Maliko 6 - Chipangano Chabwangu

Yesu bamusula ku Nasaleti

¹ Ulo Yesu afumineko ayile kumyabo, nabakusambila bakwe balimukonkele.

² Ulo akasuba ke Sabata kafikile, atatikile ukusambisha munanda yakulombelamo Lesa. Abantu abenji abalikumumfwa balishimbilwe ukwinekantu nokuti, “Nga akoyishiba shani mfi fintu fyonse? Elo nga uyu umulangwe akwete wafuma kwisa? Nefiso ifyakuchita ifyakushimbwisha ifyaba nga mfi, afumya kwisa?

³ Napo ngu temwanapo wakwa kapala wamapulanga, mwana Maliya, nawabo wakwa Yemusi, Yose, Yuda na Simoni? Kanshi bankashi shakwe nabo temba benka twikala nabo nkuno?” Echo balimusulile.

⁴ Elo Yesu abebele ati, “Umusoseshi balamuchinshika kumbi konse, kuntu kuchalo chakumyabo, mumukowa elo namunanda yakwe emo bamusula.”

⁵ Echo tachitileko ifyafiso ifikulu, lelo abikile amaboko akwe pabalwele banini bwaka, nokubaposha alibaposeshe.

⁶ Epo alishimbilwe ukwinekantu pamulandu wakutachetekela kwabo. Elo Yesu ayile ulo enda-enda nokusambisha mumishi yamumbali.

Yesu atuma abakusambila ikumi na babili

⁷ Elo Yesu ayitile abakusambila bakwe ikumi na babili. Atatikile nokubatuma babili-babili. Alibapele insambu ishakutamfishako mipashi iibi.

⁸ Elo abebele ati, “Pabulwendo mulokupintapo lukoso inkoli, mwilokupintapo nafimbi iyowo, nangu umufuba, nangu litumba, nangu indalama.

⁹ Inkwabilo shena mulokufwala, kuntu amalaya mwilokupintapo abili-abili iyowo.”

¹⁰ Elo alibebele ati, “Nga mwafika mumushi, mwikale munanda umo bakumupokelela bwino ukufikila ulo mwakufumamo mumushi uyo.

¹¹ Konse uko bakana ukumupokelela nokumumfwa, pakufumamo, mukakunte ulukungu kumakasa enu, lwikale bumwanamboni pali bo!”

¹² Epo abakusambila balile ulo babilisha kubantu ukwebati bapilibuke kububi bwabo.

¹³ Balikutamfya mipashi iibi mubantu, nabalwele abenji balibasubile amafuta nokubaposha.

Bayipaya Yohane Mubatishi

¹⁴ Pali njilya nshita imfumu Helodi alyumfwile ululumbi lwaku Yesu. Elo abantu bambi balikusosa ati, “Yohane Mubatishi abuka kubafwa. Echo akochitila ifyafiso ifikulu mfi.”

¹⁵ Nomba bambi bena balikusosa ati, “Ngu ni Eliya.” Bambi nabo balikusosa ati, “Musoseshi, ali kubati musoseshi uwakale.”

¹⁶ Ulo Helodi aumfwile mfi, asosele ati, “Yohane Mubatishi uwo naputwileko umutwi, eubukile kubafwa!”

¹⁷ Pantu Helodi umwine atumine abantu ukuya kwikata Yohane Mubatishi nokumuposa muchifungo pamulandu wakwa Helodiya muka Filipo, wabo wakwa Helodi. Pantu abulile mukawabo, Helodiya, ewo aupile.

¹⁸ Nipali nchi Yohane Mubatishi aebele Helodi ati, “Chalibindwa ukupa muka wenu.”

¹⁹ Helodiya echo apatile Yohane Mubatishi, alikufwaya ukuti bamwipaye. Nomba alifililwe pamulandu wakwa Helodi.

²⁰ Pantu Helodi alikutina Yohane Mubatishi, ukuti muntu uwapatulika nakambi uwakaele. Echo alikumusungila bwino-bwino. Lonse ulo Helodi alikumumfwa, chalikumupesha amano, kuntu alikutemwisha ukumfwa ifyo Yohane Mubatishi alikusosa.

²¹ Bwasukile ubushiku bwakuchinshika ukufyalwa kwakwa Helodi bwafika. Pali mbu bwine bushiku, Helodi atebetele bafilolo bakwe nabakabilo nabachindami bamu Galili.

²² Ulo umwana mwanakashi wakwa Helodiya aponene mulwalala mukushana, Helodi pamo nabonse abalikulya nakwe balitemenwe ukwinekantu. Echo imfumu Helodi alapile nokusosa kumwanansungu ati, “Lomba chonse icho utemenwe, nkokupela.”

²³ Elo Helodi alilapile nokusosa ati, “Chonse icho ukolomba nkokupela, nangu lubali lumo ulwachalo chanji!”

²⁴ Umwanansungu alifumine nokuya kufumba banyina ati, “Nindo nakulomba?” Banyina balyasukile ati, “Ukalombe umutwi wakwa Yohane Mubatishi.”

²⁵ Bwangu-bwangu alibwelele kumfumu nokuti, “Nkofwaya nduno lwenka mumpele umutwi wakwa Yohane Mubatishi mumbale!”

²⁶ Epo imfumu yayiketwe nechikonko ukwinekantu, kuntu umulandu wakulapa pachintu-bwinji, apali nabo abo ali nakwe pakulya, tafwayile ukuti amukanye.

²⁷ Penkapo imfumu yatumine umushilikali ati, “Kalete umutwi wakwa Yohane Mubatishi.” Umushilikali epakuya muchifungo, ayile kuputula nomutwi wakwa Yohane.

²⁸ Elo aletele umutwi mumbale nokupela umwanansungu. Naye atwalile banyina.

²⁹ Ulo abakusambila bakwa Yohane baumfwile, balile nokupinta ichitumbi chakwe nokuchishika.

Yesu alisha abalalume amakana asano

³⁰ Abatumwa babwelele kuli Yesu, nokumushimikila fyonse ifyo bachitile nefyo basambishe.

³¹ Elo Yesu abebele ati, “Katiyeni fwenka ukushingilile, tutusheko panini.” Pantu abantu abenji balikwisa nokuya, Yesu nabakusambila tabakwetepo inshita yakulya.

³² Elo baninine mubwato nokuya kuchifulo ukushingilile.

³³ Nomba abantu abenji balibabwene pakuya, abenji nabo balibeshibile, balibutukile pamo kumulundu, ukufuma kumishi yonse nokubachilawila.

³⁴ Ulo Yesu apatukile mubwato, abwene ibumba ilikulu ilyabantu. Elo ababelele inkumbu pakuti bali kubati nimbelele ishitakwete chembela. Elo atatikile ukubasambisha ifintu ifinji.

³⁵ Ulo akasuba kawile, abakusambila bayile kuli Yesu nokusosa ati, “Boneni, akasuba kawa, namuno tuli nimumpanga.

³⁶ Bebeni abantu ukuti baye mumabala namumishi iishingulukile bakayishitile ifyakulya.”

³⁷ Nomba Yesu alibasukile ati, “Mwebo mwenka bapeleni ifyakulya!” Abakusambila balyasukile ati, “Kanshi nifwebo mukofwaya ukuti tuye kushita imifuba iikoshitwa indalama imyanda ibili ukuti balye?”

³⁸ Yesu alibafumbile ati, “Mukwete imifuba inga? Kamuya mukabone.” Ulo babwene, bamwebele ati, “Tukwete imifuba isano bwaka nenswi shibili.”

³⁹ Epo Yesu aebele abakusambila bakwe ati bebe abantu ukuti bekale pamwemfu mumabumba.

⁴⁰ Abantu bayikele panshi mumilongo iyamyanda neyamakumi asano.

⁴¹ Elo Yesu abulile imifuba isano nenswi shibili, aloleshe kumulu nokutotela kuli Lesa. Ulo ashilile ukutotela alisunawile imifuba nji nokupela abakusambila bakwe ukuti balumbe abantu. Nenswi shibili balilumbile.

⁴² Elo bonse balilile nokwikuta.

⁴³ Epo abakusambila batolele utwabufumfwa twamifuba nenswi imiseke ikumi na ibili.

⁴⁴ Abalile imifuba abalalume bali amakana asano.

Yesu aenda pali bemba

⁴⁵ Bwangu-bwangu Yesu alibakakatishe abakusambila bakwe ukupatama mubwato, ukuti batanjileko kwishilya kumushi wa Betesaida. Yesu ye ashele akolaya ibumba lyabantu.

⁴⁶ Ulo abalayile, ayile kulupili mukulomba.

⁴⁷ Ulo kwabele ichungulo, ninshi nobwato buli pakati kabemba, Yesu naye ashele enka pamulundu.

⁴⁸ Abwene ukuti bafilwa ukoba pakuti ichipupu chalibachilingenye. Nomba kumacha Yesu ayile uko bali, akoenda pamenshi, abele ukuba akopitilila.

⁴⁹ Ulo abakusambila bamubwene akoenda pamenshi, bakashile bati, “Chipuku?” Epo balyawile nokwebeka.

⁵⁰ Bwangu-bwangu Yesu asosele kuli bo ati, “Shipeni! Nine, mwitina!”

⁵¹ Elo apateme mubwato, nechipupu chaleka nokuleka. Epo bonse balishimbilwe ukwinekantu

⁵² pakuti tabayishibilepo ifyamifuba, pamulandu wakutomfwa kwabo.

Yesu aposha abalwele muchalo cha Genesaleti

⁵³ Ulo Yesu nabakusambila bayabukile kwishilya, bafikile muchalo cha Genesaleti, bakakile nobwato pachabu.

⁵⁴ Ulo bafumine mubwato, bwangu-bwangu nabantu balimwishibile Yesu.

⁵⁵ Batatikile nokubutukila uku noku muli nchilya chalo, babalile ukutemba abalwele pampasa shabo. Babatwite uko baumfwile ati ekwali Yesu.

⁵⁶ Konse uko alikuya, mutumishi namumisumba namunkutu, balikuteka abalwele mumansa. Balikumupapatila ati, lekeni balokukumyako bwaka kwilaya lyenu. Elo bonse abali kukumyako balikupola nokupola.