandu waku nebo no Butumi Bwawama, ewakubupulusha.

³⁶ Ngo muntu chikomwafwa shani nga anonka ichalo chonse, elo aposa ubumi bwakwe?

³⁷ Nga chintu ndo ichingalinga ukukabushanya nobumi bwamuntu?

³⁸ Pakuti uyo onse uwakuba nensoni pamulandu waku nebo namashiwi anji, muli njino nkulo iibipile, Umwana wa Muntu naye akwisa kumukwatila insoni ulo akwisa mubuleme bwaku Bawishi pamo nabangelo bakwe ababuta.”